ᔮᓐ-ᐱᐊᕐ ᓚᕈᔅ ᐊᓪᓚᓂᒃ ᐊᔭᑉᐹᑎᑕᐅᓯᒪᓕᕐᑐᖅ ᑲᑎᕕᐅᑉ ᐳᓖᓯᖏᓐᓄᑦ ᐊᖓᔪᕐᖄᖑᕐᓂᒥᓄᑦ
ᕕᕗᐊᔨ 6-ᒥ, ᔮᓐ-ᐱᐊᕐ ᓚᕈᔅ ᐅᖃᒻᒪᕆᑦᑎᑕᐅᓚᐅᔫᖅ ᐊᓪᓚᓂᒃ ᐊᔭᑉᐹᑎᑕᐅᑦᓱᓂ ᑲᑎᕕᐅᑉ ᐳᓖᓯᖏᓐᓄᑦ ᐊᖓᔪᕐᖄᖑᕐᓱᓂ ᐊᒻᒪᓗ ᑐᑭᒧᐊᑦᑎᓯᔨᒋᔭᐅᓯᑦᓱᓂ ᓄᓇᓕᓐᓂ ᐊᑦᑕᓀᑦᑐᒦᑦᑎᓯᓂᕐᓄᑦ ᐱᓇᓱᕝᕕᖓᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (ᑫᐋᔩ).
ᓯᖏᑎᒋᓂᐊᕐᑕᖓ ᒥᓯᐊᓪ ᒪᕐᑌᑉ, ᐳᓖᓯᓄᑦ ᐊᖓᔪᕐᖄᒍᓯᒪᔫᑉ ᔫᓂ 2015-ᒥᓂᑦ. ᐊᖓᔪᕐᖄᖑᕐᑎᑕᐅᑦᓱᓂ ᐁᓯᒪᕕᐅᓚᐅᔫᖅ ᑐᕐᖃᑕᕐᕕᒧᑦ ᑲᒪᒋᔭᓕᒻᒧᑦ ᓄᓇᖃᕐᖄᑐᕕᓂᓕᕆᓂᕐᓄᑦ, ᔨᐊᕗᔨ ᑭᐊᓕᒧᑦ, ᑐᕐᖃᑕᕐᕕᒧᑦ ᓄᓇᓕᓐᓂᐊᓂᕐᓄᑦ ᐊᒻᒪᓗ ᓄᓀᑦ ᐊᑐᕐᑕᐅᓂᖏᓐᓄᑦ, ᑐᕐᖃᑕᕐᕕᒧᑦ ᓄᓇᓕᓐᓂ ᐊᑦᑕᓀᑦᑐᒦᑦᑎᓯᓂᕐᓄᑦ ᐊᒻᒪᓗ ᑐᕐᖃᑕᕐᕕᒧᑦ ᑲᒪᒋᔭᓕᒻᒧᑦ ᒪᓐᑐᔨᐊᓚᒥ ᓄᓇᓕᓕᒫᓂᒃ, ᒪᕐᑌ ᑯᐊᑑᒧᑦ ᐊᒻᒪᓗ ᑯᐯᑉ ᐅᖃᕐᕕᒪᕆᖓᓂ ᑭᒡᒐᑐᕐᓱᓂ ᐅᖓᕙᒥᒃ, ᔮᓐ ᐳᑦᓴᒧᑦ. ᖃᓄᐃᑦᑑᒪᖔᑦ ᔮᓐ-ᐱᐊᕐ ᓚᕈᔅ ᐳᓖᓰᑦ ᐊᖓᔪᕐᖄᖓ ᓚᕈᔅ ᐃᓅᓕᕐᑐᕕᓂᖅ ᒪᓐᑐᔨᐊᓚᒥ ᐊᒻᒪᓗ ᐊᓂᒍᐃᓯᒪᑦᓱᓂ ᑯᐯᒻᒥ ᐳᓖᓰᑦ ᐃᓕᓴᕐᕕᖓᓂ ᐃᓕᓴᕐᓂᒥᓂᒃ (École nationale de police du Québec) 1980-ᒥ. ᐱᓇᓱᐊᕈᑦᔨᓯᒪᔪᖅ Greenfield Park-ᒥ ᐳᓖᓯᓂᒃ ᑖᕙᓂ ᐳᓖᓰᑦ ᐊᖓᔪᕐᖄᖓᓄᑦ ᑐᖓᓕᕆᔭᐅᓯᒪᑦᓱᓂ ᐊᒻᒪᓗ ᓄᓇᓕᓐᓂ ᐊᑦᑕᓀᑦᑐᒦᑦᑎᓯᓂᕐᓄᑦ ᑲᒪᔨᒻᒪᕆᐅᑦᓱᓂ. 2002-ᒥ, ᑲᒪᔨᒻᒪᕆᒻᒧᑦ ᑐᖓᓕᖕᖑᓯᒪᔪᖅ ᐃᑉᐱᒍᓱᓐᓂᓄᑦ ᓄᓇᕐᓚᒥ ᑲᑎᕐᓱᓯᒪᔪᓂᒃ Longueuil-ᒥ ᐳᓖᓰᑦ ᑭᒡᒐᑐᕐᓂᖏᓐᓄᑦ, 2012 ᑎᑭᑦᓱᒍ ᐃᓂᒋᓯᒪᑦᓱᓂᐅᒃ. ᐊᕐᕌᒍᓂ ᐊᒥᓲᖕᖏᑐᓂ ᑭᖑᓂᕐᒥ, ᐃᓂᖃᕐᓯᒪᔪᖅ ᑯᐯᒻᒥ ᐳᓖᓰᑦ ᐊᖓᔪᕐᖄᖏᑦᑕ ᑲᑐᑦᔨᖃᑎᒌᓐᓂᖓᓂ ᑲᒪᔨᒻᒪᕆᒻᒧᑦ ᐃᑲᔪᕐᑎᒋᔭᐅᑦᓱᓂ ᐊᒻᒪᓗ ᑯᐯᒻᒥ ᐳᓖᓰᑦ ᐃᓕᓴᕐᕕᖓᓄᑦ ᑐᑭᓯᓂᐊᕐᕕᐅᓯᒪᑦᓱᓂ.