ᑲᑎᕕᐅᑉ ᐳᓖᓯᖏᑦ ᑭᒡᒐᑐᕐᑐᑦ ᐊᒻᒪᓗ ᐅᖑᒪᑦᓯᔪᑦ ᓄᓇᕕᐅᑉ ᓄᓇᓕᖏᓐᓂᒃ
ᑲᑎᕕᐅᑉ ᐳᓖᓯᖏᑦ ᐱᓇᓱᒐᐅᒋᐊᓕᓐᓂᒃ ᐱᓇᓱᒐᓖᑦ ᓄᓇᕕᒻᒥ ᓄᓇᓕᓐᓂ ᑭᒡᒐᑐᕐᓱᒋᑦ ᐊᒻᒪᓗ ᐅᖑᒪᑦᓱᒋᑦ ᐃᓄᖏᑦ ᐃᓚᐅᕙᓐᓂᒥᒍᑦ ᓄᓇᓖᑦ ᐱᓇᓱᐊᕐᑕᖏᓐᓄᑦ.
ᐱᓂᕐᓗᑎᑦᓯᑌᓕᒍᑎᖏᓐᓄᑦ ᐊᒻᒪᓗ ᖃᐅᔨᓴᕐᓂᖏᓐᓄᑦ ᐱᖁᔦᑦ ᓯᖁᒥᑕᐅᒻᒪᑕ, ᐅᐃᒪᓇᕐᑐᓂᒃ ᑲᒪᒋᔭᖃᕐᐸᓱᑎᒃ, ᐱᕙᓪᓖᒋᐊᕐᑎᐅᓱᑎᒃ ᐊᕐᖁᑎᒥ ᐊᑦᑕᓇᖕᖏᑐᒦᒍᑎᓂᒃ ᐊᒻᒪᓗ ᐃᕐᖃᑐᐃᕕᐅᑉ ᐃᓗᐊᓂ ᐅᖃᐅᓯᖃᕆᐊᕐᑐᓯᒪᕙᑦᓱᑎᒃ. ᑭᒡᒐᑐᕐᓂᖅ ᐊᒻᒪᓗ ᐅᖑᒪᑦᓯᓂᖅ ᓄᓇᕕᒻᒥ ᓄᓇᓕᓐᓂᒃ ᐳᓖᓯᐅᑉ ᓯᕗᓪᓕᐹᒥ ᑲᒪᒋᒋᐊᓕᖓ ᑭᒡᒐᑐᕐᓂᖅ ᐊᒻᒪᓗ ᐅᖑᒪᑦᓯᓂᖅ. ᑲᑎᕕᐅᑉ ᐳᓖᓯᖏᑦ ᓄᓇᓕᒥᓂᒃ ᑭᒡᒐᑐᕐᑎᐅᓲᑦ ᐃᑲᔪᕐᓱᑎᒃ ᐅᖑᒪᑦᓯᓱᑎᓪᓗ ᐃᓄᓐᓂᒃ ᐊᕐᓱᕈᓐᓇᑐᒃᑰᓕᕐᒪᑕ ᐊᒻᒪᓗ ᐅᐃᒪᓇᕐᑐᒦᓕᕐᒪᑕ. ᑐᓂᔨᔨᐅᓲᑦ ᐱᖁᔭᕐᓂᒃ ᓯᖁᒥᑦᓯᔪᓄᑦ ᐊᑦᑕᓇᕐᓱᑎᒃ ᐃᑉᐱᒍᓱᑦᓯᐊᕋᑎᓗ ᐃᖏᕐᕋᐅᑎᒥᒃ ᐊᖁᑦᑐᓄᑦ. ᑎᒍᓯᓲᑦ ᐊᒻᒪᓗ ᐊᓂᑎᑦᓯᑌᓕᑦᓱᑎᒃ ᐱᓂᕐᓗᑐᓂᒃ ᐅᖑᒪᔭᐅᒋᐊᖃᕐᓂᖏᓐᓄᑦ ᐃᓄᐃᑦ ᐊᒻᒪᓗ ᐱᖁᔭᕐᓂᒃ ᓯᖁᒥᑦᓯᓕᕐᕿᑎᑦᑌᓕᑦᓱᒋᑦ ᐊᒻᒪᓗ ᐊᑦᑕᓇᕐᑐᒦᑦᑎᓯᑦᑌᓕᑦᓱᒋᑦ. ᐱᓇᓱᐊᕐᓱᑎᒃ, ᑲᑎᕕᐅᑉ ᐳᓖᓯᖏᑦ ᐃᑲᔪᕐᑕᐅᒍᒪᔪᓂᒃ ᓯᕙᓂᕐᑐᓂᒃ ᑭᐅᓲᑦ. ᐅᖃᐅᓯᖃᓲᑦ ᐃᓚᖏᑦ ᐱᒻᒪᕆᓐᓂᒃ ᐱᖁᔭᕐᓂᒃ ᓯᖁᒥᑦᓯᔪᓂᒃ ᐊᒻᒪᓗ ᐊᒥᓱᑦ ᐱᒻᒪᕆᐅᓗᐊᖕᖏᑐᓂᒃ ᐅᓐᓂᓗᒍᑎᖃᕐᑎᓗᒋᑦ ᐆᑦᑑᑎᒋᑦᓱᒋᑦ ᓂᐸᓕᔭᓗᐊᕐᓂᕃᔪᓂᒃ ᐅᕝᕙᓘᓐᓃᑦ ᐊᕐᖁᑎᒃᑰᓱᑎᒃ ᐱᖁᔭᕐᓂᒃ ᓯᖁᒥᑦᓯᔪᓂᒃ ᑕᑯᓐᓇᑕᒥᓂᒃ. ᐳᓖᓰᑦ ᐃᓕᓴᕐᓯᒪᒻᒥᔪᑦ ᐅᐃᒪᓇᕐᓯᔪᓂᒃ ᑲᒪᒍᓯᓂᒃ ᐊᒻᒪᓗ ᐊᓂᕐᓵᑎᑦᓯᒐᓱᐊᕈᓯᓂᒃ ᐃᑲᔪᕈᓐᓇᕆᐊᖃᕐᓂᒥᓄᑦ ᐃᓄᓐᓂᒃ ᐋᓐᓂᑐᓂᒃ. ᓄᓇᓕᓐᓂ ᑲᒪᖃᑕᐅᓂᖏᑦ ᓄᓇᓕᓐᓂ ᑲᒪᖃᑕᐅᓲᒍᓂᖏᑦ ᐳᓖᓰᑦ ᐱᓇᓱᐊᕐᑕᖏᑦᑕ ᐃᓚᒋᔭᖏᓐᓂ ᑕᑯᕙᓪᓚᑕᐅᑦᓯᐊᓲᒍᖕᖏᑐᑦ. ᐊᒥᓱᑦ ᐳᓖᓰᑦ ᓄᓇᓕᒥ ᐱᓇᓱᐊᕐᑕᐅᔪᓄᑦ ᐊᒻᒪᓗ ᓱᖃᑦᓯᓂᐅᑎᑕᐅᔪᓄᑦ ᐃᓚᐅᓲᑦ. ᐃᓄᓐᓂᒃ ᑭᒡᒐᑐᕈᑎᒋᑦᓱᒋᑦ ᐱᓇᓱᐊᓲᖏᑦ ᐃᓚᓖᑦ ᐃᓕᓴᕐᕕᓂ ᐅᖄᕕᖃᕆᐊᕐᑐᓯᒪᓃᑦ ᐊᒻᒪᓗ ᓄᓇᓖᑦ ᐊᐅᓚᑦᓯᔨᖏᓐᓂᒃ. ᐃᓕᓭᓲᑦ ᐃᓄᓐᓂᒃ ᖃᓄᖅ ᐊᑦᑕᓇᕐᑐᐃᑦ ᐊᑑᑎᖕᖏᓚᕿᒍᓐᓇᒪᖔᑕ ᐊᒻᒪᓗ ᖃᓄᖅ ᐅᐃᒪᓇᕐᓯᔪᑦ ᑲᒪᒋᔭᐅᒋᐊᖃᓲᒍᒻᒪᖔᑕ. ᐊᓯᖏᑦ ᑲᒪᖃᑕᐅᒍᑎᒋᓲᕆᒻᒥᔭᖏᑦ ᐃᓚᓖᑦ ᐋᖓᔮᓐᓇᑐᓂᒃ ᐱᓗᑲᒍᑎᖃᕐᑎᓯᑦᑌᓕᓂᖅ ᐊᒻᒪᓗ ᐃᓕᓭᓂᖅ ᐋᖓᔮᓐᓇᑐᓄᐊᖓᔪᓂᒃ ᐊᒻᒪᓗ ᐊᖁᑦᑐᑦ ᐊᑦᑕᓀᑦᑑᒋᐊᖃᕐᓂᖏᓐᓄᑦ ᐱᓇᓱᒐᕐᓄᑦ. ᑖᒃᑯᐊ ᐱᓇᓱᐊᓲᖏᑦ ᐃᑲᔪᕐᓯᓲᑦ ᓄᐃᑎᕐᑕᐅᓂᖏᓐᓂᒃ ᑲᑎᕕᐅᑉ ᐳᓖᓯᖏᑦᑕ ᐊᒻᒪᓗ ᐃᓄᐃᑦ ᑲᒪᒋᐅᑎᑦᓯᐊᓂᖏᓐᓂᒃ. ᐱᖁᔦᑦ ᓯᖁᒥᑕᐅᒻᒪᑕ ᖃᐅᔨᓴᕐᓂᖏᑦ ᐳᓖᓰᑦ ᐊᒻᒪᓗ ᖃᐅᔨᓴᕐᑏᑦ ᖃᐅᔨᓴᓕᐅᒥᔮᓲᑦ ᐱᖁᔦᑦ ᓯᖁᒥᑕᐅᑎᓪᓗᒋᑦ. ᑭᓇᑐᐃᓐᓇᖅ ᐳᓖᓯᒃᑯᓂᒃ ᓯᕙᓂᕐᒪᑦ ᐱᖁᔦᑦ ᓯᖁᒥᑕᐅᓂᖏᓐᓄᑦ, ᐳᓖᓰᑦ ᓄᓇᓕᒻᒦᑐᑦ ᓯᕙᓂᕈᑕᐅᔪᓂᒃ ᖃᐅᔨᒐᓱᐊᕆᐊᕐᑐᓲᑦ. ᓇᓗᓀᕐᑐᐃᓲᑦ ᐁᓯᒪᔪᕕᓃᑦ ᐅᖃᐅᓯᖏᓐᓂᒃ ᐊᒻᒪᓗ ᑭᓇᑐᐃᓐᓇᑯᓐᓂᒃ ᑕᑯᓐᓇᑐᕕᓂᕐᓂᒃ ᐊᐱᕐᓱᓱᑎᒃ ᑐᑭᓯᒋᐊᓪᓚᐅᑎᑦᓴᓂᒃ ᐱᕕᒋᑦᓱᒋᑦ. ᐳᓖᓰᑦ ᑎᒎᓪᓚᓲᒍᒻᒥᔪᑦ ᓱᕐᖁᐃᓯᒍᑎᑦᓴᓂᒃ ᑎᒍᐃᓐᓇᓂᒃ ᐊᒻᒪᓗ ᐱᓂᕐᓗᕕᐅᔪᒨᕐᑎᓯᑦᑌᓕᑦᓱᑎᒃ ᓱᕐᖁᐃᓯᒍᑎᑦᓭᑦ ᐃᓘᓐᓇᑎᒃ ᐳᓖᓯᓄᑦ ᐳᑯᑦᑕᐅᖏᓐᓂᓕᒫᖏᓐᓂᒃ ᖃᓄᐃᓕᖕᖓᑕᐅᑦᑌᓕᑎᑦᓯᓱᑎᒃ. ᖃᐅᔨᓴᕐᓂᖅ ᐱᔭᕇᕐᑎᓗᒍ ᖃᐅᔨᓴᕐᓂᖅ ᐱᔭᕇᕐᑕᐅᒪᑦ, ᑭᖑᓪᓕᐹᑦ ᐳᓖᓰᑦ ᑐᓴᕐᑎᓯᐅᑎᖏᑦ ᑐᓂᔭᐅᓲᑦ ᑲᒪᒋᔭᖃᕐᕕᓕᒻᒧᑦ ᑎᒍᔭᐅᑎᑦᓯᒐᓱᐊᕐᑎᒧᑦ. ᑎᒍᔭᐅᑎᑦᓯᒐᓱᐊᕐᑎ ᑌᒪᑦ ᓱᕐᖁᐃᓯᒋᐊᕐᓂᐊᓕᕐᒪᑦ ᑲᒪᒋᔭᖅ ᐅᒃᑯᐊᑐᑦᓴᐅᒪᖔᑦ ᐅᕝᕙᓘᓐᓃᑦ ᐱᓂᕐᓗᓂᕐᓄᑦ ᐱᖁᔦᑦ ᒪᓕᓪᓗᒋᑦ ᖃᓄᐃᓕᒍᑕᐅᔪᑦᓴᐅᒪᖔᑦ ᐅᕝᕙᓘᓐᓃᑦ ᐊᓯᖓᑎᒍᑦ ᑯᐯᒻᒥ ᐱᖁᔭᕐᓂᒃ ᓯᖁᒥᑦᓯᒍᑎᒋᐊᓪᓚᒃ ᒪᓕᓪᓗᒋᑦ ᐱᖁᔭᕐᓂᒃ ᓯᖁᒥᑦᓯᔪᖅ ᖃᓄᐃᓕᔭᐅᒋᐊᖃᕐᒪᖔᑦ. ᑎᒍᔭᐅᑎᑦᓯᒐᓱᐊᕐᑎ ᑐᑭᑖᕐᐸᑦ ᐱᖁᔭᕐᓂᒃ ᓯᖁᒥᑦᓯᔪᖅ ᐊᑭᓃᑎᑕᐅᓚᖓᑎᓪᓗᒍ, ᐃᕐᖃᑐᐃᕕᒻᒦᕕᑦᓴᖓ ᐅᓪᓗᖅ ᓇᓗᓀᕐᑕᐅᓲᖅ.