ᓄᓇᕕᒻᒥ ᐳᓖᓰᑦ ᐱᒍᑦᔨᔨᖏᑦ: ᐊᑎᖅ ᓄᑖᖅ, ᓯᕗᓂᖅ ᑕᑯᓐᓇᑕᖓ ᓄᑖᖅ 25ᓂᒃ ᐅᑭᐅᓂᒃ ᓇᓪᓕᐅᓂᕐᓯᐅᓂᖓ ᑎᑭᒋᐊᕕᑦᑎᓗᒍ
ᑲᑎᕕᐅᑉ ᓄᓇᕕᒻᒥ ᐳᓖᓯᖏᑦᑕ ᓲᖑᓂᖓ ᓄᑖᒥᒃ ᐊᑎᕐᒥᒃ ᐆᒥᖓ ᖃᐅᔨᒪᔭᐅᒍᑎᖃᓛᓕᕐᑐᑦ, ᓄᓇᕕᒻᒥ ᐳᓖᓰᑦ ᐱᒍᑦᔨᔩᑦ, ᐊᑦᓯᔭᐅᒍᓯᕐᑖᖃᒻᒥᖓ ᓇᓛᒍᑦ ᓴᕐᖀᔪᖅ ᐳᓖᓯᒍᓯᕐᒥᒃ ᓄᑖᒥᒃ ᐊᒻᒪᓗ ᐱᔪᒥᓇᕐᑎᓯᐅᒥᑦᓱᓂ ᓄᓇᓕᓐᓂ ᐃᑲᔪᖃᑎᒌᑦᓯᐊᕆᐊᒻᒪᕆᓐᓂᒥᒃ ᓄᓇᓕᓐᓂ 14ᓂ ᓄᓇᕕᒻᒥ.
ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑲᑎᖕᖓᔨᖏᑦ ᐊᖏᓚᐅᕐᖁᑦ ᑖᑦᓱᒥᖓ ᐊᑎᕐᒥᒃ ᓄᑖᒥᒃ ᐱᖓᔪᐊᓐᓂ ᐅᑭᐅᒥ ᑲᑎᖕᖓᓂᑐᐃᓐᓇᓂᖃᕐᓱᑎᒃ. ᑖᓐᓇ ᐊᑎᖅ ᓄᑖᖅ ᐱᒋᐊᕈᑎᐅᕗᖅ ᐱᓂᐊᕐᓂᐅᓛᕐᑐᓄᑦ 25ᓂᒃ ᐅᑭᐅᓂᒃ ᓇᓪᓕᐅᓂᕐᓯᐅᕈᑎᓄᑦ ᐳᓖᓯᑦ ᐱᒍᑦᔨᔩᑦ ᓄᐃᑕᐅᓂᕕᓂᖓᓄᑦ ᓄᓇᕕᒻᒥ 1996ᖑᑎᓪᓗᒍ. ᐳᓖᓰᑦ ᐊᖓᔪᕐᖄᖓᓄᑦ ᔮ-ᐱᐊᕐ ᓚᕉᔅᒧᑦ, ᓄᓇᕕᒻᒥ ᐳᓖᓰᑦ ᐱᒍᑦᔨᔨᖏᑦ(NPS) ᓄᑖᒧᑦ ᐱᓂᐊᕐᓂᒨᕐᖁᑦ. ‘’ᐳᓖᓰᑦ ᐱᒍᑦᔨᕕᖓᑕ ᐊᑎᖓ ᓄᑖᒥᒃ ᑕᑯᓐᓇᑕᖓᓂᒃ ᐊᑐᓚᐅᖕᖏᓚᖅ, ᐅᑉᐱᖁᖓ ᑖᓐᓇ ᐱᒍᑦᔨᕕᒃ ᓯᕗᓂᖅ ᐱᓪᓗᒍ ᑎᒍᓯᒋᐊᓕᒃ’’, ᐊᖓᔪᕐᖄᖅ ᓚᕉᔅ ᐅᖃᐅᑦᔨᔪᕕᓂᖅ ᑲᑎᖕᖓᔨᓂᒃ ᑫᐋᔩ ᑲᑎᖕᖓᓂᖓᓂ. ᐱᑦᔪᑎᖃᑦᓯᐊᓱᓂ ᐅᖃᕐᓂᖁᖅ ᐳᓖᔩᑦ ᐱᒍᑦᔨᔨᖏᑦ ᑎᒍᓯᑦᓯᐊᓚᕆᒋᐊᓖᑦ ᓄᓇᕕᐅᑉ ᐱᐅᓯᖓ ᒪᓕᓪᓗᒍ ᐱᓇᓱᕝᕕᖓᑕ ᓄᓇᖓᓂ. ᑖᓐᓇ ᑐᑭᓯᑎᑦᓯᒋᐊᓪᓛᕈᑎᐅᕗᖅ ᑐᑭᑖᕐᑕᐅᓂᖓᓂᒃ ᑕᐅᕐᓯᑕᐅᓂᖓᑕ ᑲᑎᕕᒃ ᓚᔫᑉ ᓄᓇᕕᒃ ᓚᔪᖔᕐᒧᑦ. ᐲᕐᓱᒍ ‘’ᓲᖑᓂᖅ’’ ᓚᔪᖅ ᐊᑦᓯᔭᐅᒍᑎᖓᓂᑦ ᐲᕋᓱᑦᓱᒋᑦ ᐊᑦᑕᕈᓱᖕᖏᓂᕋᐃᓂᖓ ᐅᕝᕙᓘᓐᓃᑦ ᐊᐅᓚᑦᓯᓗᐊᕐᓂᕋᐃᓂᖓ ᐃᓚᒋᔭᐅᑎᑕᐅᓗᑎᒃ ᐳᓖᓰᑦ ᑲᒪᒋᔭᖏᓐᓄᑦ. ᑖᓐᓇ ᐊᑎᖅ ᓄᑖᖅ ᑕᐃᓯᑦᓯᐊᕆᕗᖅ ᐊᖏᕐᓯᒪᑦᓯᐊᓂᕐᒥᓂᒃ ᓄᓇᕕᒻᒥᐅᓂᒃ ᐱᒍᑦᔨᓂᕐᒥᓂᒃ ᐊᒻᒪᓗ ᓴᐳᒻᒥᓯᐊᕐᓂᒥᓂᒃ ᐃᓄᓐᓂᒃ ᐊᒻᒪᓗ ᓄᓇᖓᓂᒃ ᐊᑦᔨᐅᖏᑦᑐᒥᒃ ᓄᓇᓕᒻᒥ ᐱᒍᑦᔨᓯᐊᓂᕐᒥᒃ. ᐃᓐᐲᐃᔅ ᑲᔪᓯᓚᖓᔪᖅ ᑎᓕᔭᐅᒪᐅᑎᒥᓂᒃ ᑲᔪᓯᑎᑦᓯᓂᕐᒥᓂᒃ ᓴᐃᒪᖃᑎᒌᑦᑎᓯᑦᓯᐊᓂᕐᒥᒃ, ᐃᓂᓪᓚᖓᑎᑦᓯᓯᐊᕐᓂᕐᒥᒃ ᐊᒻᒪᓗ ᐃᓄᓕᒫᓂᒃ ᐊᑦᑕᓇᕐᑐᒦᑦᑎᓯᑦᑕᐃᓕᓂᕐᒥᒃ, ᐱᕋᔭᑦᑎᑦᓯᑕᐃᓕᓗᑎᒃ, ᖃᓄᐃᖕᖏᓯᐊᕐᓂᖏᑦᑕ ᓄᓇᕕᒻᒥᐅᑦ ᐃᓄᖏᑦᑕ ᑲᒪᒋᓗᒋᑦ ᐊᒻᒪᓗ ᓴᐳᒻᒥᓗᒋᑦ ᐱᔪᓐᓇᐅᑎᖏᑦ ᐊᒻᒪᓗ ᐃᓱᒪᐃᓐᓇᕿᑦᓯᐊᓂᖏᑦ ᓄᓇᓕᒻᒥ ᐱᓇᓱᖃᑎᒌᑦᓯᐊᓂᒃᑯᑦ ᓲᓱᒋᑦᓯᐊᓗᒍ ᐃᓄᐃᑦ ᐃᓕᕐᖁᓯᖓ ᐃᓅᒍᓯᖓᓗ. ᐊᑎᖅ ᓄᑖᖅ ᓄᐃᕙᓪᓕᐊᓛᕐᖁᖅ ᐳᓖᓰᑦ ᐊᓐᓄᕌᖏᓐᓂ, ᓄᓇᒃᑰᔫᖏᓐᓂ, ᐊᓪᓚᕕᖏᓐᓂ, ᐊᓯᖏᓐᓂᓗ... ᓯᐊᕈᒋᐊᖅ, ᑕᕐᓴᖓ ᑕᐅᕐᓯᑕᐅᓛᕐᒥᔪᖅ ᑭᓯᐊᓂ ᐱᓇᓱᑦᑕᐅᓛᕐᑐᖅ ᑮᓇᐅᔭᕐᑐᓗᐊᕐᑕᐃᓕᒍᑕᐅᓗᓂ ᐊᒻᒪᓗ ᖃᐅᔨᒪᔭᐅᑦᓯᐊᓗᓂ ᐃᓄᓐᓄᑦ.