SPVM-ᑯᑦ ᐊᒻᒪᓗ ᓄᓇᕕᒻᒥ ᐳᓘᓯᒃᑯᑦ ᐱᒍᑦᔨᔨᖏᑦ ᐅᓐᓂᓯᐅᕈᑎᖃᕐᓂᖓᑦ ᑲᔪᓯᑎᑦᓯᓂᕐᒥᓂᒃ ᑲᑐᑦᔨᔪᓂᒃ ᐊᑕᐅᑦᓯᑯᑦ ᑕᑯᓂᐊᑲᑦᑕᑎᓂᒃ ᒪᓐᑐᔨᐊᓪᒥ
ᒪᓐᑐᔨᐊᓪ, ᓯᑉᑎᒻᐱᕆ 23, 2024 – ᐋᓓᓐ ᕓᓛᓐᑰ, ᑲᒪᔨ ᐃᓄᓕᒫᑦ ᓴᑑᒪᓂᖓᓂᒃ ᐳᕐᑐᓂᕐᓴᓂ ᑲᑎᒪᔨᓂ ᒪᓐᑐᔨᐊᓪ ᐃᓪᓗᒐᓴᓕᖓᓄᑦ, ᔮᓐ-ᐱᐊ ᓚᕉᔅ, ᐊᖓᔪᕐᖄᖅ ᓄᓇᕕᒻᒥ ᐳᓖᓯᒃᑯᑦ ᐱᒍᑦᔨᔨᖏᓐᓄᑦ (NPS), ᒧᖄᒪᑦ ᐊᓰᔅ ᐴᑎᑦ, ᑭᓪᓕᓯᓂᐊᕐᑎᒪᕆᒃ ᐊᒻᒪᓗ ᐊᖓᔪᕐᖄᖅ ᐱᒍᑦᔨᔨᓄᑦ ᓄᓇᖓᑕ ᓂᐱᕝᕕᐊᒍᑦ ᐱᒍᑦᔨᓂᕐᒥᒃ ᐱᓇᓱᕝᕕᒥ ᖃᓂᑦᑐᒥᐅᓂᒃ ᐳᓖᓯᒃᑯᑦ ᐱᒍᑦᔨᔨᖏᓐᓄᑦ ᒪᓐᑐᔨᐊᓪ ᐃᓪᓗᒐᓴᓕᖓᓂ (SPVM), ᐊᒻᒪᓗ ᕿᓪᑕ ᓯᓅᐹᓪ, ᐃᑦᓯᕙᐅᑕᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ (KRG), ᐅᓪᓗᒥ ᐅᓐᓂᓯᐅᕈᑎᖃᙯᓐᓇᑐᑦ ᑲᔪᓯᑎᑦᓯᓂᕐᒥᓂᒃ ᑲᑐᑦᔨᔪᑦ ᐳᓖᓰᑦ ᐊᑕᐅᑦᓯᑯᑦ ᑕᑯᓂᐊᑲᑦᑕᐅᑎᖏᓐᓂᒃ ᒪᓐᑐᔨᐊᓪ ᓄᓇᖓᓂ. ᑕᒪᓐᓇ ᐱᓇᓱᓐᓂᖓᑦ ᐁᑉᐸᕇᑦᑎᓯᑦᓱᓂ SPVM-ᑯᑦ ᐊᒻᒪᓗ NPS-ᑯᑦ ᐳᓖᓯᖏᓐᓂᒃ ᓄᓇᕕᒻᒥ ᐱᓇᓱᕙᓪᓗᓲᓂᒃ. ᑐᕌᖓᔪᖅ ᓂᑲᓀᓪᓕᑎᕆᓂᕐᒧᑦ ᐃᓄᐃᑦ ᓄᓇᓯᒪᔪᑦ ᐅᕝᕙᓗᓘᓐᓃᑦ ᑎᑭᓯᒪᔪᑦ ᒪᓐᑐᔨᐊᓪᒥ ᐃᑉᐱᒍᓱᓐᓂᖓᓂᒃ ᐊᑦᑕᓇᕐᑐᒦᖕᖏᓂᕐᒥᒃ ᐊᒻᒪᓗ ᓴᑑᒪᑦᓯᐊᓂᕐᒥᒃ. ᑖᓐᓇ ᐱᒋᐊᕐᑎᑕᐅᔪᖅ ᑌᒣᓘᕆᐅᕈᑕᐅᕗᖅ ᑕᒪᖏᓐᓄᑦ ᐳᓖᓯᓄᑦ.
ᓇᓪᓕᐅᑎᖃᑦᑕᓚᐅᔪᔪᑦ ᑕᕐᖀᑦ ᐊᒥᓱᒐᓚᐅᓕᕐᑐᑦ ᑭᖑᓂᕐᒥ ᓄᓇᕕᐅᑉ ᐃᓗᐊᓂ, ᑯᐯᒃ ᑕᕐᕋᖓᓂ, ᓱᕐᕃᓯᒪᕗᑦ ᓴᑑᒪᓂᖓᓂᒃ ᐃᓄᐃᑦ ᓄᓇᓯᒪᔪᑦ ᐅᕝᕙᓗᓘᓐᓃᑦ ᑎᑭᓯᒪᔪᑦ ᒪᓐᑐᔨᐊᓪᒥ. ᑌᒣᓕᖓᔪᒥᒃ ᑲᒪᒋᐊᖃᓕᕋᒥᒃ, ᐱᓇᓱᖃᑎᖃᓯᑦᓱᑎᒃ ᒪᓐᑐᔨᐊᓪ ᐃᓪᓗᒐᓴᓕᖓᓂᒃ, KRG-ᑯᓂᒃ ᐊᒻᒪᓗ ᐃᓄᐃᑦ ᓄᓇᓕᖏᓐᓂ ᑎᒥᐅᔪᓂᒃ, SPVM-ᑯᑦ ᐊᒻᒪᓗ NPS-ᑯᑦ ᑐᑭᒧᐊᑦᑎᓯᓕᕐᑐᑦ ᓱᒋᐊᕈᑎᓂᒃ ᓴᑑᒪᓂᕐᒥᒃ ᐱᒋᐊᓪᓚᑎᑦᓯᓂᐊᕋᒥᒃ. ᐃᓚᐅᑎᓪᓗᒍ ᑲᑐᑦᔨᓱᑎᒃ ᓂᒫᓪᓚᕈᑎᖓᓄᑦ, ᐳᓖᓰᑦ ᑕᒪᖏᓐᓂᒃ ᐱᒍᑦᔨᔨᓂᒃ ᐱᓯᒪᔪᑦ ᑲᑎᓯᖃᑦᑕᓚᖓᔪᑦ ᐃᓄᓐᓂᒃ ᐊᑦᔨᒌᖕᖏᑐᓂ ᐃᓪᓗᒐᓴᓕᐅᑉ ᓄᓇᓕᖏᓐᓂ.
ᑲᔪᓯᑎᑦᓯᓂᖅ ᑲᑐᑦᔨᔪᑦ ᑕᑯᓂᐊᑲᑦᑕᐅᑎᖏᓐᓂᒃ
ᓯᑉᑎᒻᐱᕆ 23 ᐊᒻᒪᓗ 30 ᐱᓇᓱᐊᕈᓯᖏᓐᓂ, ᐅᓪᓗᓂ ᓯᑕᒪᓂ ᐱᓇᓱᐊᕈᓯᕐᒥ ᑕᒫᑦ, SPVM-ᑯᑦ ᐳᓖᓯᖏᑦ, ᐱᓗᐊᕐᑐᒥᒃ ᐱᓯᒪᔪᑦ ᓄᓇᓕᓐᓂᒃ ᐳᓖᓯᒃᑯᑦ ᐱᓇᓱᕝᕕᖏᓐᓂᒃ (PDQ) 5, 12 ᐊᒻᒪᓗ 38,ᐊᒻᒪᓗ NPS-ᑯᑦ ᑕᑯᓂᐊᑲᑦᑕᓛᕐᑐᑦ ᑕᒪᖏᑎᒍᑦ ᐱᓱᓪᓗᑎᒃ ᐊᒻᒪᓗ ᓄᓇᒃᑰᔫᒃᑯᑦ ᑕᑯᓂᐊᕋᓕᓪᓗᑎᒃ ᒪᑯᐊ ᓄᓇᖏᓐᓂ:
• ᐃᓪᓗᒐᓴᓕᐅᑉ ᕿᑎᖓ - ᕕᓪ-ᒪᕇ ᓯᕿᓂᐅᑉ ᓄᐃᕕᐊᒍᑦ (Centre-ville – Ville-Marie Est)
• ᕕᓪ-ᒪᕇ ᓂᐱᕝᕕᐊᒍᑦ, ᕕᐊᔅᑦᒪᐅᓐᑦ (Ville-Marie Ouest, Westmount)
• ᒫᓐᑦ-ᕈᐃᔮᓪ ᓴᕐᖃᑐᓂᖓ (Plateau Mont-Royal)
• ᑐᐊᕚᓪ (Dorval)
ᑕᒪᑐᒪ ᐱᓇᓱᑦᑕᐅᓂᖓᑎᒍᑦ, ᑖᒃᑯᐊ ᒪᕐᕈᐃᑦ ᐳᓖᓰᑦ ᑲᔪᖏᕐᓭᒍᑎᖃᓚᖓᔪᑦ ᐅᖃᐅᑦᔫᑎᖃᑦᑕᓂᕐᒥᒃ, ᑐᑦᔫᒥᑎᑦᓯᒋᐊᕐᓗᑎᓪᓗ ᐃᓄᓐᓂᒃ ᓄᓇᓯᒪᔪᓂᒃ, ᐊᒻᒪᓗ ᑲᔪᖏᕐᓭᒥᓗᑎᒃ ᐱᓂᕐᓗᑕᐅᓯᒪᔪᑦ ᐊᒻᒪᓗ ᑕᑯᓐᓇᓯᒪᔪᑦ ᐅᖃᕐᐸᓂᖓᓂᒃ ᖃᓄᑐᐃᓐᓇᖅ ᓈᒻᒪᖏᑦᑐᒥᒃ ᐃᓱᐃᑦᑐᒨᕆᔪᒥᒃ ᓇᒻᒥᓂᖅ ᐊᓯᖏᑕᓗ ᐊᑦᑕᓇᕐᑐᒦᖕᖏᓂᖓᓂᒃ.
ᖃᓄᖅ ᐳᓖᓯᒃᑯᑦ ᐅᖃᕐᕕᓴᐅᓂᖓ
ᓯᕘᕋᑎᑦᓯᔪᖃᕐᐸᑦ, ᑲᑉᐱᐊᓇᕿᔪᖃᕐᐸᑦ, ᐱᓗᑲᑦᑐᖃᕐᐸᑦ ᐅᕝᕙᓗᓘᓐᓃᑦ ᐅᖃᓚᖓᓗᑎᑦ ᖃᓄᑐᐃᓐᓇᖅ ᐃᓱᒫᓗᓐᓇᑐᒥᒃ, ᐱᒻᒪᕆᐅᕗᖅ ᐳᓖᓯᒃᑯᑦ ᖃᐅᔨᑎᓪᓗᒋᑦ.
ᒪᓐᑐᔨᐊᓪᒥ
• ᐅᐃᒪᓇᕐᑐᖃᕐᐸᑦ ᐅᖃᓕᒪᓗᑎᑦ 911-ᒧᑦ.
• ᐅᐃᒪᓇᖕᖏᐸᑦ, ᐅᖃᓕᒪᓗᑎᑦ ᓇᔪᕐᑕᓯᓐᓂ ᐳᓖᓯᒃᑯᑦ ᐱᓇᓱᕝᕕᖓᓄᑦ (PDQ) ᒪᓐᑐᔨᐊᓪᒥ ᑐᕃᓐᓇᓗᒋᑦ ᐅᖃᓕᒪᓗᑎᑦ ᐅᕗᖓ 514-280-01XX (XX ᐊᑦᔨᐅᕗᖅ PDQ-ᖓᑕ ᑭᓯᑦᓯᑎᖓᓄᑦ). PDQ ᐊᑐᕆᐊᓕᓯ ᓇᓪᓕᐊᖑᒻᒪᖔᑦ ᖃᐅᔨᓚᖓᓗᒍ, ᑕᑯᓗᑎᑦ SPVM-ᑯᓐᓂᒃ ᐅᕙᓂ: spvm.qc.ca/fr/pdq.
• ᐱᕕᖃᕐᒥᔪᖅ ᐅᖃᓕᒪᓗᓂ ᖃᐅᔨᑎᑦᓯᕕᒻᒧᑦ-ᐱᓂᕐᓗᕈᑎᓂᒃ ᒪᓐᑐᔨᐊᓪᒥ (Info-Crime Montreal) ᑭᓇᐅᓂᕐᓂᒃ ᐅᖃᕈᓐᓀᓗᑎᑦ ᐊᒻᒪᓗ ᐅᖃᕐᑕᐅᓂᐊᕈᓐᓀᓗᑎᑦ ᐅᕗᖓ 514-393-1133 ᐅᕝᕙᓘᓐᓃᑦ ᐊᑐᑐᐃᓐᓇᓗᓂ ᖃᐅᔨᑎᑦᓯᒍᑎᐅᑉ ᐊᓪᓚᕕᑦᓴᔭᖓᓂᒃ ᖃᕆᑕᐅᔭᓄᑦ ᐱᑐᕝᕕᒥ ᐅᕙᓂ infocrimemontreal.ca.
ᓄᓇᕕᒻᒥ
- ᑭᓇᐅᓂᕐᒥᒃ ᐅᖃᕈᓐᓀᓗᓂ ᑐᓴᕐᑎᓯᒍᑎᓄᑦ, ᐅᖃᓕᒪᓗᑎᑦ ᐱᓂᕐᓗᑐᓂᒃ ᓄᕐᖃᑎᑦᓯᔨᓄᑦ (Crime Stoppers) ᐅᕙᓂ 1-800-711-1800 ᐅᕝᕙᓗᓘᓐᓃᑦ ᐊᑐᕐᓗᑎᑦ ᖃᕆᑕᐅᔭᓄᑦ ᐱᑐᕝᕕᑯᑦ ᖃᐅᔨᑎᑦᓯᒍᑎᓂᒃ ᐊᓪᓚᕕᑦᓴᒥᒃ ᐅᕙᓂ echecaucrime.com.
- ᑐᓂᔨᓚᖓᓗᑎᑦ ᑐᓴᕐᑕᐅᒋᐊᖃᖕᖏᑐᓂᒃ ᖃᐅᔨᒪᒍᑎᓂᒃ ᐱᑦᔪᑎᖃᕐᑎᓗᒋᑦ ᐃᒥᐊᓗᐃᑦ ᐅᕝᕙᓗᓘᓐᓃᑦ ᐋᖓᔮᓐᓇᑐᐃᑦ ᑎᕐᓕᒥ ᐊᐅᓚᑕᐅᓂᖏᓐᓂᒃ, ᐅᖃᐅᓯᑦᓴᑎᑦ ᑎᑭᑎᓗᒋᑦ ᐅᕗᖓ tips@nunavikpolice.ca.
ᐅᖃᕐᑕᐅᑫᓐᓇᑐᑦ:
"ᒪᓐᑐᔨᐊᓪ ᐃᓪᓗᒐᓴᓕᖓ ᓇᑯᕐᓴᐳᖅ ᐱᓇᓱᐊᕈᑎᒥᒃ ᐳᓖᓯᒃᑯᑦ ᐱᒍᑦᔨᔨᖏᑕ ᒪᓐᑐᔨᐊᓪ ᐃᓪᓗᒐᓴᓕᖓᓂ ᐊᒻᒪᓗ ᓄᓇᕕᒻᒥ ᐳᓖᓯᒃᑯᑦ ᐱᒍᑦᔨᔨᖏᑕ ᑲᔪᓯᑎᓚᖓᔭᖓᓂᒃ ᒪᓐᑐᔨᐊᓪᒥ, ᐱᓇᓱᖃᑎᖃᕐᓗᑎᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ. ᑕᒪᓐᓇ ᐃᓱᐊᕐᓈᐳᖅ ᐱᓇᓱᖃᑎᖃᑦᓯᐊᕈᒪᓂᑦᑎᓄᑦ ᐃᓪᓗᒐᓴᓖᑦ ᐊᒻᒪᓗ ᓄᓇᖃᕐᖄᓯᒪᔪᑦ ᑲᕙᒪᖏᓐᓂ ᐱᓇᓱᖃᑎᑦᑎᓂᒃ ᐱᕙᓪᓕᐊᑎᑦᓯᓂᐊᕋᑦᑕ ᐱᓂᐊᕐᓂᖃᕈᑎᓂᒃ, ᐊᑐᓕᕐᑎᓯᓗᑕᓗ ᒪᓕᒐᕐᓂᒃ ᐊᒻᒪᓗ ᒪᓂᔨᓂᐊᕋᑦᑕ ᐱᒍᑦᔨᒍᑎᓂᒃ ᐋᕐᕿᓯᒪᑦᓯᐊᑐᓂᒃ ᓄᓇᖃᕐᖄᓯᒪᔪᑦ ᑭᖕᖒᒪᑦᓯᐅᑎᖏᓐᓄᑦ ᒪᓐᑐᔨᐊᓪᒥ.”
ᐋᓓᓐ ᕚᓓᓐᑰ
ᑲᒪᔨ ᐃᓄᓕᒫᑦ ᓴᑑᒪᓂᖓᓂᒃ ᐳᕐᑐᓂᕐᓴᓂ ᑲᑎᒪᔨᓂ ᒪᓐᑐᔨᐊᓪ ᐃᓪᓗᒐᓴᓕᖓᓂ
"ᑖᓐᓇ ᐆᑦᑐᕋᕐᑕᐅᓯᔪᖅ ᓯᕗᓪᓕᐸᐅᕗᖅ ᑌᓘᕐᓂᒐᓚᓐᓄᑦ. ᓇᑯᕐᓴᒪᕆᑉᐳᖓ ᓄᓇᕕᒻᒥ ᐳᓖᓰᑦ ᐱᒍᑦᔨᔨᖏᓐᓂᒃ ᐊᒻᒪᓗ ᐳᓖᓯᒃᑯᑦ ᐱᒍᑦᔨᔨᖏᓐᓂᒃ ᒪᓐᑐᔨᐊᓪ ᐃᓪᓗᒐᓴᓕᖓᓂ ᓯᕗᓂᖃᕐᓂᖓᓄᑦ ᓴᐳᒻᒥᓯᐊᕐᓂᓴᐅᓚᖓᓗᑎᒃ ᖃᓄᐃᖕᖏᓂᖓᓂᒃ ᐊᒻᒪᓗ ᐊᑦᑕᓇᖕᖏᓂᖓᓂᒃ ᒪᓂᒍᓐᓇᓂᖏᑦᑕ ᐃᓚᐅᔪᑦ ᒪᓐᑐᔨᐊᓪᒥᐅᓄᑦ ᐃᓄᓐᓄᑦ ᐊᒻᒪᓗ ᓄᓇᕕᒻᒥᐅᓄᑦ (ᐃᓄᐃᑦ ᓄᓇᕕᐅᑉ ᐃᓄᖏᓐᓄᑦ ᐃᓚᐅᔪᑦ) ᑎᑭᓲᓄᑦ ᒪᓐᑐᔨᐊᓪᒧᑦ ᐊᒥᓱᓂᒃ ᐱᒻᒪᕆᐅᑎᓂᒃ ᐱᑦᔪᑎᖃᕐᐸᓱᑎᒃ. ᒪᓐᑐᔨᐊᓪ ᐊᑐᕐᑐᒪᕆᐅᕗᖅ ᑎᑭᑦᑕᕕᐅᑦᓱᓂ ᓄᓇᕕᒻᒥᐅᓄᑦ. ᑖᒃᑯᐊ ᐋᕐᕿᑕᐅᔪᑦ ᐳᓖᓯᒃᑯᓄᑦ ᐃᓱᒫᓗᐃᕐᓇᖁᓇᓚᖓᔪᑦ ᓇᔭᑦᑎᓄᑦ ᐊᓂᑦᑎᓄᓪᓗ ᐃᑉᐱᒍᓱᒋᐊᑦᑕ ᐊᓱᐃᓛᒃ ᐊᑦᑕᓇᕐᑐᒦᒋᐊᖃᖕᖏᓂᖓᓂᒃ, ᐊᒻᒪᓗ ᐊᑐᓚᖓᒋᐊᑦᑕ ᐱᔪᓐᓇᑕᓕᒫᑦᑎᓂᒃ ᐱᐅᓕᒪᑦᓯᓗᑕ ᐱᔪᓐᓇᓂᖓᓂᒃ ᑲᔪᓯᑎᑦᓯᓂᕐᒥᒃ ᐃᓅᑦᔪᑎᑦᓴᓂᒃ ᐱᓇᓱᐊᕈᑎᒥᓂᒃ ᑲᑉᐱᐊᓱᒍᓐᓀᓗᑎᒃ ᐊᒻᒪᓗ ᐃᓱᒫᓗᒍᓐᓀᓗᑎᒃ.”
ᕿᓪᑕ ᓯᓅᐹᓪ
ᐃᑦᓯᕙᐅᑕᖅ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂ
"ᐊᐅᓚᑦᔭᕈᑎᖓ ᓄᓇᕕᒻᒥ ᐳᓖᓯᒃᑯᑦ ᐱᒍᑦᔨᔨᖏᑕ ᐊᒻᒪᓗ ᐳᓖᓯᒃᑯᑦ ᐱᒍᑦᔨᔨᖏᑕ ᒪᓐᑐᔨᐊᓪ ᐃᓪᓗᒐᓴᓕᖓᓂ ᐃᓚᖃᓚᖓᔪᖅ ᐊᑕᐅᑦᓯᑯᑦ ᑕᑯᓂᐊᑲᑦᑕᓂᖏᓐᓂᒃ ᓯᓚᕐᖃᑎᒌᓄᑦ ᓄᓇᓕᓐᓂ ᐃᓄᐃᑦ ᓇᔪᓲᖏᓐᓂ, ᐁᑦᑐᑑᑎᓂᕐᒥᓗ ᓇᓗᓀᕐᓯᓯᐊᕐᑐᓂᒃ ᖃᐅᔨᒪᒍᑎᓂᒃ ᐱᓗᑲᑦᑐᑦ ᓱᓂᖏᓐᓂᒃ ᐊᒻᒪᓗ ᑐᓂᔨᓂᕐᒥᒃ ᐱᓂᕐᓗᑕᐅᓂᐊᖕᖏᒪᑕ ᐃᓱᒪᓕᐅᕐᓂᒍᑎᓂᒃ ᐃᓄᐃᑦ ᐃᓚᖏᓐᓄᑦ ᐱᑦᔪᑎᖃᕐᓗᒋᑦ, ᐊᓯᖃᕐᒥᑎᓪᓗᒍ, ᖃᓄᖅ ᐅᖃᕐᑐᓴᐅᓂᕐᒥᒃ ᑲᑉᐱᐊᓇᕿᔪᓂᒃ ᐊᒻᒪᓗ ᐸᕝᕕᓇᕿᔪᓂᒃ ᐊᖓᔪᕐᖄᓄᑦ ᓇᐅᑐᐃᓐᓀᑦ ᖃᐅᔨᒍᓐᓀᑎᓪᓗᒋᑦ. ᑕᒪᒃᑯᐊ ᐋᕐᕿᑕᐅᔪᑦ ᑐᕌᖓᕗᑦ ᓴᑐᕐᔫᒥᑎᑦᓯᓂᕐᒧᑦ ᒪᓐᑐᔨᐊᓪᒥ ᓄᓇᓯᒪᔪᓂᒃ ᐃᓄᓐᓂᒃ ᐊᒻᒪᓗ ᑕᐅᓴᓐᑎᓕᕐᕿᑖᓂᒃ ᓄᓇᕕᒻᒥᐅᓂᒃ ᐃᓪᓗᒐᓴᓕᒻᒥ ᐃᓐᓂᐊᓯᒪᓲᓂᒃ ᐊᕐᕌᒍᑕᒫᑦ, ᑕᑯᑎᓗᒋᑦ ᐊᑦᑕᓇᕐᑐᒦᖕᖏᓂᖓᑕ ᐊᒻᒪᓗ ᖃᓄᐃᖕᖏᓂᖓᑕ ᑯᒻᒪᓇᕐᑐᖁᑕᐅᓂᐊᓂᒃ.”
ᔮᓐ-ᐱᐊ ᓚᕉᔅ ᐊᖓᔪᕐᖄᖅ ᐳᓖᓯᓄᑦ,
ᓄᓇᕕᒻᒥ ᐳᓖᓯᒃᑯᑦ ᐱᒍᑦᔨᔨᖏᓐᓂ
"SPVM-ᑯᑦ ᐊᒻᒪᓗ ᓄᓇᕕᒻᒥ ᐳᓖᓰᑦ ᐱᒍᑦᔨᔨᖏᑦ ᐊᑎᓕᐅᕐᕕᖃᓯᒪᕗᑦ ᐱᓇᓱᖃᑎᒌᓐᓂᒧᑦ ᐊᖏᖃᑎᒌᒍᑎᒥᒃ 2019-ᒥ. ᐊᕐᕌᒍᐃᑦ ᓯᕗᒧᐊᕐᓂᖓᓂ, SPVM-ᑯᑦ ᐊᒻᒪᓗ NPS-ᑯᑦ ᐃᑲᔪᕐᑎᒌᓐᓂᖓᑦ ᓱᑌᔭᓕᕐᐸᓕᐊᓯᒪᔪᖅ, ᐱᓗᐊᕐᑐᒥᒃ ᐊᑦᑐᐊᓱᓂ ᑭᓪᓕᓯᓂᐊᕈᑎᓄᑦ ᐃᓄᐃᑦ ᐊᓯᐅᒪᔪᑦ ᐱᑦᔪᑕᐅᕙᑦᑎᓗᒋᑦ. ᑕᒪᓐᓇ ᐃᓚᐅᑦᓴᖑᐊᕐᑐᖅ SPVM-ᑯᑦ ᓇᓂᓯᖃᑦᑕᓯᒪᓂᖓᓄᑦ ᓄᓇᖃᕐᖄᓯᒪᔪᓂᒃ ᐊᕐᓇᓂᒃ ᐊᓯᐅᒋᐊᖏᑦ ᐅᖃᕐᑕᐅᖃᑦᑕᓯᒪᔪᓂᒃ 2019-ᒥᒃ 2023-ᒧᑦ (360 ᑲᑎᑦᓱᒋᑦ), ᐊᑕᐅᓯᖅ ᑖᒃᑯᐊ ᐃᓚᖓᑦ ᓇᕝᕚᑕᐅᖕᖏᑐᑑᑎᓪᓗᒍ. ᖃᐅᔨᒍᑎᑦᓴᓂᒃ ᕿᓂᕐᓂᖅ ᑲᔪᓯᖏᓐᓇᑐᖅ ᑖᓐᓇ ᐃᓄᒃ ᓇᕝᕚᑕᐅᖁᓗᒍ. ᑲᑐᑦᔨᓗᑎᒃ ᐊᑕᐅᑦᓯᑯᑦ ᑕᑯᓂᐊᑲᑦᑕᓂᖏᑦ SPVM-ᑯᑦ ᐊᒻᒪᓗ NPS-ᑯᑦ ᓄᐃᑦᓯᕗᑦ ᖃᓄᑎᒋᒃ ᑕᒪᓐᓇ ᐱᓇᓱᖃᑎᒌᓐᓂᕗᑦ ᐱᕈᕐᓯᒪᓕᕐᒪᖔᑦ, ᐊᒻᒪᓗ ᖃᐅᔨᒪᒍᑎᓂᒃ ᐁᑦᑐᑑᑎᓂᐅᑉ ᐱᒋᐊᓪᓚᓯᒪᓂᖓᓂᒃ.”
ᒧᖄᒪᑦ ᐊᓰᔅ ᐴᑎᑦ
ᑭᓪᓕᓯᓂᐊᕐᑎᒪᕆᒃ, ᐊᖓᔪᕐᖄᖅ ᐱᒍᑦᔨᔨᓂ ᓂᐱᕝᕕᐊᒍᑦ ᓄᓇᖓᓂ, ᐱᒍᑦᔨᒍᑎᓂᒃ ᐱᓇᓱᕝᕕᒥ ᖃᓂᑦᑐᒥᐅᓂᒃ
ᐳᓖᓯᒃᑯᑦ ᐱᒍᑦᔨᔨᖏᓐᓄᑦ ᒪᓐᑐᔨᐊᓪ ᐃᓪᓗᒐᓴᓕᖓᓂ