ᓴᓪᓗᐃᑦ: ᐃᓚᒌᑦ ᐱᖓᓲᔪᕐᑐᑦ ᐃᑲᔪᕐᑕᐅᒍᒪᑦᓱᑎᒃ ᑐᓴᕐᑎᓯᒻᒪᑕ ᐁᔭᐅᔪᑦ
ᐃᓚᒌᑦ ᐱᖓᓲᔪᕐᑐᑦ ᐊᓐᓇᑎᑕᐅᓚᐅᕐᑐᑦ ᓴᓪᓗᐃᑦ ᓴᓂᐊᓂ ᐁᐸᔭᓕ 24-ᒥ ᑲᑎᕕᐅᑉ ᐳᓖᓯᖏᑦ ᓴᓪᓗᓂ ᓯᕙᓂᕐᑕᐅᑎᓪᓗᒋᑦ ᐃᑲᔪᕐᑕᐅᒍᒪᔪᒧᑦ ᒪᙯᑦᓱᑎᒃ.
ᓂᕿᑦᓯᑐᓂ, ᐁᐸᔭᓕ 24-ᒥ, 4-ᖕᖒᑉ ᐅᓪᓗᑯᑦ ᓴᓂᐊᓂ, ᓴᓪᓗᐃᑦ ᐳᓖᓯᒃᑯᖏᑦ ᐃᑲᔪᕐᑕᐅᒍᒪᔪᒧᑦ ᐊᖑᑎᒧᑦ ᐅᖄᕕᐅᓚᐅᕐᑐᑦ. ᑖᓐᓇ ᐃᓚᖃᓚᐅᕐᑐᖅ ᑕᓪᓕᒪᒋᐊᓪᓚᓂᒃ ᓇᒻᒥᓂᕐᒥᓂᒃ 40 ᑭᓗᒦᑕᓂ kilometres ᐅᖓᓯᓐᓂᖓᓃᑦᓱᑎᒃ ᓴᓪᓗᐃᑦ ᑰᕕᐅᑉ ᓴᓂᐊᓂ. ᓄᓇᓕᓐᓄᑦ ᐅᑎᕋᓱᐊᕆᐊᒥᒃ ᐱᔭᕐᓃᓕᓯᒪᓚᐅᕐᑐᑦ ᐱᕐᓯᓕᕙᓪᓕᐊᔪᒧᑦ ᑕᑯᑦᓴᐅᖏᓕᕐᐸᓕᐊᑎᓪᓗᒍ ᓄᓇ.. ᓄᓇᓕᓐᓂ ᕿᓂᕆᐊᕐᑐᓴᖃᓚᐅᖕᖏᒪᑦ, ᑲᑎᕕᐅᑉ ᐳᓖᓯᖏᑦ ᕿᓄᕕᖃᓚᐅᕐᑐᑦ ᐃᑲᔪᕐᑕᐅᒍᒪᑦᓱᑎᒃ ᐅᓇᑕᕐᑎᓴᓄᑦ ᕿᓂᕆᐊᕐᑕᐅᒋᐊᖃᓕᕐᒪᑕ. ᑕᓪᓕᒪᐅᔪᕐᑐᑦ ᐅᓇᑕᕐᑎᓭᑦ ᓴᓪᓗᓂᑦ ᐊᐅᓪᓚᓚᐅᕐᑐᑦ ᕿᓂᕆᐊᓯᑦᓱᑎᒃ ᐊᑐᕐᓱᒋᑦ ᐊᓯᐅᒌᒃᑯᑏᑦ GPS ᒪᓂᔭᐅᑎᓪᓗᒋᑦ ᑖᒃᑯᓄᖓ ᓇᔪᕐᑕᖏᑦᑕ ᓇᓗᓀᒃᑯᑕᖏᑦ. ᐃᓘᓐᓇᑎᓪᓗ ᐅᑎᑦᓯᐊᓚᐅᕐᑐᑦ ᓄᓇᓕᓐᓄᑦ 2-ᖕᖑᑎᓪᓗᒍ ᐅᓐᓄᐊᑯᑦ. ᑌᒣᓕᑎᓪᓗᒋᑦ ᖃᓄᐃᓕᖕᖓᑐᖃᓚᐅᖕᖏᑐᖅ. "ᐅᓇᑕᕐᑎᓭᑦ ᑲᔪᓯᑦᓯᐊᓚᐅᕐᑐᑦ ᓇᓂᔨᑦᓯᐊᓱᑎᒃ ᐊᓯᐅᒪᔪᓂᒃ," ᓚᓚᐅᕐᑐᖅ ᐳᓖᓰᑦ ᓯᕗᓕᕐᑎᖓ ᑑᓂ ᐸᑭᐊᑦ "ᕿᓂᕆᐊᕐᑐᑦ ᐅᖄᕕᐅᖏᓐᓇᓚᐅᕐᒪᑕ ᐃᑉᐱᒍᓱᑦᑎᑕᖃᕐᓱᑎᒃ ᐱᔭᕐᓃᓘᓚᐅᖕᖏᑐᑦ ᕿᓂᕆᐊᕐᑐᑦ." ᐃᓚᒌᑦ ᐊᑦᑕᓇᕐᑐᒨᖕᖏᓚᕿᓚᐅᕐᑐᑦ ᓇᔪᕐᑎᖃᕐᓂᕋᒥᒃ ᑐᓴᐅᒪᖃᑎᖃᕈᑎᒥᒃ ᐅᖄᒍᑎᒥᒃ. ᑲᑎᕕᐅᑉ ᐳᓖᓯᖏᑦ ᐊᒻᒪᓗ ᑫᐋᔩᑉ ᓄᓇᓕᓐᓂ ᐊᑦᑕᓀᑦᑐᒦᑦᑎᓯᓂᕐᓄᑦ ᐱᓇᓱᕝᕕᖓ ᐃᕐᙯᑎᑦᓯᒍᒪᔪᑦ ᓄᓇᕕᒻᒥᐅᓂᒃ ᐸᕐᓀᓕᕈᑎᒃ ᓄᓇᓕᐊᓚᖓᓗᑎᒃ ᐃᒣᒋᐊᖃᕐᓂᖏᓐᓂᒃ: ᐃᓚᒥᓂᒃ ᑐᓴᐅᒪᑎᑦᓯᒋᐊᓖᑦ ᐃᓚᓐᓈᒥᓂᓘᓐᓃᑦ ᓇᒧᖕᖓᓂᐊᕐᒪᖔᒻᒥᒃ ᐊᒻᒪᓗ ᖃᖓ ᐅᑎᕐᑐᓴᐅᒻᒪᖔᒻᒥᒃ; ᐊᑦᔭᓯᒋᐊᓖᑦ ᐅᖄᒍᑎᒥᒃ; ᓯᓚ ᖃᓄᐃᑦᑑᓂᐊᕐᒪᖔᑦ ᑕᑯᒐᓱᐊᕐᖄᕆᐊᓖᑦ; ᐊᑦᔭᓯᒋᐊᓖᑦ ᐱᐅᒃᑯᑎᓂᒃ ᐊᓐᓇᒍᑎᐅᒍᓐᓇᑐᓂᒃ, ᐆᑦᑑᑎᒋᓗᒋᑦ: ᑐᐱᖅ ᐊᒻᒪᓗ ᒪᙯᓯᐅᑏᑦ ᕿᐲᑦ; ᑕᖁᐊᑦ ᓈᒻᒪᕈᓇᐅᑎᓪᓗᒋᑦ 48-ᓂ ᐃᑲᐅᕐᓂᓂ; ᐅᕐᓱᓴᒋᐊᓪᓓᑦ ᐊᒻᒪᓗ ᑳᓴᓖᑦ ᐃᒻᒪᖃᐅᑏᑦ. ᐅᑯᐊ ᑕᑯᒻᒥᓗᒋᑦ: [ᐱᖏᓐᓇᕈᓐᓀᓗᓯ ᓄᓇᒦᑦᓯᐊᕆᑦᓯ ᖁᕕᐊᓱᓪᓗᓯ! Enjoy the land safely!