ᐅᐃᒪᓇᕐᑐᖃᕐᑎᓗᒍ ᐅᖃᓕᒪᕕᒃ

ᐅᐃᒪᓇᕐᑐᖃᕐᑎᓗᒍ ᐅᖃᓕᒪᕕᐅᑉ ᐱᒍᑦᔨᓂᖓ ᐃᖏᕐᕋᓯᓛᓕᕐᑐᖅ ᐅᒥᐅᔭᒥ ᐱᒋᐊᕐᓗᓂ ᒫᑦᔨ 6, 2023-ᒥ.

ᐱᕙᓪᓕᐊᓯᒪᓂᖓ

ᑐᖁᓚᐅᕐᑎᓗᒍ ᐳᓖᓯ ᓯᑏᕝ ᑌᕇ ᒫᑦᔨ 2, 2013-ᒥ, ᑭᓪᓕᓯᓂᐊᕈᑎᖏᑦ ᐱᓇᓱᕝᕕᒥ ᐃᓗᓯᕐᓱᓂᐅᑉ ᐊᒻᒪᓗ ᐊᑦᑕᓇᖕᖏᓂᐅᑉ ᐊᑦᔨᒌᒍᑕᐅᓂᖓᑕ ᐱᐅᓯᒋᕆᐊᓕᖏᓐᓄᑦ ᑲᑎᒪᔩᑦ (CNESST) ᑲᔪᓯᑎᑕᐅᓚᐅᕐᓯᒪᔪᑦ. ᑐᓴᕐᑎᓯᒍᑎᖏᑦ ᐅᖃᕐᓯᒪᔪᑦ KRG-ᑯᑦ ᓯᖁᒥᑦᓯᔪᕕᓂᐅᓂᖓᓂᒃ ᐃᓚᖓᓂᒃ 51(3) ᐱᖁᔭᒥ ᐱᑦᔪᑎᓕᒻᒥ ᐱᓇᓱᕝᕕᒥ ᐃᓗᓯᕐᓱᓂᕐᒥᒃ ᐊᒻᒪᓗ ᐊᑦᑕᓇᖕᖏᓂᕐᒥᒃ (CQLR, c. S-2.1) ᐱᑦᔪᑎᖃᕐᑎᓗᒍ ᐳᓖᓰᑦ ᐃᑲᔪᕐᑕᐅᒍᒪᔪᓄᑦ ᙯᖁᔭᐅᑦᓱᑎᒃ ᑲᒪᔪᕕᓂᕕᓂᖓᓂᒃ. ᑕᒪᑐᒥᖓ ᐱᑦᔪᑎᖃᕐᑎᓗᒍ, CNESST-ᑯᑦ ᐊᑐᕆᐊᖃᕐᑎᓯᓯᒪᔪᑦ KRG-ᑯᑦ ᐋᕐᕿᑎᑦᓯᓂᖓᓂᒃ ᖃᓄᐃᓕᖓᓂᐅᔪᒥᒃ. ᓂᒫᓪᓚᕈᑎᖓᓂ CNESST-ᑯᑦ ᑐᓴᕐᑎᓯᒍᑎᖓᓄᑦ, KRG-ᑯᑦ ᓱᒋᐊᕈᑎᑦᓴᓂᒃ ᐸᕐᓇᕈᑎᖓ ᐃᓚᖃᓚᐅᕐᓯᒪᔪᖅ ᑲᔪᓯᑎᑦᓯᒐᔭᕐᓂᖓᓂᒃ ᐅᐃᒪᓇᕐᑐᖃᓕᕐᐸᑦ ᐅᖃᓕᒪᑲᑦᑕᕕᒻᒥᒃ ᓄᓇᕕᒻᒧᐊᓕᖓᔪᒥᒃ.

2013-ᒥᓂᒃ, ᐅᖃᖃᑎᒌᒍᑏᑦ ᑲᔪᓯᑎᑦᓯᒍᑎᑦᓴᓂᒃ ᑌᒣᑦᑐᒥᒃ ᐅᖃᓕᒪᕕᒻᒥᒃ ᑲᔪᓯᖏᓐᓇᓕᒫᕐᓯᒪᔪᑦ. ᑭᓯᐊᓂ, ᓄᓇᖓᑕ ᐱᓇᓲᑎᑦᓴᑎᒍᑦ ᐱᕕᑭᓪᓕᑖᕈᑎᖏᑦ ᐱᑦᔪᑕᐅᑎᓪᓗᒋᑦ, ᑲᔪᓯᑎᑦᓯᓂᖅ ᐅᖃᓕᒪᕕᒻᒥᒃ ᐅᓪᓗᒥᒧᑦ ᐱᕕᖃᓚᐅᕐᓯᒪᖕᖏᑐᖅ. ᑕᒐ ᐱᕕᖃᓕᕐᖁᖅ ᑌᒣᑦᑐᒥᒃ ᐱᓇᓱᐊᑦᓴᒥᒃ ᑲᔪᓯᑎᑦᓯᒐᔭᕐᓗᓂ ᖃᒻᒥᖅ ᑕᒫᓂᒃᑯᑦ ᐋᕐᕿᓱᐃᓚᐅᕐᑎᓗᒋᑦ ᐃᕙᓘᔭᒃᑯᑦ-ᑕᑯᓐᓇᐅᑎᓗᓂ ᖃᕆᑕᐅᔭᓄᑦ ᐱᑐᑦᓯᒪᐅᑎᒍᑎᓂᒃ,

2019-ᒥ, ᐱᓇᓱᑦᑕᐅᔪᒧᑦ ᑲᑎᒪᔨᐊᐲᑦ ᐃᓐᓄᓯᒪᔪᑦ ᑭᒡᒐᓂᒃ ᓄᓇᕕᒻᒥ ᐳᓖᓯᒃᑯᓄᑦ, ᓄᓇᖃᕐᖄᓯᒪᔪᓕᕆᔩᑦ ᐊᓪᓚᕕᒻᒪᕆᖓᓄᑦ ᐊᒻᒪᓗ ᑐᕐᖃᑕᕐᕕᒧᑦ ᐃᓄᓕᒫᑦ ᓴᑑᒪᓂᖓᓄᑦ (MPS) ᐋᕐᕿᑕᐅᓕᓚᔪᔪᑦ. ᑖᒃᑯᐊ ᑲᑎᒪᔨᐊᐲᑦ ᑲᑎᒪᓂᖏᓐᓂ, ᐊᖏᕐᓯᒪᔪᑦ ᕿᒥᕐᕈᓚᖓᓗᑎᒃ ᓇᓪᓕᑳᕈᑎᑦᓴᓕᒫᓂᒃ ᐊᒻᒪᓗ ᐱᓇᓱᐊᑦᓴᐅᑉ ᐊᖏᔪᓕᒐᕐᓂᖓᓂᒃ ᐊᒻᒪᓗ ᐊᑐᐃᓐᓇᕈᑦᑎᕆᓚᖓᓗᑎᒃ ᐆᑦᑑᑎᒥᒃ ᓂᐳᕐᑎᓯᒐᔭᕐᑐᒥᒃ KRG-ᑯᑦ ᐱᒋᐊᓕᖏᓐᓂᒃ.  ᐆᑦᑑᑎᑦᓴᖅ ᓂᕈᐊᕐᑕᐅᔪᖅ ᑌᓐᓇᐅᓚᐅᔪᔪᖅ ᒪᑭᑕᔪᑐᖃᐅᑉ ᐅᐃᒪᓇᕐᑐᖃᕐᐸᑦ ᐅᖃᓕᒪᕕᐅᑉ ᑭᐅᒍᑎᒋᖃᑦᑕᕋᔭᕐᑕᖓ ᓄᓇᕕᒻᒥᐅᑦ ᐅᖃᓕᒪᓕᕐᐸᑕ ᐱᒍᑦᔭᐅᒍᒪᓗᑎᒃ.

ᐊᐅᒡᒍᔅᑎ 9, 2022-ᒥ MSP-ᑯᑦ ᐅᖃᓚᐅᔪᔪᑦ ᓄᓇᕕᐅᑉ ᐳᓖᓯᖏᓐᓄᑦ (NPS) ᑯᐯᒃᑯᑦ ᐳᕐᑐᓂᕐᐹᖏᑦ ᐊᖏᕐᑐᕕᓂᐅᓂᖓᓂᒃ ᐊᖏᖃᑎᒌᒍᑎᒥᒃ ᐱᑦᔪᑎᓕᒻᒥᒃ ᐅᑎᕐᑎᓯᓂᕐᒥᒃ ᑮᓇᐅᔭᕐᑑᑎᕕᓂᕐᓂᒃ ᐊᑐᓕᕐᑎᓯᓂᕐᒧᑦ ᐆᑦᑐᕋᐅᑎᒥᒃ ᐱᓇᓱᐊᑦᓴᒥᒃ ᐊᑯᓐᓂᒥ ᑯᐯᒃᑯᑦ ᑲᕙᒪᖓᓄᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᑐᕌᕐᑎᓗᒍ ᐅᖃᓕᒪᕕᖃᕐᑎᓯᓂᕐᒧᑦ ᐅᐃᒪᓇᕐᑐᖃᓕᕐᐸᑦ ᓯᑕᒪᓂ ᐅᑭᐅᕐᑕᑐᒥ ᓄᓇᓕᓐᓂ.

ᑖᓐᓇ ᐊᖏᖃᑎᒌᒍᑎ ᐅᖃᕐᓯᒪᔪᖅ ᐃᓂᓪᓚᕈᑎᓂᒃ ᐊᒻᒪᓗ ᒪᓕᒐᐅᓚᖓᔪᓂᒃ ᑯᐯᒃᑯᑦ ᐊᑭᓖᓂᖓᓄᑦ ᑮᓇᐅᔭᑎᒍᑦ ᐃᑲᔪᕐᓯᐅᑎᓂᒃ ᑎᑭᐅᑎᒍᓐᓇᑐᓂᒃ $900,000-ᓄᑦ KRG-ᑯᓅᕐᑎᓗᒋᑦ ᐊᑐᕐᓂᐊᑕᖏᓐᓂ ᐊᕐᕌᒍᒥ ᐊᑕᐅᓯᕐᒥ ᐆᑦᑐᕋᐅᑎᒥᒃ ᐱᓇᓱᐊᕈᑎᒧᑦ ᐅᖃᓕᒪᕕᖃᕐᑎᓯᓂᕐᒥᒃ ᐅᐃᒪᓇᕐᑐᖃᕐᓕᕐᐸᑦ ᐅᖃᓕᒪᔪᓂᒃ ᓄᓇᕕᒻᒥᒃ.

ᐊᖏᕐᓂᖓᑦ ᐱᕕᑖᕐᑎᓯᔪᖅ NPS-ᑯᑦ ᐱᒋᐊᕐᑎᓯᓂᖓᓂᒃ ᐱᓇᓱᐊᑦᓴᒥᒃ ᐅᑭᐅᕐᑕᑐᒥᐅᑦ ᓄᓇᓕᖏᓐᓂ ᑰᑦᔪᐊᕌᐱᒻᒥ, ᐅᒥᐅᔭᒥ, ᐃᓄᒃᔪᐊᒥ ᐊᒻᒪᓗ ᐳᕕᕐᓂᑐᒥ. ᓭᓐᑦ-ᔪᔅᑖᔅ ᐃᓪᓗᒐᓴᓕᖓᑕ ᐅᐃᒪᓇᕐᑐᖃᓕᕐᐸᑦ ᐅᖃᓕᒪᕕᖓ ᓂᕈᐊᕐᑕᐅᓯᒪᔪᖅ ᓄᓇᕕᒻᒥᐅᓄᑦ ᑐᓂᔨᒍᓐᓇᒪᑦ ᐱᓇᓱᑦᑎᓚᕇᑦ ᐱᒍᑦᔨᒍᑎᖏᓐᓂᒃ ᐊᒻᒪᓗ ᓈᒻᒪᓂᕐᐸᐅᒪᑦ NPS-ᑯᑦ ᐃᖏᕐᕋᓂᕐᒥᒍᑦ ᑭᖕᖒᒪᑦᓯᒍᑎᖏᓐᓄᑦ. ᐅᖃᓕᒪᐅᑎᒥᒃ ᐊᐅᓚᑦᓯᔩᑦ ᑭᐅᖃᑦᑕᓚᖓᔪᑦ ᓄᓇᕕᒻᒥᐅᑦ ᐅᖃᓕᒪᓕᕐᐸᑕ, ᑌᒪ ᐳᓖᓯᓂᒃ ᐁᑎᑦᓯᖃᑦᑕᓗᑎᒃ ᓇᔪᕐᑕᐅᔪᒧᑦ ᐃᑲᔪᕐᑕᐅᓂᕐᒥᒃ ᐱᕕᐅᒋᐊᓕᒻᒧᑦ.

ᐱᕙᓪᓕᐅᑎᖏᑦ

ᐱᕙᓪᓕᐅᑏᑦ ᐊᑐᕐᓂᒧᑦ ᐅᖃᓕᒪᕕᒻᒥᒃ ᐃᓚᖃᕐᖁᑦ ᒪᑯᓂᖓ:

• ᒪᓕᑦᓯᐊᓂᖅ ᐱᖁᔭᒥᒃ ᐱᑦᔪᑎᓕᒻᒥᒃ ᐱᓇᓱᕝᕕᒥ ᐃᓗᓯᕐᓱᓂᕐᒥᒃ ᐊᒻᒪᓗ ᐊᑦᑕᓇᖕᖏᓂᕐᒥᒃ;
• ᓭᓐᑦ-ᔪᔅᑖᔅ ᐅᖃᓕᒪᕕᖓ ᒪᓕᑦᓯᐊᕆᐊᓕᒃ ᒪᑭᑕᔪᑐᖃᕐᓂᒃ ᑯᐯᒻᒥ ᐱᐅᓯᐅᒋᐊᓕᓐᓂᒃ ᑭᐅᔪᖃᓕᕈᓂ ᐅᐃᒪᓇᕐᑎᓗᒍ ᐅᖃᓕᒪᔪᓂᒃ;
• ᑖᓐᓇᓭᓐᓇᖅ ᐅᐃᒪᓇᕐᑐᖃᕐᐸᑦ ᐅᖃᓕᒪᕕᐅᑉ ᑭᓯᑦᓯᑎᖓ ᐊᑐᖃᑦᑕᓚᖓᔪᖅ ᐃᑲᔪᕐᑎᑖᕈᑕᐅᓗᓂ ᐳᓖᓯᓂᒃ: 819-XXX-9111;
• ᐁᑎᑦᓯᔩᑦ ᐃᓕᓐᓂᐊᓯᒪᔪᑦ ᑕᒪᑐᒥᖓ ᑭᐅᒍᓐᓇᖃᑦᑕᓚᖓᔪᑦ ᐅᖃᓕᒪᔪᓂᒃ 24 ᐃᑲᐅᕐᓃᑦ ᓈᓗᒋᑦ ᐅᓪᓗᑕᒫᑦ, 7-ᓂ ᐅᓪᓗᓂ ᐱᓇᓱᐊᕈᓯᑕᒫᑦ (24/7);
• ᐃᓄᒃᑎᑐᑦ ᑐᓵᔨᖃᕐᑎᓯᖃᑦᑕᓚᖓᔪᑦ ᐅᖃᓕᒪᔪᓂᒃ ᖃᓪᓗᓈᑎᑐᑦ ᐅᐃᒍᐃᑎᑐᓪᓘᓃᑦ ᐅᖃᕈᓐᓇᖏᑦᑐᓂᒃ;
• ᓈᒻᒪᑐᑦ ᐃᑲᔪᕐᑐᓭᑦ ᐁᑎᑕᐅᖃᑦᑕᓚᖓᔪᑦ ᐊᑯᓂᕆᓂᖓ ᐃᑯᓪᓚᓕᕐᑎᓗᒍ (ᐃᒫᒃ ᓲᕐᓗ, ᐃᓄᒻᒧᑦ ᐅᖃᓕᒪᔪᓄᑦ ᐳᓖᓯᒃᑯᑦ ᐅᐃᒪᓇᕐᑐᓯᐅᑎᖓᓄᑦ ᐃᑯᐊᓪᓚᑐᖃᕐᑎᓗᒍ, ᐁᑎᑦᓯᔨ ᐁᑎᑦᓯᒍᓐᓇᑐᖅ ᐃᑯᐊᓪᓚᑐᕐᓂᐊᑎᓂᒃ ᐊᒻᒪᓗ ᐳᓖᓯᓂᒃ ᐊᑕᐅᑦᓯᑯᑦ);
• ᐊᑯᓂᐅᖕᖏᓂᕐᓴᖅ ᐱᒍᑕᐅᒍᓐᓇᑐᖅ ᐃᑲᔪᕐᑎᓴᒋᐊᓪᓚᓂᒃ (ᐃᒫᒃ ᓲᕐᓗ, ᐳᓖᓯ ᐁᑎᑦᓯᔨᒥᒃ ᐅᖃᓕᒪᑎᑦᓯᒍᓐᓇᑐᖅ ᐋᓐᓂᑐᓂᒃ ᐁᑦᓯᓵᕈᑎᒥᒃ ᐅᕝᕙᓗᓘᓐᓃᑦ ᓯᕗᓪᓕᐸᐅᑦᓱᑎᒃ ᑕᑯᓂᐊᕐᑎᓂᒃ);
• ᐅᖃᓕᒪᓂᓕᒫᑦ ᓂᐱᓕᐅᕐᑕᐅᔪᑦ ᐊᒻᒪᓗ ᓂᑦᔮᑎᑕᐅᒋᐊᓪᓚᕈᓐᓇᓱᑎᒃ;
• NPS-ᑯᑦ ᐊᖓᔪᕐᖄᖏᑦ ᑲᒪᒋᐊᓪᓚᖃᑦᑕᓚᖓᔪᑦ ᓱᓇᒐᓚᓐᓂᒃ ᐊᑦᑐᐊᔪᓂᒃ ᐅᖃᓕᒪᒍᑎᓕᒫᓄᑦ ᐅᖃᓕᒪᕕᒻᒥ ᑭᐅᔭᐅᔪᓄᑦ.

ᐊᐱᕆᐅᑕᐅᒍᐊᕐᑐᐃᑦ