ᒪᕐᕉᒃ ᐊᕐᓈᒃ ᐋᓐᓂᑑᒃ ᐃᖏᕐᕋᐅᑎᒧᑦ ᑲᓕᑦᑕᐅᓱᑎᒃ ᐅᒥᐅᔭᒥ
September 7, 2017
ᐊᖑᑎᒃ 20-ᓃᑦᑐᓂᒃ ᐅᑭᐅᓕᒃ ᑎᓪᓕᓚᐅᕐᑐᖅ ᓄᓇᒃᑰᔫᒥᒃ ᐊᒻᒪᓗ ᐊᕐᓈᓂᒃ ᒪᕐᕉᓂᒃ ᐅᕕᒃᑳᓂᒃ ᐅᒥᐅᔭᒥ ᑲᓖᑦᓱᓂ.
8-ᖕᖑᓚᑳᒥ ᓯᑉᑎᒻᐱᕆ 2-ᒥ ᐅᒥᐅᔭᒥ, ᓄᓇᓕᓐᓂ ᐃᓄᖃᕐᓱᓂ 442-ᓂᒃ ᑕᓯᐅᔭᕐᔪᐊᑉ ᓯᑦᔭᖓᓂ, 29-ᓂᒃ ᐅᑭᐅᓕᒃ ᐃᓕᒪᒋᔭᖅ ᓄᓇᒃᑰᔫᒥᒃ ᑎᓪᓕᓚᐅᕐᑐᖅ, ᓱᑲᓵᒻᒪᕆᑦᓱᓂ ᐊᕐᖁᑎᒃᑯᑦ ᐊᒻᒪᓗ ᒪᕐᕉᓂᒃ ᐃᓅᓐᓂᒃ ᐱᓱᑦᑑᓂᒃ ᑲᓖᑦᓱᓂ. ᕿᒣᓚᐅᕐᑐᖅ ᓄᓇᒃᑰᔫᒥᒃ ᐊᒻᒪᓗ ᓄᓇᒧᑦ ᕿᒪᑦᓯᓱᓂ. ᓯᑉᑎᒻᐱᕆ 4-ᒥ 3-ᖑᓚᑳᒥ ᐅᓪᓗᑯᑦ, ᑲᑎᕕᐅᑉ ᐳᓖᓯᖏᑦ ᑎᒍᓯᓚᐅᕐᑐᑦ ᐃᓕᒪᒋᔭᕐᒥᒃ ᐃᑲᔪᕐᑕᐅᓱᑎᒃ ᓄᓇᓖᑦ ᐃᓄᖏᓐᓄᑦ ᕿᓈᔭᕐᑎᓗᒋᑦ ᓄᓇᒥ. ᐅᓪᓗᒥ ᑲᑎᕕᐅᑉ ᐳᓖᓯᒃᑯᖏᑦᑕ ᑎᒍᔭᐅᒪᕕᖓᓃᓕᕐᑐᖅ ᐅᒥᐅᔭᒥ ᐊᒻᒪᓗ ᐊᒥᓱᐃᓂᒃ ᖃᓄᐃᓕᔭᐅᒍᑎᑖᕐᑕᐅᓱᓂ ᐅᑯᓂᖓ: ᐋᖓᔮᑦᓱᓂ ᐃᖏᕐᕋᐅᑎᒧᑦ ᑲᓖᔪᖅ ᐋᓐᓃᓚᕿᑦᓱᓂ; ᐊᖁᑦᓱᓂ ᐊᑦᑕᓇᕐᓱᓂ ᑲᓖᔪᖅ ᐋᓐᓃᓚᕿᑦᓱᓂ; ᑲᓖᑦᓱᓂ ᕿᒪᑦᓯᔪᖅ ᐋᓐᓃᓚᕿᑦᓱᓂ. ᑯᐯᑉ ᐳᓖᓯᖏᑦ ᖃᐅᔨᓴᕐᓂᒥᒃ ᑲᔪᓯᑎᑦᓯᓕᕐᑐᑦ.