ᐅᖃᐅᓯᑦᓴᖏᑦ ᔮᓐ-ᐱᐊᕐ ᓚᕉᔅ, O.O.M. ᐳᓖᓰᑦ ᐊᖓᔪᕐᖄᖓ, ᓄᓇᕕᐅᑉ ᐳᓖᓯᖏᑦ

ᐅᓪᓗᒥ ᓵᑦᓯᓂ ᓂᑯᕐᕋᕗᖓ ᓱᕐᕋᑕᐅᓯᒪᓪᓚᕆᑦᓱᖓ ᐊᑑᑎᖃᕐᒥᖃᑦᑕᓚᐅᕐᑐᓄᑦ ᐊᓕᐊᓇᖕᖏᑐᕐᔪᐊᓄᑦ ᓄᓇᓕᑦᑎᓂ. ᐃᓅᒍᓐᓀᑐᖃᓚᐅᕐᒪᑦ ᐃᓄᒻᒪᕆᐅᕋᑕᖕᖏᑐᒥᒃ ᐊᒥᓲᓗᐊᕇᕐᑐᖅ ᑖᑦᓱᒪ ᐃᓅᒍᓐᓀᓂᕆᓚᐅᕐᑕᖓ, ᐅᓪᓗᒥᓗ ᐃᓘᓐᓇᑕ ᑖᑦᓱᒪ ᐅᖁᒣᓐᓂᖓᓂᒃ ᓇᑦᓴᓯᖃᑎᒌᑦᑐᐃᓇᐅᑦᓱᑕ.

ᐃᓚᒌᓄᑦ ᑭᑦᓴᑐᓄᑦ ᑕᒪᓐᓇ ᐃᓱᒪᒋᒍᒥᓇᖕᖏᑐᖅ ᐊᑑᑎᔭᖓ, ᐃᓚᑦᔪᒋᓪᓚᕆᑉᐸᓯ. ᖃᐅᔨᒪᕗᖓ ᖃᓄᖅ ᐃᑉᐱᓂᐊᓇᕐᒪᖔᑦ ᓇᒻᒥᓂᖅ ᐃᕐᓃᓯᒪᒻᒥᒐᒪ ᑭᑦᓴᓇᕐᑐᒥᒃ ᓇᓪᓕᐅᑎᔪᖃᕐᑎᓗᒍ. ᐅᖃᐅᑎᒍᒪᕙᑦᓯ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ ᐊᒻᒪᓗ ᓄᓇᕕᒻᒥ ᐳᓖᓰ ᐊᑐᐃᓐᓇᐅᓯᐊᕐᒪᑕ ᐃᓕᑦᓯᓄᑦ. ᓈᓚᒍᓐᓇᖁᒍᑦ ᒪᒥᓴᕐᐸᓕᐊᓂᕆᓂᐊᕐᑕᓯᓐᓂᓗ ᐱᓱᖃᑎᐅᒍᓐᓇᓱᑕ. ᒪᒥᓴᕐᓂᖅ ᐊᑯᓂᕆᓲᖅ ᐅᑉᐱᕈᓱᓕᕆᐊᓪᓚᓂᕐᓗ
ᐊᑯᓃᕐᓂᓴᐅᓲᖑᒻᒥᓱᓂ. ᓄᓇᕕᐅᑉ ᐳᓖᓯᖏᓐᓂᒃ ᐱᓇᓱᐊᖃᑎᖃᖏᓐᓇᓂᐊᕐᖁᖓ ᓄᓇᓕᓯ ᓴᐳᑎᔭᐅᓯᒪᑦᓯᐊᖁᓗᒍ ᓈᒻᒪᕕᐅᑦᓯᐊᓗᓂ, ᓵᑕᑦᓴᐅᒍᑎᖃᑦᓯᐊᑐᓄᑦ ᑲᒪᑦᓯᐊᑐᓄᑦ.

ᑯᐯᒻᒥ ᖃᐅᔨᓴᕐᑏᑦ ᖃᐅᔨᓴᕐᒪᑕ ᑕᒪᓐᓇᓗ ᐊᑑᑎᓪᓚᕆᒋᐊᖃᕐᓱᓂ ᑐᑭᓯᑎᑕᐅᑦᓯᐊᓛᕋᑦᑕ ᓱᔪᖃᕐᓂᒪᖔᑦ. ᑐᓴᕐᑎᓯᒍᑎᓂᒃ ᑐᓂᔭᐅᓯᒪᓕᑐᐊᕈᑦᑕ, ᐃᒣᓕᖓᒐᔭᕐᖂᒫᕈᑎᓕᒫᖏᓐᓂᒃ ᐊᑐᓕᕐᑎᓯᑦᓯᐊᓛᕐᑐᒍᑦ.

ᑐᑭᓯᒪᕗᖓ ᐊᒥᓱᑦ ᐃᓄᐃᑦ ᓈᒻᒪᓴᖕᖏᓂᕋᕐᓂᒥᓂᒃ ᐅᖄᒍᑎᖃᖃᑦᑕᒪᑕ ᐳᓖᓯᖃᕐᓂᒥᒃ ᓄᓇᕕᒻᒥ. ᑖᒃᑯᐊ ᐃᓱᒫᓘᑎᓯ ᑎᒍᒥᐊᑦᓯᐊᑕᕗᑦ, ᑐᓴᕐᓯᒪᑦᓯᐊᑕᒃᑲ. ᖃᕿᐊᕐᓯᒍᑎᐅᔪᑦ, ᓈᒻᒪᓈᑦᓯᐊᑐᐊᕋᒥ ᐱᕕᑦᓴᐅᓲᖑᒻᒪᑕ ᐱᕈᕐᓂᒧᑦ ᐊᓯᑦᔨᒋᐊᕐᓂᒧᓪᓗ. ᖃᐅᔨᒪᑦᓯᐊᖁᕙᑦᓯ ᓈᓚᒐᑦᑕ, ᐋᕐᕿᒋᐊᕈᓐᓇᓱᑕᓗ ᓄᓇᓕᒻᒥᒃ
ᐱᒍᑦᔨᓯᐊᕆᐊᕐᓗᑕ.

ᓯᕗᒧᐊᓐᓂᑎᓐᓂ, ᓄᓇᕕᐅᑉ ᐳᓖᓯᖏᑦ ᓲᖑᓯᑎᑦᓯᒋᐊᕈᒪᔪᑦ ᓄᓇᓕᒻᒥ ᐱᓇᓱᐊᖃᑎᖃᕐᓂᕆᓲᒥᓂᒃ. ᐃᓕᓐᓂᐊᑎᑦᓯᒍᑎᖃᕆᐊᓪᓚᓗᑕᓗ ᐃᓗᕐᖁᓯᖃᑎᒌᖕᖏᑐᓄᑦ, ᓂᖓᕐᑐᓂᓪᓗ ᓄᓪᓚᑎᑦᓯᒋᐊᕆᐅᕐᓴᓂᕐᒥᒃ, ᐊᑐᕐᑕᐅᓗᑎᓪᓗ ᐊᑦᔨᓕᐅᕈᑏᑦ ᐳᓖᓰ ᐊᓐᓄᕌᖏᓐᓃᓲᑦ, ᐱᓇᓱᖃᑎᖃᕐᓗᑕᓗ ᓄᓇᓕᒻᒥ ᐃᓄᓕᕆᔨᓂᒃ ᑖᒃᑯᐊ ᐱᒋᐊᑦᓯᐊᕈᑎᒋᓯᒪᔭᕗᑦ ᐱᕙᓪᓕᒋᐊᕈᑎᒋᑦᓱᒋᑦ. ᐱᓇᓱᐊᕐᑎᓯᒍᑏᑦ ᑖᒃᑯᑑᓗᑎᒃ
ᓈᒻᒪᖏᒃᑲᓗᐊᕐᑎᓗᒋᑦ. ᐊᓯᑦᔨᓂᓪᓚᕆᒃ ᓄᐃᑎᑕᐅᓂᐊᕐᑐᖅ ᐱᓂᐊᕐᓂᑎᓐᓄᑦ, ᐱᒐᓱᐊᕐᓂᑎᓐᓄᑦ ᓵᑕᑦᓴᐅᒍᓐᓇᓂᑦᑎᓄᑦ ᐅᑉᐱᕆᔭᐅᓕᕆᐊᓪᓚᓯᓂᑦᑎᓄᑦ ᖃᐅᑕᒫᑦ.

ᑕᒪᓐᓇ ᐃᓄᑑᑎᕐᖃᔭᖕᖏᑕᕗᑦ. ᐅᖄᖄᑎᒌᑦᓯᐊᖃᑦᑕᕆᐊᖃᕐᑐᒍᑦ, ᓲᓱᒋᐅᑎᑦᓯᐊᓗᑕ ᑐᕌᒐᖃᕐᓗᑕᓗ ᐊᑕᐅᓯᕐᒥᒃ ᓯᕗᒧᐊᒍᑎᒋᓂᐊᕐᑕᑎᓐᓂᒃ ᑕᒡᒐᖓ ᐊᓕᐊᓇᖕᖏᑐᕐᔪᐊᒥᑦ ᐊᑑᑎᓚᐅᕐᑐᒥᑦ.

ᐅᓪᓗᒥ, ᐱᓇᓱᐊᖃᑎᖃᕈᒪᕗᖓ. ᐳᓖᓯᓄᑦ ᐊᖓᔪᕐᖄᕆᔭᐅᑦᓱᖓ, ᐱᓇᓱᖃᑎᒃᑲᓗ ᓯᕗᓂᕐᒥ ᐱᓇᓱᐊᓚᖓᕗᒍᑦ ᑕᒡᒐᓂ ᓄᓇᖃᕐᑐᓕᒫᑦ ᖃᐅᔨᒪᑦᓯᐊᕈᓐᓇᓯᖁᓪᓗᒋᑦ ᑕᑯᔭᐅᓂᕐᒥᓂᒃ, ᑐᓴᕐᑕᐅᓂᕐᒥᓂᒃ ᓴᐳᒻᒥᔭᐅᓂᕐᒥᓂᓪᓗ.

ᐱᓇᓱᐊᖃᑎᒌᓪᓗᑕ, ᒪᒥᒍᓐᓇᑐᒍᑦ. ᐱᓇᓱᐊᖃᑎᒌᓪᓗᑕ, ᐅᑉᐱᕈᓱᓐᓂᑖᕆᐊᓪᓚᒍᓐᓇᑐᒍᑦ.

ᓇᑯᕐᒦᒃᔭ.