ᑲᑐᑦᔨᔪᑦ ᑕᑯᓂᐊᑲᑦᑕᑎᖏᑦ ᒪᓐᑐᔨᐊᓪ ᐳᓖᓯᖏᑦᑕ ᐊᒻᒪᓗ ᓄᓇᕕᐅᑉ ᐳᓖᓯᖏᑦᑕ: ᐱᕙᓪᓕᓇᕐᕙᓗᓐᓂᖓᓂᒃ ᑕᑯᒍᑎᑦᓭᑦ ᓄᐃᑦᓴᐅᑎᒋᔪᑦ
NPS ᑕᑯᓂᐊᑲᑦᑕᑎᖏᑦ ᐳᓖᓰᑦ ᕚᓐᓵᓐᑦ-ᐅᓕᕕᐄ ᓚᓛᑦᓯᐊᑦ, ᐋᒥᐊᑦ ᑕᖄᒻᓂ, ᕖᓕᒃᔅ ᕃᒪᓐᑦ ᐊᒻᒪᓗ ᔮᓐ-ᓯᒨᓐ ᐱᐊᕐᓈᑦᓯᐊᔅ (ᐊᑦᔨᖑᐊᑉ ᑕᓕᕐᐱᐊᓂ ᓴᐅᒥᕐᒥᒃ ᑕᓕᕐᐱᒧᑦ) ᑲᑎᓯᑦᓱᑎᒃ ᒪᓐᑐᔨᐊᓪ ᐳᓖᓯᖏᑦᑕ ᑕᑯᓂᐊᑲᑦᑕᑎᖏᓐᓂᒃ SPVM-ᑯᑦ ᓯᓚᕐᖃᑎᒌᓄᑦ ᐳᓖᓯᒃᑯᖏᑦᑕ ᓴᓂᐊᓂ.
ᓯᑉᑎᒻᐱᕆ 23 ᐊᒻᒪᓗ 30 ᐱᓇᓱᐊᕈᓯᖏᑦᑕ ᐃᓗᐊᓂ, ᐳᓖᓰᑦ ᐃᓚᐅᔪᑦ ᐳᓖᓯᒃᑯᑦ ᐱᒍᑦᔨᔨᖏᓐᓄᑦ ᒪᓐᑐᔨᐊᓪ ᐃᓪᓗᒐᓴᓕᖓᓂ (SPVM) ᐊᒻᒪᓗ ᓯᑕᒪᐅᔪᕐᑐᑦ ᐳᓖᓰᑦ ᐱᓯᒪᔪᑦ ᓄᓇᕕᒻᒥ ᐳᓖᓯᒃᑯᑦ ᐱᒍᑦᔨᔨᖏᓐᓂᒃ (NPS) ᑲᑎᒪᑦᓱᑎᒃ ᑕᑯᓂᐊᑲᑕᓚᐅᔪᔪᑦ ᑕᐅᓐᑕᐅᓐᒥ (Ville-Marie East), Ville-Marie West, Westmount, Plateau-Mont-Royal ᐊᒻᒪᓗ ᑐᐊᕚᓪᒥ ᓯᓚᕐᖃᑎᒌᕝᕕᓂᒃ ᒪᓐᑐᔨᐊᓪ ᐃᓗᐊᓂ.
ᐅᓪᓗᓂ ᓯᑕᒪᓂ ᐱᓇᓱᐊᕈᓯᖅ ᑕᒫᑦ, ᑲᔪᓯᑎᑦᓯᓯᒪᔪᑦ 100 ᐅᖓᑖᓄᑦ ᑫᕙᓪᓚᒍᓯᕐᓂᒃ ᑲᑎᒪᑦᓱᑎᒃ ᑕᑯᓂᐊᖃᑲᑦᑕᓂᕐᒥᓂ ᑲᑎᓯᖃᑦᑕᓱᑎᒃ ᐃᓄᓐᓂᒃ ᓄᓇᓯᒪᔪᓂᒃ ᐅᕝᕙᓘᓐᓃᑦ ᑎᑭᓯᒪᔪᓂᒃ ᒪᓐᑐᔨᐊᒻᒥ.
ᐱᕕᓕᐅᕐᑐᑦ ᐅᖃᐅᑦᔫᑎᖃᑦᑕᓂᕐᒥᒃ ᐊᒻᒪᓗ ᐃᓱᒫᓗᐃᕐᑎᓯᓂᕐᒥᒃ ᐊᑦᑕᕐᓇᑐᒦᒋᐊᒥᒃ
ᑕᒪᓐᓇ ᐱᒋᐊᕈᑕᐅᔪᖅ ᐊᑐᕆᐊᖃᓯᓚᐅᔪᕗᖅ ᐱᓗᑲᓐᓂᖃᖃᑦᑕᓚᐅᕐᑎᓗᒍ ᐊᒥᓲᖕᖏᑐᑦ ᑕᕐᖀᑦ ᑭᖑᓂᕐᒥ ᓄᓇᕕᐅᑉ ᐃᓗᐊᓂ, ᓱᕐᕃᓯᒪᓚᐅᔪᒻᒪᑕ ᐊᑦᑕᓇᖕᖏᑐᒦᒋᐊᒥᒃ ᐃᓱᒪᓂᖏᓐᓂᒃ ᐃᓄᐃᑦ ᒪᓐᑐᔨᐊᓪᒥ.
ᑌᒣᓕᖓᔪᒥᒃ ᑲᒪᒋᐊᖃᓕᕐᒪᑕ, ᑲᑐᑦᔨᓗᓂ ᓱᒋᐊᕐᓂᓴᒥᒃ ᐋᕐᕿᓱᐃᓕᓚᐅᔪᔪᑦ SPVM-ᑯᑦ ᐊᒻᒪᓗ NPS-ᑯᑦ ᐃᓗᐊᒍᑦ, ᑖᒃᑯᐊ ᐱᓇᓱᖃᑎᖃᕐᑎᓗᒋᑦ ᑲᑎᕕᒃ ᓄᓇᓕᒫᑦ ᑲ”ᒪᖓᓂᒃ (KRG), ᒪᓐᑐᔨᐊᓪ ᐃᓪᓗᒐᓴᓕᖓᓂᒃ ᐊᒻᒪᓗ ᐃᓄᐃᑦ ᑎᒥᖁᑎᖏᓐᓂᒃ.
ᑖᑦᓱᒧᖓ ᐊᑕᐅᑦᓯᑯᑦ ᑕᑯᓂᐊᑲᑦᑕᓂᕐᒧᑦ ᐃᓚᐅᑎᓪᓗᒍ, ᐳᓖᓰᑦ ᐱᓇᓱᑦᑎᖏᑦ SPVM-ᑯᓂ ᐊᒻᒪᓗ NPS-ᑯᓐᓂ ᐱᓇᓱᖃᑎᒌᓚᐅᔪᔪᑦ ᐃᑲᔪᕐᑐᓱᑎᒃ ᐅᖃᖃᑎᒋᓐᓂᒥᒃ, ᐃᓄᓐᓂᓗ ᐃᓱᒫᓗᐃᕐᑎᓯᒍᑎᒋᒋᐊᕐᓱᒍ ᐊᒻᒪᓗ ᑲᔪᖏᕐᓭᒍᑎᒋᑦᓱᒍ ᐱᓂᕐᓗᑕᐅᒪᔪᓂᒃ ᐊᒻᒪᓗ ᑕᑯᓐᓇᑐᕕᓂᕐᓂᒃ ᐅᖃᖁᓗᒋᑦ ᖃᓄᑐᐃᓐᓇᖅ ᖃᓄᐃᓘᕐᓂᕕᓂᕐᒥᒃ ᐃᓱᐃᓪᓕᑎᑦᓯᓱᓂ ᐊᑦᑕᓇᕐᑐᒦᖕᖏᓂᖓᓂᖓᓂᒃ ᐊᓯᖏᑕᓘᓐᓃᑦ ᐊᑦᑕᓇᕐᑐᒦᖕᖏᓂᖓᓂᒃ.
ᓂᐳᕐᓇᑐᖅ ᐊᑐᕐᓱᒍ ᐳᓖᓯᓄᑦ
ᑌᒪᖕᖓᐅᓂᕐᓴᖅ, ᒪᕐᕉᒃ NPS-ᑯᑦ ᐳᓖᓯᖏᒃ ᑕᑯᓂᐊᑲᑦᑕᓚᐅᔪᔫᒃ ᐁᑉᐸᖃᕐᑎᓱᑎᒃ ᒪᕐᕉᓂᒃ SPVM-ᑯᑦ ᐳᓖᓯᖏᓐᓂᒃ ᐱᓱᕋᔭᑦᑎᓂᒃ ᐅᕝᕙᓘᓐᓃᑦ ᓯᓚᕐᖃᑎᒌᑦ ᓄᓇᓕᖏᓐᓂ ᐳᓖᓯᓂᒃ ᐱᓯᒪᔪᓂᒃ ᖃᓂᒋᔭᐅᔪᓂᒃ ᐳᓖᓯᒃᑯᓂᒃ. ᑖᒃᑯᐊ ᑕᑯᓂᐊᑲᑦᑕᑐᑦ ᑲᑎᓯᓚᐅᔪᒻᒥᔪᑦ SPVM-ᑯᑦ ᐱᓇᓱᖃᑎᒌᖏᓐᓂᒃ ᑐᕌᖓᑐᐃᓐᓇᑐᓂᒃ ᐊᓯᐅᔪᓄᑦ, ᐃᓚᒌᑦ ᕿᓂᕐᓂᖏᓐᓄᑦ ᐊᒻᒪᓗ ᐃᓄᒻᒥᒃ ᑎᒍᐃᓐᓀᔪᓄᑦ (EDRE) ᐊᒻᒪᓗ ᐃᖏᕐᕋᔭᑲᑦᑎᓂᒃ ᐊᓂᕐᕋᖃᖕᖏᑐᑦ ᐃᓂᑦᓴᓄᑦ ᑐᕌᕐᑎᓯᔨᖏᓐᓂᒃ ᐊᒻᒪᓗ ᑲᒪᒋᐊᕐᑐᑎᖏᓐᓂᒃ (EMRII).
ᐁᑉᐸᕆᑦᑎᓯᓂᖅ ᐳᓖᓯᓂᒃ ᑕᒪᖏᓐᓂᒃ SPVM-ᑯᓐᓂᒃ NPS-ᑯᓂᓪᓗ ᐱᓯᒪᔪᓂᒃ ᓯᕗᓪᓕᐸᐅᕗᖅ ᑌᒣᓘᕐᓂᐅᓱᓂ ᑕᒪᖏᓐᓄᑦ ᐳᓖᓯᓄᑦ. ᐱᓇᓱᑦᑎᑕᐅᔪᓕᒫᑦ ᑕᒪᑐᒥᖓ ᐊᑐᕐᑕᒥᓂᒃ ᓂᐳᕈᑎᖃᓚᐅᔪᔪᑦ ᐊᑐᕆᐊᓪᓚᖃᑦᑕᕈᒪᑦᓱᒍᓗ. ᑖᒃᑯᐊ ᐳᓖᓰᑦ ᑫᒥᑦᓯᖃᑦᑕᓚᐅᔪᔪᑦ ᐱᕙᓪᓕᕆᐊᕈᑎᑦᓴᓂᒃ ᑕᒪᓐᓇ ᐃᑲᔪᕐᑎᒌᓐᓂᖅ ᑲᔪᓯᒍᓐᓇᓂᐊᕐᒪᑦ.
ᖃᓄᖅ ᐅᖃᕈᓐᓇᓂᖅ ᐳᓖᓯᓄᑦ
ᐳᓖᓰᑦ ᐅᖃᐅᑦᔨᒋᐊᓪᓚᖃᑦᑕᓚᐅᔪᔪᑦ ᐃᓄᓐᓂᒃ ᓄᓇᓯᒪᔪᓂᒃ ᐅᕝᕙᓘᓐᓃᑦ ᑎᑭᓯᒪᔪᓂᒃ ᒪᓐᑐᔨᐊᓪᒧᑦ ᐱᒻᒪᕆᐅᒋᐊᖓᓂᒃ ᐅᖃᕐᓗᓂ ᐳᓖᓯᓄᑦ ᑲᑉᐱᐊᓱᐊᑎᑕᐅᑐᐊᕈᑎᒃ, ᓯᕘᕋᑎᑕᐅᑐᐊᕈᑎᒃ, ᐱᖁᔭᑎᒍᑦ ᐱᓄᕐᓗᑕᐅᑐᐊᕈᑎᒃ ᐊᓯᐊᒍᓪᓘᓃᑦ ᖃᓄᑐᐃᓐᓇᖅ ᐃᓱᒫᓗᑐᐊᕈᑎᒃ.
ᒪᓐᑐᔨᐊᓪᒥ
- ᐅᐃᓇᕐᐸᑦ, ᐅᖃᓕᒪᓗᑎᑦ 911-ᒧᑦ.
- ᐅᐃᒪᓇᖕᖏᐸᑦ, ᐅᖃᕐᓗᑎᑦ ᖃᓂᑕᓯᓐᓂ ᐳᓖᓯᒃᑯᓄᑦ (PDQ) ᑐᕃᓐᓇᓗᒋᑦ ᓯᕙᓂᕐᓗᑎᑦ 514-280-01XX-ᒧᑦ (XX ᐊᑦᔨᐅᕗᖅ PDQ-ᓯ ᑭᓯᑦᓯᑎᖓᓄᑦ). ᓇᓗᓀᓚᖓᓗᒍ PDQ-ᓯ, ᐳᓛᕐᓗᑎᑦ SPVM-ᑯᑦ ᐱᑐᕝᕕᖓᓂᒃ ᐅᕙᓂ: spvm.qc.ca/fr/pdq.
- ᐱᕕᖃᕐᒥᔪᖅ ᐅᖃᕐᓗᓂ ᐅᑯᓄᖓ ᖃᐅᔨᑎᑦᓯᓂᖅ-ᐱᓂᕐᓗᕈᑎᓂᒃ ᒪᓐᑐᔨᐊᓪ (Info-Crime Montréal) ᑭᓇᐅᒻᒪᖔᕐᐱᑦ ᐅᖃᕈᓐᓀᓗᑎᑦ ᐊᒻᒪᓗ ᐅᖃᕐᑕᐅᓂᐊᕈᓐᓀᓗᑎᑦ ᓯᕙᓂᕐᓗᑎᑦ 514-393-1133-ᒧᑦ ᐊᑐᕐᓗᑎᓪᓘᓃᑦ ᑐᓴᕐᑎᓯᒍᑎᐅᑉ ᐊᓪᓚᕕᑦᓴᖓᓂᒃ ᐱᓗᒍ ᐱᑐᕝᕕᒥᒃ ᐅᕙᖕᖓᑦ infocrimemontreal.ca.
ᓄᓇᕕᒻᒥ
- ᑭᓇᐅᓂᕐᓂᒃ ᐅᖃᕈᓐᓀᓗᑎᑦ ᑐᓴᕐᑎᓯᒍᒪᒍᕕᑦ, ᐅᖃᕐᓗᑎᑦ ᐱᓂᕐᓗᕈᑎᓂᒃ ᓄᕐᖃᑎᑦᓯᔨᓄᑦ (Crime Stoppers) ᐅᕙᓂ 1-800-711-1800 ᐅᕝᕙᓘᓐᓃᑦ ᐊᑐᕐᓗᑎᑦ ᖃᕆᑕᐅᔭᒃᑯᑦ ᖃᐅᔨᑎᑦᓯᒍᑎᒥᒃ ᐊᓪᓚᕕᑦᓴᓂᒃ ᐅᕙᓂ echecaucrime.com.
- ᐅᖃᔭᒪᐅᑕᐅᒋᐊᖃᖕᖏᑐᓂᒃ ᖃᐅᔨᒪᒍᑎᓂᒃ ᓄᐃᑦᓯᒍᒪᒍᕕᑦ ᐃᒥᐊᓗᐃᑦ ᐋᖓᔮᓐᓇᑐᐃᓪᓘᓃᑦ ᑎᕐᓕᐊᓯᒍᑕᐅᓂᖓ ᐱᑦᔪᑎᒋᓗᒍ, ᑐᓴᕐᑎᓯᒍᑎᒥᒃ ᐊᐅᓪᓚᑎᑦᓯᓗᑎᑦ ᐅᕗᖓ tips@nunavikpolice.ca.