ᐃᓄᑦᔪᐊᒥ ᐃᓄᐊᕐᑕᐅᔪᓕᒃ – ᐃᓕᒪᒋᔭᖅ ᑎᒍᔭᐅᔪᖅ
ᒣ 7, 2020-ᒥ, ᐃᓄᑦᔪᐊᒥᐅᖅ ᑲᑎᕕᐅᑉ ᐳᓖᓯᖏᓐᓂᒃ ᓯᕙᓂᓚᐅᔫᖅ ᑐᓴᕐᑎᓯᑦᓱᓂ ᐊᓯᐅᒪᔭᐅᓂᖓᓂᒃ 29-ᓂᒃ ᐅᑭᐅᓕᐅᑉ. ᐳᓖᓰᑦ ᐊᓯᐅᒪᔭᐅᔪᒥᒃ ᕿᓂᓯᑲᐱᓚᐅᔫᑦ. ᖃᐅᔨᓴᕐᓱᑎᒃ ᐊᓇᕐᕋᕆᔭᐅᔪᒨᓚᐅᔫᑦ, ᑕᑯᑦᓱᑎᒃ ᐊᓯᐅᒪᔭᐅᔫᑉ ᐃᓅᑉ ᑎᒥᖓᓂᒃ, ᑕᑯᑦᓱᒍᓗ ᐅᒋᐊᕐᑕᕕᓂᐅᒋᐊᖓ ᖃᐅᔨᒪᓇᓚᐅᔫᖅ. ᑕᑯᔭᐅᑦᓱᓂᓗ ᑎᒥᖓ ᐃᓅᒍᓐᓀᕆᐊᖓ ᑐᓴᕐᑕᐅᑎᑕᐅᓚᐅᔫᖅ.
ᒪᓕᒉᑦ ᐊᑐᕐᑐᑦ ᒪᓕᑦᓱᒋᑦ, ᑲᒪᒋᔭᐅᒋᐊᖃᕐᓂᖓ ᖃᐅᔨᓴᕐᓂᐅᑉ ᑐᓂᔭᐅᓚᐅᔫᖅ ᑯᐯᑉ ᐳᓖᓯᖏᓐᓄᑦ Sureté du Québec (SQ), ᑖᒃᑯᐊᓗ ᖃᐅᔨᓴᕐᑎᓂᒃ ᐃᓄᑦᔪᐊᓕᐊᕐᑎᓯᑦᓱᑎᒃ ᖃᐅᔨᓴᕆᐊᕐᑐᑐᓂᒃ ᓱᑦᓱᓂ ᑐᖁᓐᓂᒪᖔᑦ. ᑲᑎᕕᐅᑉ ᐳᓖᓯᖏᑦ ᐳᓖᓯᒋᐊᓪᓚᓂᒃ ᐃᓄᑦᔪᐊᓕᐊᕐᑎᓯᓚᐅᔪᒻᒥᔪᑦ ᐃᑲᔪᕆᐊᕐᑐᓂᒃ ᑯᐯᑉ ᐳᓖᓯᖏᑦᑕ ᖃᐅᔨᓴᕐᑎᖏᓐᓂᒃ. ᑲᑐᑦᔨᓱᑎᒃ ᐱᒐᓱᐊᕐᓂᒥᓄᑦ ᑎᒍᓯᓚᕿᓚᐅᔫᑦ ᐃᓕᒪᒋᔭᕐᒥᒃ ᑐᖁᑦᓯᔪᕕᓂᐅᒋᐊᖓ ᐊᓯᐊᒪᔭᐅᖃᑦᑕᓚᐅᔫᒥᒃ ᐃᓄᒻᒥᒃ. ᐃᓕᒪᒋᔭᖅ ᐃᕐᖃᑐᕐᑕᐅᓛᕐᑐᖅ ᐅᖄᒍᑎᒃᑯᑦ ᐊᓪᓕᕇᕐᑐᓂ ᐃᓄᑦᔪᐊᒥ ᓵᖕᖓᓯᑎᑕᐅᓂᖃᕐᓗᓂ ᐱᖁᔭᕐᓂᒃ ᓯᖁᒥᑦᓯᔪᕕᓂᐅᓂᕐᒥᓄᑦ ᐸᓯᔭᐅᒍᑎᑖᕐᑕᐅᓂᕐᒥᓂᒃ. ᑲᑎᕕᐅᑉ ᐳᓖᓯᖏᑦ ᐊᒻᒪᓗ ᑯᐯᑉ ᐳᓖᓯᖏᑦ ᑐᖁᑕᕕᓂᐅᑉ ᐃᓚᖏᓐᓂᒃ ᓇᒻᒥᓂᖏᓐᓂᒃ ᐊᒻᒪᓗ ᐃᓚᖏᓐᓂᒃ ᓇᓪᓕᓂᕐᒥᓂᒃ ᑐᓴᕐᑕᐅᑎᑦᓯᕗᑦ ᐊᒻᒪᓗ ᐃᓄᑦᔪᐊᒥᐅᓂᒃ ᓇᑯᕐᒦᓱᑎᒃ, ᒪᓂᔨᓯᒪᓚᐅᔪᒻᒪᑕ ᖃᐅᔨᐅᑎᑦᓴᓂᒃ ᐃᓕᒪᒋᔭᐅᔪᖅ ᑎᒍᔭᐅᓚᕿᑎᓪᓗᒍ.