ᐊᒥᓱᓂ ᐃᑲᐅᕐᓂᓂ ᕿᓂᕐᑕᐅᒪᕆᑦᑐᖃᓚᐅᕐᑐᖅ ᓯᒪᑕᓂᒃ ᓴᓪᓗᒥᐅᓂᒃ ᐊᓯᐅᒋᐊᖏᑦ ᑐᓴᕐᑕᐅᑎᑕᐅᓯᒪᔪᓂᒃ ᐊᓪᓕᖏᓱᖓᕐᑐᓂ

ᐊᒥᓱᓂ ᐃᑲᐅᕐᓂᓂ ᕿᓂᕐᑕᐅᒪᕆᑦᑐᖃᓚᐅᕐᑐᖅ ᓯᒪᑕᓂᒃ ᓴᓪᓗᒥᐅᓂᒃ ᐊᓯᐅᒋᐊᖏᑦ ᑐᓴᕐᑕᐅᑎᑕᐅᓯᒪᔪᓂᒃ ᐊᓪᓕᖏᓱᖓᕐᑐᓂ, ᐁᐸᔭᓕ 1-ᒥ, ᐅᓐᓄᓴᒃᑯᑦ.

ᒪᕐᕉᒃ ᐃᓄᒻᒪᕇᒃ ᐊᒻᒪᓗ ᒪᕐᕉᒃ ᑲᒃᑲᓛᒃ ᓴᓪᓗᐃᑦ ᓄᓇᓕᖏᓐᓂᑦ ᐊᐅᓪᓚᑐᕕᓂᐅᓚᐅᕐᑐᑦ ᐁᐸᔭᓕ 1-ᒥ ᖃᒧᑎᑲᓪᓚᑯᑦ ᒪᙯᓯᑦᓱᑎᒃ. ᑕᕐᕋᓕᐊᕐᓱᑎᒃ ᖃᔭᕆᐊᓕᐊᕐᑐᕕᓃᑦ ᐃᒪᑎᒎᕈᑎᒋᓚᖓᑦᓱᒍ. ᖃᔭᕆᐊᕐᑐᓱᑎᒃ ᓄᓈᕐᑐᕕᓂᐅᑦᓱᑎᒃ ᐅᑎᕈᓐᓇᖏᕐᑐᕕᓂᐅᓚᐅᕐᑐᑦ ᓯᑯᐃᑦ ᓂᒪᕐᓂᖏᓐᓄᑦ. ᐱᖓᓱᑦ ᖃᕐᖄᓘᑉ ᑭᓪᓕᖓᓂ ᐊᓐᓇᐅᒪᕕᓕᐅᕐᑐᕕᓃᑦ, ᐃᓚᖓᑦ ᓄᓇᓕᓐᓄᑦ ᐱᓱᓯᑎᓪᓗᒍ. ᐅᑎᖕᖏᑐᕕᓂᐅᒋᐊᖏᑦ ᑐᓴᕐᑕᐅᑎᑕᐅᓚᐅᕐᑐᑦ ᓯᑕᒪᑦ ᐃᓄᐃᑦ 8 ᐅᓐᓄᑐᒃᑯᑦ ᓴᓂᐊᓂ, 7:30-ᒥ ᐅᓐᓄᑐᒃᑯᑦ ᐅᑎᕐᓂᐊᓂᕋᕐᑐᕕᓂᐅᑦᓱᑎᒃ. ᓯᑕᒪᓂᒃ ᐊᓯᐅᔪᓂᒃ ᕿᓂᕆᐊᓯᔪᕕᓃᑦ ᖃᒧᑎᑲᓪᓓᑦ, ᑕᑯᒐᑎᒃ. ᐅᓪᓛᒍᓕᕐᑎᓗᒍ, ᐁᐸᔭᓕ 2-ᒥ, ᖃᒧᑎᑲᓪᓚᑐᑦ ᐃᓚᖓᑦ ᑕᑯᔪᕕᓂᖅ ᐱᓱᑦᑐᒥᒃ ᓄᓇᓕᓕᐊᕐᓱᓂ ᐃᑲᔪᕐᑎᓴᕐᓯᐅᕆᐊᕐᑐᒥᒃ. ᖃᒧᑎᑲᓪᓚᓂᒃ ᐁᑎᑦᓯᓯᓚᐅᕐᑐᖅ ᐃᓚᒥᓂᒃ ᕿᒪᑦᓯᒪᔭᒥᓂᒃ, ᐃᓘᓐᓇᑎᒃ ᖃᓄᐃᖕᖏᑑᓚᐅᕐᑐᑦ. ᖃᓄᐃᖕᖏᓗᑯᑦᑐᕕᓃᑦ, ᖃᑦᓯᖑᕐᐸᑦ ᐅᑎᓚᖓᒋᐊᒥᒃ ᐅᖃᕐᓯᒪᓐᓂᕋᒥᒃ. ᑲᑎᕕᐅᑉ ᐳᓖᓯᖏᑦ ᐊᒻᒪᓗ ᓄᓇᓕᒥᐅᓂᒃ ᐊᑦᑕᓀᑦᑐᒦᑦᑎᓯᓂᕐᒧᑦ ᐱᓇᓱᕝᕕᖓ ᑫᐋᔩᑉ ᒪᙯᓚᖓᔪᓂᒃ, ᐃᒣᖃᑦᑕᖁᔨᓪᓚᕆᓕᕐᑐᑦ: ᐅᖃᕐᓯᒪᖃᑦᑕᓗᑎᒃ ᖃᑦᓯᖑᕐᐸᑦ ᓂᕆᐅᓐᓇᓚᖓᒻᒪᖔᒻᒥᒃ ᐊᒻᒪᓗ ᓇᒧᖕᖓᓚᖓᒻᒪᖔᒻᒥᒃ; ᑐᓴᕐᑕᐅᒍᑎᓕᔭᕐᓗᑎᒃ; ᓯᓚᐅᑉ ᖃᓄᐃᓐᓂᕆᓂᐊᕐᑕᖓᓂᒃ ᖃᐅᔨᓴᕐᓯᒪᓗᑎᒃ; ᐊᑐᕋᑦᓴᓂᒃ ᐃᒻᒪᖃᐅᑎᒡᒋᓗᑎᒃ ᐆᑦᑑᑎᒋᓗᒋᖕᑦ ᑐᐱᖅ ᐊᒻᒪᓗ ᕿᐲᑦ; ᑕᖁᐊᖃᑦᑕᓗᑎᒃ ᓂᕿᓂᒃ 48-ᓂ ᐃᑲᐅᕐᓂᓂ ᓈᒻᒪᒍᓇᕐᓂᒃ; ᐅᕐᓱᐊᓗᒃ ᐊᒻᒪᓗ ᑳᓴᓖᖅ.