ᐅᐱᕐᖔᖅ/ᐅᐱᕐᖓᓴᒃ 2020: ᐱᖏᓐᓇᕈᓐᓀᓗᓯ ᓄᓇᓕᐊᕐᓯᒪᖃᑦᑕᕆᑦᓯ ᐊᓕᐊᓇᕐᑐᒥ!
ᐸᕐᓀᐱᑦ ᒪᙯᓚᖓᑦᓱᑎᑦ ᐃᖃᓗᑦᓯᐅᓗᑎᓘᓐᓃᑦ? ᒍᕕᑦ, ᐊᑦᑕᓀᑦᑐᒦᒍᑎᑦᓴᑎᑦ ᐸᕐᓀᓕᕈᕕᒃ ᐃᓚᐅᑎᓚᖓᕙᑎᑦ!
ᓯᓚᒦᓚᖓᑦᓱᓂ, ᓯᖏᑦᓴᐅᔭᖏᑦᑐᑦ ᓱᖏᐅᓐᓂᖃᑦᓯᐊᓃ ᓄᓇᒥᒃ ᐊᒻᒪᓗ ᑐᑭᑖᕐᓯᒪᑦᓯᐊᓃᑦ. ᑭᓯᐊᓂ, ᐊᑦᑕᓀᑦᑐᒦᒍᑎᑦᓭᑦ ᐸᕐᓀᓯᒪᒻᒥᒍᕕᒃᑭᑦ ᐃᑲᔪᕐᓯᒍᓐᓇᑐᑦ ᐊᑦᑕᓇᕐᑐᒦᖕᖏᑑᓚᕿᐅᑎᒋᔭᑎᓐᓂ ᓄᓇᓕᐊᕐᓯᒪᓕᕈᕕᑦ. ᓯᓚᐅᑉ ᐊᓯᑦᔨᑕᕐᓂᖓ ᐊᒻᒪᓗ ᐊᕐᖁᑏᑦ ᓱᒃᑯᐸᓪᓕᐊᓂᖏᑦ, ᖃᒧᑎᑲᓪᓓᓕᓂᖅ ᐅᕝᕙᓘᓐᓃᑦ ᖃᓂᒻᒪᓂᖅ ᐋᓐᓂᓂᕐᓘᓃᑦ, ᓱᒃᑯᐊᕿᓂᖅ ᐊᒻᒪᓗ ᐸᕐᓀᓯᐊᕐᓯᒪᓐᓂᖏᓐᓂᖅ ᓄᓇᒥ ᐊᐅᓚᔪᓄᑦ ᐃᓱᐃᓪᓕᒪᕆᐅᑕᐅᒍᓐᓇᓲᑦ ᐊᑦᑕᓇᕐᑐᒦᓚᕿᐅᑕᐅᑦᓱᑎᒃ. ᐳᐃᒍᕐᑌᓕᕙᓐᓂᐊᖁᓯ ᐊᓪᓛᐱᖁᑎᓯᓐᓂᒃ ᑐ, ᐊ, ᐅ, ᐊᒻᒪᓗ ᐃ: ᑐᓴᐅᒪᑎᓗᒋᑦ ᐃᓚᑎᑦ ᓇᒧᖕᖓᓂᐊᕐᒪᖔᑉᐱᑦ ᐊᒻᒪᓗ ᖃᖓ ᐅᑎᕐᕕᓴᖃᕐᒪᖔᑉᐱᑦ. ᐊᒥᓱᑦ ᒪᙯᑦᑐᑦ ᐃᖃᓗᑦᓯᐅᑐᓪᓗ ᓄᓇᓕᐊᓚᖓᓕᕋᒥᒃ ᐊᑦᑕᓀᑦᑐᒦᒐᓱᐊᓲᑦ, ᐸᕐᓀᓯᐊᕐᓱᑎᒃ ᑭᖕᖒᒪᓇᕐᓯᒍᓐᓇᑐᓂᒃ ᐊᒻᒪᓗ ᓯᓚ ᖃᓄᐃᓚᖓᒻᒪᖔᑦ ᖃᐅᔨᒪᒐᓱᐊᑦᓯᐊᓱᑎᒃ. ᑭᓯᐊᓂ, ᐊᐅᓪᓚᓚᖓᔪᑦ ᐃᓚᖏᑦ ᐅᐃᒪᑑᒍᓗᐊᓲᑦ. ᐅᖃᐅᑎᓯᒪᒍᕕᒃᑭᑦ ᐃᓚᑎᑦ ᐊᒻᒪᓗ ᐃᓚᓐᓈᑎᑦ ᓇᒧᖕᖓᓂᐊᕐᒪᖔᑉᐱᑦ ᐊᒻᒪᓗ ᖃᖓ ᐅᑎᕈᓇᐅᒻᒪᖔᑉᐱᑦ ᐊᓯᐅᒍᕕᑦ ᐅᕝᕙᓘᓐᓃᑦ ᐋᓐᓂᕈᕕᑦ ᑕᑯᔭᐅᑲᐱᓐᓂᓴᐅᑎᑦᓯᒍᓐᓇᑐᖅ. ᐊᑐᐃᓐᓇᓯᐊᒍᒋᑦ 72-ᓂ ᐃᑲᐅᕐᓂᓂ ᐱᖏᓐᓇᓯᓚᖓᒍᓐᓀᓗᑎᑦ! ᐊᑦᔭᓗᒋᑦ ᐱᐅᒃᑯᑏᑦ ᐃᑎᕐᓯᒪᕕᑦᓴᖃᕐᓗᑎᑦ, ᐅᕐᓱᓴᒋᐊᓪᓚᓂᓗ, ᓴᓇᕐᕈᑎᓂᓗ ᐊᒻᒪᓗ ᐃᓚᑦᓴᓂᒃ, ᐊᑦᓱᓈᒥᒃ, ᐋᓐᓂᑐᑦ ᐊᑐᕋᑦᓴᖏᑦ, ᐊᓐᓄᕌᑦ ᐸᓂᕐᑐᐃᑦ, ᑕᖁᐊᑦ, ᐊᓯᖏᓪᓗ. ᐅᑎᕐᕋᓚᖓᒐᓗᐊᕈᕕᑦ, ᓯᕗᓂᖅ ᖃᐅᔨᒪᑦᓴᐅᖏᑦᑐᖅ ᐊᒻᒪᓗ ᑕᑯᔭᐅᓇᓵᓂᐊᕐᒪᖔᑉᐱᓘᓐᓃᑦ ᕿᓂᕐᑕᐅᓕᕈᕕᑦ. ᐆᑦᑑᑎᒃ, ᓯᓚᕐᓂᓗᒻᒪᑦ ᕿᓂᕆᐊᕐᑐᑦ ᓄᕐᖃᖓᒋᐊᖃᓲᑦ. ᐸᕐᓀᓯᒪᕙᒋᐊᖃᕐᑐᑎᑦ 72-ᓂ ᐃᑲᐅᕐᓂᓂ ᐊᐅᓪᓚᓯᒪᓚᖓᔪᕐᑎᑐᑦ ᐊᑐᕋᑦᓴᖃᑦᓯᐊᓗᑎᑦ. ᐅᖄᒍᑎᒃ: ᐊᐅᓪᓚᓚᖓᒍᕕᑦ, ᐆᕚᕈᑎᒡᒋᓗᑎᑦ, ᖁᒻᒧᐊᑎᑕᐅᓯᒪᔪᒃᑰᑐᒥᓪᓘᓃᑦ ᐅᖄᒍᑎᒥᒃ ᐅᕝᕙᓘᓐᓃᑦ ᓇᓂᔭᐅᒍᑎᒥᒃ ᓇᔪᕐᑎᖃᕐᓗᑎᑦ. ᑖᒃᑯᐊ ᐱᐅᒃᑯᑏᑦ ᑐᓴᕐᑎᓯᐅᑎᒋᒍᓐᓇᑕᑎᑦ ᐊᖓᔪᕐᖄᑦ ᑐᓴᕐᑎᒍᓐᓇᓯᐊᕐᓗᒋᑦ ᓱᒻᒪᖔᕐᐱᑦ. ᐃᑲᔪᕐᑕᐅᒍᒪᓗᑎᑦ ᑐᓴᕐᑕᐅᑎᒍᕕᑦ ᕿᓂᕆᐊᕐᑐᑦ ᐃᖏᕐᕋᓯᑲᐱᒍᓐᓇᓂᕐᓴᐅᒐᔭᕐᒪᑕ. ᐃᓄᑑᓗᑎᑦ ᐊᐅᓪᓚᓴᕐᐸᓇᒃ. ᐊᑕᐅᓰᒍᒐᓂ ᖃᒧᑎᑲᓪᓚᑐᒋᐊᓪᓚᒧᑦ ᒪᓕᑦᑕᐅᒍᕕᑦ ᖃᒧᑎᑲᓪᓓᑦ ᓯᖁᒥᑉᐸᑦ ᐅᓯᓕᕐᑕᐅᒍᓐᓇᕋᔭᕐᑐᑎᑦ ᐃᓕᓐᓂᒃ ᒪᓕᑦᑐᒧᑦ. ᐅᐃᒪᓇᕐᓯᒍᕕᑦ ᓄᓇᓕᓕᐊᕈᓐᓇᓯᑲᐱᒐᔭᕐᑐᑎᑦ ᐃᓄᑑᖕᖏᑯᕕᑦ. ᖃᓄᐃᓕᖕᖓᕈᕕᑦ, ᐅᐃᒪᔮᕈᓐᓀᓗᑎᑦ ᓄᕐᖃᓗᑎᑦ! ᓄᕐᖃᓗᑎᑦ ᐃᓱᒪᒐᓱᐊᑦᓯᐊᓯᓗᑎᑦ ᖃᓄᐃᓕᖓᓂᕐᓃᕕᑦ. ᐃᓱᒪᒋᓗᒋᑦ ᐊᑐᕈᓐᓇᑕᑎᑦ ᐊᒻᒪᓗ ᐱᐅᒃᑯᑏᑦ ᐅᓯᔭᑎᑦ. ᕿᒥᕐᕈᓗᑎᑦ ᐃᓘᓐᓀᓂᒃ ᐱᔭᕐᓃᑐᒦᒍᑎᓐᓃᕕᑦ ᐊᒻᒪᓗ ᐱᖏᓐᓇᐅᑎᓐᓃᕕᑦ. ᐸᕐᓀᓯᓗᑎᑦ ᐊᑦᑕᓀᑦᑐᒦᒍᑎᒋᓂᐊᕐᑕᓃᕕᑦ ᐃᓅᒐᓱᐊᕈᑎᒋᓗᒋᑦ ᐊᒻᒪᓗ ᐱᐅᒃᑯᑎᓐᓃᕕᑦ ᕿᒣᒍᓐᓀᓗᑎᑦ.