ᓇᓵᓗᒻᒥᒃ ᐊᑐᕐᑕᐅᖁᔨᓂᕐᒧᑦ ᖃᐅᔨᑎᑦᓯᒐᓱᐊᕐᓃᑦ ᑰᔾᔪᐊᕌᐱᒻᒥ
ᑲᔪᓯᑎᑦᓯᒍᑎᐅᑎᓪᓗᒍ ᐊᑐᕐᑕᖁᔨᓂᕆᓲᒥᓂᒃ ᓇᓵᓗᓐᓂᒃ ᐊᓐᓂᕆᒃᑯᑎᓂᒃ, ᑲᑎᕕᐅᑉ ᐳᓖᓯᖏᑦ ᐊᒧᓯᓂᐊᕐᑐᑦ ᑕᓚᕖᓴᕐᑖᑐᑦᓴᒧᑦ ᐊᕐᖁᑦᑐᓄᑦ ᐃᑭᒪᔪᓄᓪᓘᓃᑦ ᓇᓵᓗᑦᓯᒪᔪᓄᑦ ᑰᔾᔪᐊᕌᐱᒻᒥ, ᓄᓇᕕᐅᑉ ᓯᕿᓂᓐᓂᐹᖁᑎᖓᓂᒃ ᓄᓇᓕᐅᑦᓱᓂ.
ᑭᖑᓂᐊᒍᑦ ᐅᓪᓗᓂ, ᑲᑎᕕᐅᑉ ᐳᓖᓯᖏᑦ ᐊᒻᒪᓗ ᐊᓪᓓᑦ ᐄᔪ ᐳᓖᓯᖏᑦ ᐁᑦᑐᐃᖃᑦᑕᓂᐊᕐᑐᑦ ᓇᓚᐅᑦᓵᕈᑎᓂᒃ 43”-ᓂᒃ ᐊᖏᓂᓕᒻᒥᒃ ᑕᓚᕖᓴᕐᒧᑦ. ᐱᓇᓱᖕᖏᑐᐊᕈᑎᒃ ᙯᖁᔭᐅᓯᒪᓂᕐᒦᖏᑐᐊᕈᑎᓘᓐᓃᑦ ᐅᐃᒪᓇᕐᑐᖃᓕᕐᐸᑦ, ᑖᒃᑯᐊ ᑕᑯᓐᓈᖃᑦᑕᓂᐊᕐᑐᑦ ᐊᑐᕐᑐᓂᒃ ᑐᑫᓛᕈᑎᓂᒃ, ᓯᑕᒪᓂᒃ ᐊᑦᓴᓗᐊᓕᓐᓂᒃ, ᓯᑭᑑᕐᑐᓂᒃ ᐊᒻᒪᓗ ᒪᕐᕉᓂᒃ ᐊᑦᓴᓗᐊᓕᓐᓂᒃ ᐊᑐᑦᓯᐊᕋᓗᐊᕐᒪᖔᑕ ᓇᓵᓗᓐᓂᒃ ᑰᔾᔪᐊᕌᐱᐅᑉ/ᒍᐊᑉᒪᑰᔅᑐᑉ ᐊᕐᖁᑎᖏᑦᑎᒍᕐᑎᓗᒋᑦ ᐊᑐᕐᑐᓂᒃ ᓇᓚᐅᑦᓵᕈᑎᑖᕐᑎᓯᖃᑦᑕᓗᑎᒃ. ᓴᓇᖕᖑᐊᑕᕕᓃᑦ ᐃᓕᓐᓂᐊᑎᓄᑦ ᑰᔾᔪᐊᕌᐱᒻᒥᐅᓄᑦ ᒍᐊᑉᒪᑰᔅᑐᒥᐅᓄᓪᓗ ᑫᓪᓗᑐᐃᒍᑎᒋᑦᓱᒋᑦ ᓇᓵᓗᓐᓂᒃ ᐊᑐᖁᔨᓂᕐᒧᑦ ᑰᔾᔪᐊᕌᐱᒻᒥ, ᓇᓵᓗᐃᑦ ᐊᑐᕐᑕᐅᖁᔭᐅᓲᖑᓂᖏᑦ ᓄᑖᖑᑦᔭᖏᑦᑐᑦ. ᔭᓄᐊᕆᐅᑎᓗᒍ, ᐊᓯᒪᐅᑕᐅᑉ ᐃᓕᓐᓂᐊᑎᖏᑦ ᓄᐃᑦᓯᓚᐅᔪᑦ ᑕᕐᕋᓕᔮᒐᕐᓂᒃ ᓀᑦᑐᓂᒃ ᑕᒪᑦᓱᒪᐅᑉ ᒥᑦᓵᓄᑦ. ᑕᑯᓐᓈᕈᓐᓇᑕᑎᑦ Youtube-ᑯᑦ ᑕᑯᓐᓇᕋᑦᓴᖓᑎᒍᑦ. Irene Chu, ᐃᓕᓐᓂᐊᓯᒪᔪᖅ ᑐᔮᓐᑑᑉ ᐃᓕᓐᓂᐊᕕᒻᒪᕆᖓᓂ, ᖃᐅᔨᓴᕐᓯᒪᕗᖅ ᓇᓵᓗᐃᑦ ᐊᑐᕐᑕᐅᓲᖑᓂᖏᓐᓄᑦ ᓄᓇᕕᒻᒥ. ᑖᓐᓇ ᖃᐅᔨᒍᒪᓯᒪᒐᒥ ᓱᒧᑦ ᓄᓇᕕᒻᒥᐅᑦ ᐊᒥᓱᑦ ᐊᑐᓲᖑᖏᑑᒻᒪᖔᑕ ᐊᒻᒪᓗ ᐱᒋᐊᕐᑎᓯᑦᓱᓂ ᐊᓐᓂᑌᓕᒪᓂᕐᒧᑦ ᖃᐅᔨᔭᐅᑎᑦᓯᒐᓱᐊᕐᓂᒥᒃ ᓇᓵᓗᓐᓂᒃ ᐊᑐᕐᑕᐅᖁᔨᒍᑎᒋᑦᓱᒋᑦ. ᑖᓐᓇ ᖃᐅᔨᓯᒪᕗᖅ ᓇᓵᓗᓐᓂᒃ ᐊᑐᐃᓐᓇᖃᑐᐃᓐᓇᓲᖑᖏᒋᐊᖓᓂᒃ: ᓂᐅᕕᐊᑦᓴᐅᑐᐃᓐᓇᓲᖑᖏᒪᑕ ᓂᐅᕕᕐᕕᓂ ᐊᒻᒪᓗ ᐊᑭᑐᔫᓱᖑᑦᓱᑎᒃ. ᑖᓐᓇ ᐁᑦᑑᑎᖃᕈᓐᓇᓯᓚᐅᔪᕗᖅ 500-ᓂᒃ ᓇᓵᓗᓐᓂᒃ. ᓴᓂᕌᒍᑦ, ᑲᑎᕕᒃᑯᑦ ᐊᕐᖁᑎᑦᓯᐊᑰᕐᓂᖏᑦ ᓄᓇᕕᒻᒥ ᐃᑲᔪᕐᓯᒪᐅᑎᖏᑦ ᐊᕐᖁᑎᒃᑯᑦ ᐊᓐᓂᑌᓕᒪᓂᕐᒧᑦ ᖃᐅᔨᔭᐅᑎᑦᓯᓂᖃᓚᐅᔪᕗᑦ ᐊᒻᒪᓗ ᐁᑦᑑᑎᖃᕐᓱᑎᒃ ᓇᓵᓗᓐᓂᒃ, ᑭᓯᐊᓂ ᑮᓇᐅᔭᖃᕐᑎᑕᐅᓯᒪᓂᖓ ᓇᑲᑕᐅᓯᒪᓕᕐᑐᑦ ᑯᐯᒃᑯᑦ ᑲᕙᒪᖓᓄᑦ. ᖃᕆᑕᒃᑯᑦ ᐊᓐᓂᓯᒪᓂᕐᒧᑦ ᐊᓐᓂᐊᕕᓕᐊᕐᐸᑐᐃᑦ ᐱᖓᓲᔪᕐᑐᕕᓪᓗᐊᑐᒥᒃ ᐳᕐᑐᓂᕐᓴᐅᓂᖃᕐᒪᑕ ᑯᐯᓕᒫᕐᒥᐅᑦ ᑕᑯᓐᓈᒥᑦᓱᒋᑦ, ᑕᑯᑦᓱᒋᑦ 2015-ᒥ ᖃᐅᔨᓴᕐᑕᐅᓯᒪᔪᑦ ᒪᑭᐅᓪ ᐃᓕᓐᓂᐊᕕᒻᒪᕆᖓᓄᑦ. 40% ᐳᓴᓐᑎᖏᑦ ᐃᓕᖓᓂᖃᕐᓱᑎᒃ ᓯᑕᒪᓂᒃ ᐊᑦᓴᓗᐊᓕᓐᓄᑦ ᓯᑭᑑᓄᓪᓘᓃᑦ. ᓇᓵᓗᑦᓯᒪᖃᑦᑕᓲᖑᑉᐸᑕ 70% ᐳᓴᓐᑎᖏᑦ ᓂᐊᖁᒃᑯᑦ ᐊᓐᓂᖃᑦᑕᖏᓐᓂᓴᐅᒐᔭᕐᑎᓗᒋᑦ. ᐊᕐᕌᒍᕐᓂᒃ ᙯᔪᕐᓂ, ᑲᑎᕕᐅᑉ ᐳᓖᓯᖏᑦ ᖃᐅᔨᔭᐅᑎᑦᓯᒐᓱᐊᕈᒪᖏᓐᓇᓚᖓᔪᑦ ᓄᓇᕕᒻᒥᐅᓂᒃ ᓇᓵᓗᓐᓂᒃ ᐊᑐᕐᑕᐅᖃᑦᑕᖁᔨᓂᕐᒥᓄᑦ ᖃᐅᔨᔭᐅᑎᑦᓯᓂᖃᕐᓗᑎᒃ ᓱᓇᓱᐊᕐᑎᓯᓂᖃᕐᓗᑎᓪᓗ ᐊᑦᔨᒋᖏᑐᓂᒃ ᓄᓇᓕᓐᓂ. ᑌᒣᒐᓗᐊᕐᑎᓗᒍ, ᐊᕐᖁᑎᒃᑯᑦ ᐊᓐᓂᑌᓕᒪᓂᖅ ᑭᓇᓕᒫᒃᑯᓄᑦ ᑲᒪᒋᔭᐅᑦᓯᐊᕆᐊᖃᕐᒪᑦ. ᑕᑯᕐᒥᓗᒋᑦ ᐅᑯᐊ: ᐊᕐᖁᑎᒃᑯᑦ ᐊᓐᓂᑌᓕᒪᓂᕐᒧᑦ ᖃᐅᔨᔭᐅᑎᑦᓯᒐᓱᐊᕐᓂᖅ ᓄᓇᕕᒻᒥ ᓇᑯᕐᒦᒃ ᐃᓚᐅᖃᑕᐅᒍᓐᓇᕋᑦᓯ 2017-ᒥ ᑐᑫᓚᕐᑎᓯᓂᖃᕐᑎᓗᒋᑦ.