ᑲᑎᕕᐅᑉ ᐳᓖᓯᖏᑦ ᑎᒍᔨᓐᓂᔪᑦ $22,000-ᓂᒃ ᐊᑭᓕᓐᓂᒃ ᐅᖓᑖᓅᕐᑐᓂᒃ ᐋᖓᔮᓐᓇᑐᓂᒃ ᑳᓯᓂᓗ
ᑲᑎᕕᐅᑉ ᐳᓖᓯᖏᑦ ᕿᓈᔭᕐᕕᖃᕈᓐᓇᐅᑎᑕᖃᕐᓱᑎᒃ ᕿᓈᔭᕐᕕᖃᓚᐅᕐᑐᑦ ᑲᖏᕐᓱᐊᓗᑦᔪᐊᒥ ᐁᐸᔭᓕ 13-ᒥ ᕿᑎᕋᓕᕇᒥ, ᓀᐱᑦᓯᓚᕿᑦᓱᑎᒃ 500g ᐅᖓᑖᓅᕐᑐᓂᒃ ᐅᖁᒣᓐᓂᓕᓐᓂᒃ ᓰᑲᔨᐊᕐᓗᓂ ᑳᓈᐱᔅᓂᒃ ᐊᒻᒪᓗ $760-ᓂ ᑳᓯᓂᒃ ᑎᒍᔨᓐᓂᓱᑎᒃ.
ᐁᐸᔭᓕ 13-ᒥ, ᑲᑎᕕᐅᑉ ᐳᓖᓯᖏᑦ ᓯᕙᓂᕐᑕᐅᓚᐅᕐᑐᑦ ᐅᖃᕈᑎᓕᒻᒧᑦ ᑲᖏᕐᓱᐊᓗᑦᔪᐊᒥ ᐊᓇᕐᕋᕆᔭᐅᔪᒥ ᐃᓕᒪᓇᕐᑐᖃᓕᕆᐊᖓ. ᐃᑎᕐᓱᑎᒃ, ᑕᑯᑦᓴᐅᑎᒋᓚᐅᕐᑐᑦ ᓰᑲᔨᐊᕐᓗᓂᒃ. ᐳᓖᓰᑦ ᐊᑐᕐᑎᓯᓚᐅᕐᑐᑦ ᐊᒻᒪᓗ ᑲᔪᓯᑎᑦᓯᓱᑎᒃ ᓴᕕᕐᓱᕈᓐᓇᐅᑎᒥᒃ ᕿᓂᕈᓐᓇᓯᑦᓱᑎᒃ ᐊᓇᕐᕋᕆᔭᐅᔫᑉ ᐃᓗᐊᓂ. ᑲᑎᑦᓱᑎᒃ, ᐳᓖᓰᑦ ᑎᒍᔨᓐᓂᓚᐅᕐᑐᑦ $760-ᓂᒃ ᑳᓯᓂᒃ, 518 grams-ᓂᒃ ᓰᑲᔨᐊᕐᓗᓂᒃ ᑳᓈᐱᔅᓂᒃ, 22-ᓂᒃ Methamphetamine ᐄᒐᕐᓂᒃ, 9-ᓂᒃ ᑲᐴᑎᓂᒃ ᐃᓗᓕᓕᓐᓂᒃ ᑕᐅᑦᑐᖃᖕᖏᑐᓂᒃ ᐃᒪᑐᐃᓐᓇᐊᔮᕐᑐᓂᒃ, ᐳᓪᓚᐅᔭᒥᓪᓗ ᐃᓗᓕᓕᒻᒥᒃ ᖃᑯᕐᑕᒥᒃ ᐸᓂᕐᑐᔭᒥᒃ, ᐊᒻᒪᓗ ᐊᓯᖏᓐᓂᒃ ᐋᖓᔮᓐᓇᑐᕐᑐᑐᓄᑦ ᐊᑐᕐᑕᐅᓲᓂᒃ. "ᐅᕙᓐᓄᓕ ᐊᓕᐊᓇᓕᕐᑐᖅ ᑖᒃᑯᐊ ᐋᖓᔮᓐᓇᑐᐃᑦ ᓂᐅᕐᕈᑎᒋᔭᐅᓂᐊᕈᓐᓀᒪᑕ," ᓚᓚᐅᕐᑐᖅ ᐳᓖᓰᑦ ᑲᒪᔨᒻᒪᕆᖓᑦ ᒫᒃᓰᒻ ᒥᐊᕐᓭ. "ᑖᓐᓇ ᖃᓂᒪᓐᓈᓘᑉ ᓇᓃᓕᒫᓕᕐᓂᖓ ᐱᑦᔪᑎᒋᓗᒍ, ᓄᓇᓕᒦᑦᑐᑦ ᐃᑉᐱᒍᓱᑦᓯᐊᓗᑎᒃ ᑭᓯᐊᓂᐅᓕᕐᒪᑕ ᐃᓗᓯᕐᓱᓯᐊᕋᓱᐊᕆᐊᖃᕐᓂᒥᓂᒃ ᐊᒻᒪᓗ ᖃᓄᐃᖕᖏᓯᐊᕋᓱᐊᕐᓗᑎᒃ." ᐊᑕᐅᓯᖅ ᐃᓄᒃ ᑎᒍᔭᐅᓚᐅᕐᑐᖅ ᐊᒻᒪᓗ ᑎᒍᔭᐅᒪᕕᒻᒨᑕᐅᑦᓱᓂ. ᐃᓄᒃ ᓵᖓᓯᒋᐊᖃᓚᕿᓯᒪᔪᖅ ᐊᒥᓱᐃᓂᒃ ᐋᖓᔮᓐᓇᑐᓕᕆᓂᕐᒧᐊᖓᔪᓂᒃ ᐸᓯᔭᐅᒍᑎᒥᓂᒃ ᐊᒻᒪᓗ ᐃᕐᖃᑐᐃᕕᒃᑰᓚᖓᑦᓱᓂ ᐅᖄᒍᑎᒃᑯᑦ ᐅᓪᓗᒥ ᕿᓂᕋᓕᕇᒥ. ᖃᓄᑐᐃᓐᓇᖅ ᑐᑭᓯᐅᑎᑦᓭᑦ ᐱᑦᔪᑎᒋᓗᒋᑦ ᐃᓕᒪᓇᕐᑐᓂᒃ ᐱᓇᓱᐊᕐᑐᑦ, ᐃᓚᐅᑎᓪᓗᒋᑦ ᐱᖁᔦᑦ ᓯᖁᒥᑦᓱᒋᑦ ᓂᐅᕐᕈᓭᔪᑦ ᐋᖓᔮᓐᓇᑐᓂᒃ ᐊᒻᒪᓗ ᐃᒥᐊᓗᓐᓂᒃ, ᐅᖃᕈᑎᖃᕈᓐᓇᐳᑦ Crime Stoppers-ᑯᓄᑦ ᓯᕙᓂᕐᓗᒋᑦ ᐅᕗᖓ: 1-800-711-1800. ᑐᑭᓯᐅᑎᑦᓴᑖᕐᑎᓯᔪᖅ ᐁᑦᑐᑕᐅᓚᕿᒍᓐᓇᑐᖅ ᐊᑭᓕᕐᑕᐅᓗᓂ $2,000 ᑎᑭᓪᓗᒋᑦ.