ᐊᖓᔪᕐᖄᑉ ᕿᓪᓚ ᓯᓄᐹ ᐅᖃᐅᓯᖏᑦ
ᐊᓕᐊᓱᖕᖏᑐᕐᔪᐊᖑᕗᖓ ᑐᓴᓚᐅᕐᓱᖓ ᖁᑭᕐᑕᐅᔪᕕᓂᕐᓂᒃ ᓴᓪᓗᓂ. ᐃᓅᒎᓐᓀᑐᖃᕐᒪᑦ ᐊᓕᐊᓇᖕᖏᑐᕐᔪᐊᖑᓲᖑᒻᒪᑦ, ᐃᓚᑦᔪᒍᓱᓐᓂᕋᓂᒃ ᖃᐅᔨᒪᔭᐅᖁᔨᕗᖓ ᓄᓇᓕᒻᒧᑦ ᐃᓚᒋᔭᐅᔪᓄᓪᓗ ᐊᑦᑐᑕᐅᔪᓄᑦ ᑕᒪᑐᒧᖓ.
ᑐᓴᓚᐅᕐᓱᖓ ᑕᒪᑦᓱᒥᖓ, ᐅᖄᖃᑎᖃᖏᓐᓇᓕᒫᕐᐳᖓ ᓄᓇᕕᐅᑉ ᐳᓖᓯᖏᑦᑕ ᐊᖓᔪᕐᖄᖓᓂᒃ ᓚᕉᔅᒥᒃ, ᓯᕗᓕᕐᑎᒥᒃ ᒫᑭ ᓴᕕᐊᕐᔪᒥᒃ, ᑲᑎᕕᒃ ᓄᓇᓕᓕᒫᑦ ᑲᑎᒪᔨᖓᓂᒃ ᓯᑎᕙᓐ ᑯᕌᓱᒥᒃ ᐊᓯᖏᓐᓂᓗ ᐱᓇᓱᐊᕐᕕᐅᔪᓂᒃ ᐱᕕᓕᒫᑦᓯᐊᑯᑦ ᑐᑭᒐᓱᐊᑦᓯᐊᓚᖓᒐᑦᑕ ᖃᓄᐃᓕᑦᓯᐊᑐᕕᓂᐅᔪᖃᕐᒪᖔᑦ.
ᐱᐅᓯᐅᒋᐊᖃᓲᒃᑯᑦ, ᓄᓇᕕᐅᑉ ᐳᓖᓯᖏᑦ ᖃᐅᔨᑎᑦᓯᓴᐅᑎᒋᔪᕕᓃᑦ ᐃᒻᒥᒍᕐᓱᑎᒃ ᖃᐅᔨᓴᕐᑎᓚᕆᐅᓲᓂᒃ ᐳᓖᓰᑦ ᐱᓇᓱᐊᕐᓱᑎᒃ ᓱᒃᑯᐊᕿᔨᐊᓕᕕᓂᐅᑐᐊᕐᒪᑕ (BEI), ᑖᒃᑯᐊᓗ ᓴᓪᓗᓄᑦ ᖃᐅᔨᓴᕆᐊᑐᑐᓂᒃ ᑖᕗᖕᖓᑎᑦᓯᓯᒪᓕᕐᑐᑦ ᐃᒻᒥᒍᕐᑐᒥᒃ ᖃᐅᔨᓴᕐᓂᖃᓂᐊᒪᑕ.
ᖃᑎᕕᒃ ᓄᓇᓕᓕᒫᑦ ᑲᕙᒪᖓ ᐊᖓᔪᕐᖃᐅᕕᖃᕋᒥ ᓄᓇᕕᐅᑉ ᐳᓖᓯᖏᓐᓂᒃ ᐱᓇᓱᐊᖃᑎᖃᑦᓯᐊᑐᖅ ᓄᓇᕕᐅᑉ ᐳᓖᓯᖏᓐᓂᒃ ᑖᒃᑯᐊ ᐳᓖᓰᑦ ᐃᑲᔪᕐᓯᒪᑦᓯᐊᖁᓪᓗᒋᑦ ᐱᓇᓱᐊᖃᑎᐅᑦᓯᐊᓗᑎᒃ ᖃᐅᔨᓴᕐᑐᓄᑦ. ᐅᖃᕐᓯᒪᑦᓱᑕᓗ ᐱᒻᒪᕆᐅᓂᖓᓂᒃ ᑖᒃᑯᐊ ᖃᐅᔨᓴᕐᑏᑦ ᐆᖄᖃᑎᖃᑦᓯᐊᖁᑦᓱᒋᑦ ᓄᓇᓕᐅᑉ ᓄᓇᕕᐅᓪᓗ ᐊᖓᔪᕐᖃᐅᑎᖏᓐᓂᒃ ᐅᒃᑯᐃᖓᑦᓯᐊᕈᓐᓇᕕᓕᒫᒃᑯᓗ ᓄᐃᑦᓯᓂᖃᖁᑦᓱᒋᑦ ᖃᐅᔨᔭᒥᓂᒃ. ᑲᔪᓯᓚᖓᕗᖓ ᑕᒪᓐᓇ ᑐᑭᓯᒪᔭᐅᑎᑦᓯᐊᕋᓱᐊᕐᓗᒍ ᑲᕙᒪᐅᑎᓕᒫᓄᑦ.
ᐊᒻᒪᓗᒋᐊᓪᓚᑕᐅᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓴᐳᑦᔨᓯᒪᓚᖓᔪᖅ ᓄᓇᓕᐅᑉ ᓯᕗᓕᕐᑎᖏᓐᓂᒃ ᐃᓚᐅᑎᑦᓯᓯᐊᕋᓱᐊᕐᑎᓗᒋᑦ ᑭᓇᑐᐃᓐᓇᑯᓐᓂᒃ ᓴᓪᓗᒥᐅᓂᒃ ᐅᖃᐅᓯᖃᕈᒪᒐᔭᕐᑐᓂᒃ ᐱᓂᕐᓗᓂᐅᓚᐅᕐᑐᖅ ᐱᓪᓗᒍ.