ᐱᔭᑦᓴᓂᒃ ᑲᑐᑦᔨᔪᑦ ᐳᓖᓰᑦ ᑯᐯᒃᑯᑦ ᐳᓖᓯᖏᓐᓂ ᐊᒻᒪᓗ ᓄᓇᕕᒻᒥ ᐳᓖᓰᑦ ᐱᒍᑦᔨᔨᖏᓐᓂ ᑲᔪᓯᑎᑦᓯᕗᑦ ᐱᒋᐊᖕᖓᐅᑎᒥᒃ ᐱᓇᓱᐊᕈᑎᒥᒃ ᐊᑭᓂᐊᕐᓂᒥᒍᑦ ᐃᒥᐊᓗᐃᑦ ᑕᒪᐅᓀᓐᓇᖅ ᓂᐅᕐᕈᑕᐅᓂᖓᓂᒃ
ᔫᓂᒥᓂᒃ 2024-ᒥ, ᑭᓪᓕᓯᓂᐊᕐᓂᒥᒃ ᐱᓇᓱᖃᑎᒌᑦ ᑯᐯᒃᑯᑦ ᐳᓖᓯᒃᑯᖏᓐᓂ ᑲᒪᒋᔭᑐᐊᓖᑦ ᐃᒥᐊᓗᐃᑦ ᑕᒪᐅᓀᓐᓇᖅ ᓂᐅᕐᕈᑕᐅᓂᖓᓂᒃ ᐊᒻᒪᓗ ᐱᖁᔦᑦ ᓯᖁᒥᑦᓱᒋᑦ ᑳᓇᐱᔅ ᓂᐅᕐᕈᑕᐅᓂᖏᓐᓂᒃ ᐱᓇᓱᖃᑎᖃᓚᐅᕐᑐᑦ ᓄᓇᕕᒻᒥ ᐃᑲᔪᕐᑎᒌᑦᓱᑎᒃ ᑭᓪᓕᓯᓂᐊᖃᑎᒌᓂᒃ ᓂᐅᕐᕈᑎᖃᕋᓕᑦᑐᑦ ᑲᒪᒍᑎᒋᑦᓱᒋᑦ. ᑖᒃᑯᐊ ᑭᓪᓕᓯᓂᐊᕐᑏᑦ ᑐᑭᓯᓂᐊᕈᑎᖃᖃᑦᑕᓚᐅᔪᔪᑦ ᐱᖁᔭᓂᒃ ᓯᖁᑦᑎᕆᔨᖕᖑᓯᒪᔪᓂᒃ ᐃᓄᓐᓂᒃ ᐱᑐᑦᓯᒪᐅᑎᑦᓱᑎᒃ ᐃᖏᕐᕋᑎᑦᓯᔪᓂᒃ ᓂᐅᕐᕈᓯᕐᓂᒥᒃ ᐊᒻᒪᓗ ᐊᐅᓪᓚᑎᑦᓯᑲᑦᑕᓂᕐᒥᒃ ᐃᒥᐊᓗᓐᓂᒃ ᐊᒻᒪᓗ ᓲᖑᔪᓂᒃ ᐋᖓᔮᓐᓇᑐᓂᒃ (ᑯᕌᒃ ᑰᑫᓐ). ᑖᒃᑯᐊ ᐱᑐᑦᓯᒪᐅᑎᔪᑦ ᐊᑐᖃᑦᑕᓚᐅᔪᔪᑦ ᓇᑦᓴᑲᑦᑕᑎᓂᒃ (ᐃᓄᓐᓂᒃ ᐊᑕᐅᓯᐅᓈᕐᑎᑐᓂᒃ) ᑎᕐᓕᑎᑦᓯᓱᑎᒃ ᑎᑭᐅᑦᔨᒍᑎᒋᑦᓱᒋᑦ ᐱᖁᔭᓄᑦ ᐱᔭᐅᖁᔭᐅᖕᖏᑐᓂᒃ ᐱᑑᒪᒐᕐᓂᒃ ᖃᖓᑦᑕᔫᒃᑯᑦ ᐱᐊ ᐃᐊᓕᐊᑦ ᑐᕉᑑ ᒥᕝᕕᖓᓂᒃ ᑐᕌᕐᑎᓗᒋᑦ ᓇᐅᑐᐃᓐᓇᓄᑦ ᓄᓇᕕᒻᒥ ᑕᕐᕋᒥᐅᑦ ᓄᓇᓕᖏᓐᓄᑦ.
ᑕᒪᑐᒥᖓ ᐱᓇᓱᓐᓂᐅᑉ ᐱᒋᐊᖕᖓᐅᑎᖓ ᑲᔪᓯᑎᑕᐅᑦᓱᓂ ᓯᑉᑎᒻᐱᕆ 19-ᒥ ᓄᐃᑦᓯᒍᑕᐅᓚᐅᔪᔪᖅ 3-ᓂᒃ ᑎᒍᔨᓐᓂᒍᑎᓂᒃ ᐊᓂᕐᕋᕆᔭᐅᔪᓂ ᐊᒻᒪᓗ 2-ᓂᒃ ᓄᓇᒃᑰᔫᑦ ᐃᓗᐊᓂ ᒪᓐᑐᔨᐊᓪ ᓄᓇᖓᓂ. ᑖᒃᑯᐊ ᑎᒍᔨᓐᓂᒍᑏᑦ ᐊᑐᕐᓂᖏᓐᓂ, 3 ᐃᓄᐃᑦ ᑭᓪᓕᓯᓂᐊᕐᑕᐅᓚᐅᔪᔪᑦ ᐊᒻᒪᓗ ᓴᒃᑯᑕᐅᒻᒥᓱᑎᒃ ᓄᐃᒋᐊᖃᓛᕐᓂᖓᓂᒃ ᖃᐅᔨᑎᑦᓯᒍᑎᒥᒃ ᐱᑎᑕᐅᑦᓱᑎᒃ. ᐸᓯᔭᐅᔪᑦ 24-ᓂᒃ ᐊᒻᒪᓗ 30-ᓂᒃ ᐅᑭᐅᓖᒃ ᐊᖑᑏᒃ, ᐊᒻᒪᓗ 37-ᓂᒃ ᐅᑭᐅᓕᒃ ᐊᕐᓇᖅ. ᑭᓪᓕᓯᓂᐊᕈᑎᒥᓂ, ᐳᓖᓰᑦ ᕿᓂᔭᖃᑦᑕᓚᐅᔪᔪᑦ ᐃᓄᐃᑦ ᓇᑦᓴᑲᑦᑕᑏᑦ ᓄᓇᕕᓕᐊᕐᑐᑦ ᓂᕈᒥᐊᒐᖏᓐᓂᒃ.
ᑖᒃᑯᐊ ᕿᓂᔭᕈᑏ ᐱᕕᖃᕐᑎᓯᓚᐅᔪᔪᑦ ᑎᒍᔨᓐᓂᒍᑎᖃᕐᓂᒥᒃ ᒪᑯᓂᖓ:
- 19 ᐳᓪᓚᐅᔦᑦ ᐃᒥᐊᓗᓖᑦ ᑲᑎᑦᓱᒋᑦ 19.68 ᓖᑕᓂᒃ (L)
- 382,5 ᑯᕌᒻ ᑯᕌᒃ ᑰᑫᓐ
- 2,43 ᑯᕌᒻ ᑰᑫᓐ
- 143,19 ᑯᕌᒻ ᑳᓇᐱᔅ
- 19 ᓱᐳᕈᑎᐊᓗᐃᑦ ᓯᑳ
- 5 ᑎᒍᒥᐊᒉᑦ ᐅᖃᓕᒪᐅᑏᑦ
- 6 ᐊᑭᓕᕇᕐᓯᒪᔪᑦ ᓂᐅᕕᕈᑎᑦᓴᔦᑦ ᐊᒻᒪᓗ We ᓂᐅᕕᕈᑎ
- $916 ᑳᓇᑕᒥᐅᑦ ᑖᓚᖏᑦ
- $36 ᐊᒥᐊᔨᑲᒥᐅᑦ ᑖᓚᖏᑦ
- ᐊᑦᔨᒌᖕᖏᑐᑦ ᐱᐅᓕᓐᓂᐊᒉᑦ ᐊᑐᕐᑕᐅᔪᑦ ᐋᖓᔮᓐᓇᑐᑦ ᓂᐅᕐᕈᑕᐅᓂᖓᓄᑦ