ᐊᓐᓄᕌᕐᓗᓯᒪᓇᕐᒥ ᐊᑦᑕᓀᑦᑐᒦᓐᓂᐊᕋᑦᓯ ᐊᓕᐊᖕᖑᐊᓗᓯᓗ: ᐊᑦᑕᓇᕐᑐᒦᑦᑌᓕᒍᑏᑦ ᐁᑦᑐᑐᕐᑕᐅᒋᐊᕐᑐᓱᑎᒃ ᐳᓚᕋᕐᑐᓄᑦ
ᐊᓐᓄᕌᕐᓗᓯᒪᓇᕐᒥ ᐊᓕᐊᓇᕐᑐᖑᐊᒍᒍᓐᓇᓲᖅ ᐊᒻᒪᓗ ᐊᑦᑕᓈᕿᓚᕿᓇᑐᐃᓐᓇᕆᐊᖃᕐᓇᓱᓂ. ᑲᑎᕕᐅᑉ ᐳᓖᓯᖏᑦ ᑲᒃᑲᓛᑦ ᐊᖓᔪᕐᖄᖏᓐᓂᒃ ᖃᐅᔨᒪᑦᓯᐊᖁᔨᕗᑦ, ᑲᒪᔨᖏᓐᓂᓗ ᐊᒻᒪᓗ ᑲᒃᑲᓛᓂᒃ ᐊᑐᐊᕐᓯᖁᔨᑦᓱᑎᒃ ᐱᔭᕆᐊᑭᑦᑐᓂᒃ ᐊᑦᑕᓇᕐᑐᒦᑦᑌᓕᒍᑎᓂᒃ ᑭᓇᓕᒫᒃᑯᑦ ᓱᒃᑯᐊᕿᑦᑌᓕᒍᑎᖏᓐᓂᒃ.
ᑕᑯᑦᓴᓯᐊᒍᓗᑎᑦ: ᐊᓐᓄᕌᕐᓗᓯᒪᓐᓂᐅᑏᑦ ᐊᑐᕐᑕᑎᑦ ᑕᐅᑦᑐᖃᑦᓯᐊᑎᓗᒋᑦ; ᐊᕐᖁᑎᓂ ᐃᑳᑭᑕᕈᓐᓀᓗᑎᑦ ᐃᓪᓗᓄᑦ ᐊᑭᐊᒥᐅᑕᕇᓄᑦ ᐁᑲᑦᑕᕈᓐᓀᓗᑎᑦ; ᐊᕐᖁᑎᒦᑦᑐᓄᑦ ᑕᕝᕙᓂᑦᓭᓇᖅ ᐃᑎᖃᑦᑕᓗᑎᑦ ᑐᑭᓕᕇᑦ ᐱᔭᕇᕈᕕᒃᑭᑦ ᐊᑭᐊᖏᓐᓃᑐᓄᑦ ᓅᖃᑦᑕᓗᑎᑦ; ᓄᕐᖃᖃᑦᑕᓗᑎᑦ, ᕿᓂᖃᑦᑕᓗᑎᑦ ᓈᓚᖃᑦᑕᓗᑎᓗ ᐊᕐᖁᑎᒥᒃ ᐃᑳᕆᐊᖃᕆᐊᑕᒫᑦ; ᐊᕐᖁᑎᒋᓂᐊᕐᑕᓃᕕᑦ ᐅᖃᐅᑎᑦᓯᐊᓗᒋᒃ ᐊᖓᔪᕐᖄᑭᒃ ᐅᕝᕙᓘᓐᓃᑦ ᑲᒪᔨᑎᑦ. ᐱᐅᓂᕐᓴᐅᒐᔭᕐᒥᔪᖅ, ᐃᓕᓐᓂᒃ ᒪᓕᑉᐸᓃᒃ! ᐁᑦᑑᓯᐊᑎᑦ ᕿᒥᕐᕈᓯᐊᕐᓗᒋᑦs ᐅᖁᒻᒥᓚᐅᕐᓇᒋᑦ, ᐊᒻᒪᓗ ᐊᖓᔪᕐᖄᓅᕕᑦ, ᑲᒪᔨᓐᓄᓘᓐᓃᑦ ᐅᕝᕙᓘᓐᓃᑦ ᐊᓯᐊᓄᑦ ᐃᓄᒻᒪᕆᒻᒧᑦ ᕿᒥᕐᕈᑕᐅᑎᕐᖄᓗᒋᑦ; ᖃᐅᔨᒪᑦᓯᐊᓗᒋᑦ ᐃᑎᕐᕕᒋᓂᐊᕐᑕᐱᑦ ᐊᑦᑕᓇᖕᖏᑑᒋᐊᖏᑦ: ᐅᐃᒪᓇᕐᓯᒍᑦᔭᐅᓴᕈᕕᑦ, ᖃᐅᔨᒪᒌᕐᓗᒋᑦ ᖃᓂᑦᑐᐃᑦ ᐊᓐᓇᒋᐊᕐᕕᓭᑦ ᐆᑦᑑᑎᒋᓗᒋᑦ ᐅᕕᒃᑫᑦ ᐃᓪᓗᖁᑎᖓ, ᐳᓖᓯᒃᑯᑦ ᐅᕝᕙᓘᓐᓃᑦ ᐃᓚᓐᓈᐱᑦ ᐃᓪᓗᖓ. ᑲᑎᕕᐅᑉ ᐳᓖᓯᖏᑦ ᐊᕐᖁᑎᓂ ᐃᑉᐱᒍᓱᓛᕐᒥᔪᑦ ᐊᒻᒪᓗ ᐅᓐᓄᓴᒃᑯᑦ ᐃᑲᔪᕐᑕᐅᒍᒪᔪᖃᕐᒪᖔᑦ ᖃᐅᔨᒪᒐᓱᐊᕐᓗᑎᒃ. ᐃᑲᔪᕐᑕᐅᒋᐊᖃᕈᕕᑦ ᐃᑲᔪᕐᑕᐅᒍᒪᓗᑎᑦ ᕿᓄᑦᑌᓕᒍᓐᓀᓗᑎᑦ. ᐃᖏᕐᕋᐅᑎᓂᓗ ᐊᖁᑦᑐᓂᒃ ᐊᓐᓄᕌᕐᓗᓯᒪᓇᕐᒥ ᐃᑉᐱᒍᓱᑦᓯᐊᓛᖁᔨᑦᓱᑕ, ᑕᑯᒐᓱᐊᑦᓯᐊᖃᑦᑕᓗᑎᒃ ᐊᕙᑎᒥᓃᑦᑐᓂᒃ ᐊᒻᒪᓗ ᓱᑲᓵᕈᓐᓀᓗᑎᒃ. ᐱᒻᒪᕆᐅᓂᕐᐸᐅᓛᕐᑐᖅ, ᐃᑉᐱᒋᔭᐅᒋᐊᖃᓛᕐᒪᑕ ᑑᕐᙰᑦ, ᐃᓅᑦᓱᑎᒃ ᐊᒪᕈᕉᕐᓯᒪᔪᑦ, ᐊᒻᒪᓗ ᕿᖓᑯᑖᓕᐊᓗᐃᑦ ᓂᖏᐅᕌᓗᐃᑦ, ᐃᓪᓗᓯᓐᓄᑦ ᐳᓛᕆᐊᖃᑦᑕᓛᕐᓂᐊᓗᖏᑦ ᖃᓂᓪᓕᕙᓪᓕᐊᔪᑦᓴᐅᓕᕐᒥᒪᑕ. ᐊᓕᐊᖕᖑᐊᓛᕐᖁᓯ ᐊᒻᒪᓗ ᐊᑦᑕᓀᑦᑐᒦᑦᓯᐊᓗᓯ ᐊᓐᓄᕌᕐᓗᓯᒪᓇᕐᓯᐅᓗᓯ!