BEI
BEI
ᐃᒻᒥᒎᕐᑐᖅ ᖃᐅᔨᓴᕐᓂᓂᒃ ᑲᒪᕕᒃ ᑲᕙᒪᒃᑯᑦ ᑎᒥᖁᑎᖓ ᑎᒍᒥᐊᕐᓂᖃᕐᓱᓂ ᐳᓖᓯᓂᒃ ᑎᓕᔭᐅᒪᒍᑎᑖᓲᓂᒃ. ᓄᑭᓖᑦ ᐊᑖᓃᑦᑐᓂᒃ ᐳᓖᓯᓄᑦ ᐱᖁᔭᐅᑉ. ᑎᒥ ᖃᐅᔨᓴᕙᓪᓗᓲᖅ ᐃᓄᒃ ᐋᓐᓂᒪᕆᑦᑐᕕᓂᐅᑐᐊᕐᒪᑦ, ᖁᑭᐅᑎᒧᑦ ᐋᓐᓂᓚᕿᔪᕕᓂᐅᑐᐊᕐᒪᑦ, ᐅᕝᕙᓘᓐᓃᑦ ᑐᖁᔪᕕᓂᐅᑐᐊᕐᒪᑦ ᐳᓖᓰᓄᑦ ᑲᒪᒋᔭᐅᓂᖃᕐᓂᒥᓂ. ᖃᐅᔨᓴᕈᑎᖃᓲᒍᒻᒥᔪᑦ ᐸᑦᓯᑎᐅᒻᒪᑦ ᐳᓖᓯ ᐱᓇᓱᐊᕐᓱᓂ ᐃᑦᓯᒍᓱᓐᓂᒥᓄᑦ ᑲᒪᒃᑭᓗᑦᑐᕕᓂᐅᓂᕋᕐᑕᐅᓱᓂ.
ᐊᖓᔪᕐᖄᖃᕋᓗᐊᕐᓱᑎᒃ ᓄᓇᓕᓐᓂ ᐊᑦᑕᓀᑦᑑᑎᑦᓯᓂᕐᓄᑦ ᑐᕐᖃᑕᕐᕕᒥᒃ, ᐃᒻᒥᒎᕐᑐᑦ ᖃᐅᔨᓴᕐᑏᑦ ᑎᑭᐅᑎᔮᙯᓐᓇᓲᑦ ᐱᓇᓱᐊᖃᑎᙯᓐᓇᓱᑎᒃ ᐃᖏᕐᕋᓂᕐᒥᓄᑦ ᑯᐯᑉ ᑲᕙᒪᖓᓂᒃ ᐊᒻᒪᓗ ᐊᖓᔪᕐᖄᖃᕋᑎᒃ ᓇᐅᑐᐃᓐᓇᓂᒃ ᓄᓇᓕᓐᓂ ᑲᒪᔨᓂᒃ ᐳᓖᓯᓂᒃ ᐅᕝᕙᓘᓐᓃᑦ ᓇᓂᑐᐃᓐᓇᖅ ᑯᐯᒻᒥ ᐳᓖᓯᓂᒃ. ᑌᒫᒃ ᐃᒻᒥᒎᕋᒥᒃ ᑭᓇᓕᒫᒃᑯᓄᑦ ᐅᑉᐱᕆᔭᐅᑦᓯᐊᕈᓐᓇᑐᑦ.
BEI ᐳᓖᓯᐅᕗᑦ
ᐱᒐᓱᐊᕐᑕᒥᓂᒃ ᑲᔪᓯᑎᑦᓯᒋᐊᖃᕐᓂᒥᓄᑦ, BEI ᐳᓖᓯᖏᑦ ᐊᒻᒪᓗ ᖃᐅᔨᓴᕐᑎᖏᑦ ᓄᓪᓚᖓᑎᑦᓯᓂᕐᓄᑦ ᐳᓖᓯᐅᒍᑎᖃᕐᐳᑦ ᐊᒻᒪᓗ ᑌᒣᒃᑲᒥᒃ ᓄᑭᖃᕐᓱᑎᒃ ᐱᓇᓱᒐᖃᕐᓱᑎᓪᓗ ᐱᓯᒪᔪᓂᒃ ᑖᒃᑯᓇᖕᖓᑦ ᐱᑦᔪᑎᖃᕈᑎᒥᓂᑦ.
ᒪᓕᓪᓗᒋᑦ ᐳᓖᓯᓄᑦ ᐱᖁᔦᑦ, ᑎᒥ ᖃᐅᔨᓴᓲᖅ ᐊᑦᔨᒌᖕᖏᑐᓂᒃ ᐊᑑᑎᔪᓂᒃ ᑯᐯᓕᒫᒥ. ᖃᖓᑐᐃᓐᓇᓯᐊᖅ BEI, ᐃᒻᒥᓂᕿᓗᓂ, ᑐᑭᑖᕐᖃᔭᖕᖏᑐᖅ ᖃᐅᔨᓴᕐᓂᒥᒃ ᑲᔪᓯᑎᑦᓯᓚᖓᒋᐊᒥᒃ, ᐃᓘᓐᓇᑎᒃ ᑲᒪᒋᔭᐅᒋᐊᓖᑦ ᐳᓖᓯᓄᑦ ᑲᒪᒋᔭᐅᒋᐊᖃᕐᑎᓗᒋᑦ ᑎᓕᔨᐅᑕᐅᒋᐊᖃᕐᒪᑕ. BEI ᑐᓂᔨᕕᐅᕐᖃᔭᖕᖏᑐᖅ ᑭᓇᑐᐃᓐᓇᑯᑦ ᐅᓐᓂᓗᒍᑎᖏᓐᓂᒃ ᐅᕝᕙᓘᓐᓃᑦ ᖃᐅᔨᓴᖁᔭᐅᓗᑎᒃ ᑎᓕᔭᐅᒋᐊᖃᕋᑎᒃ ᐃᓄᒻᒧᑦ ᓄᓇᓕᒥᐅᒍᖃᑕᐅᔪᒧᑦ ᐊᑕᐅᓯᕐᒧᑦ.
ᖃᐅᔨᒋᐊᓪᓚᕆᓐᓂᖏᑦ ᐊᑑᑎᔪᕕᓂᕐᓂᒃ
ᖃᐅᔨᓴᓕᕋᒥᒃ, BEI ᖃᐅᔨᒋᐊᓪᓚᕆᓲᑦ ᐊᑑᑎᔪᕕᓂᕐᓂᒃ ᐊᒻᒪᓗ ᓱᓇᓄᑦ ᑌᒣᓚᕿᓐᓂᒪᖔᑕ ᓱᕐᖁᐃᓯᑦᓯᐊᕋᓱᐊᕐᓱᑎᒃ. ᐆᑦᑑᑎᒋᑦᓱᒍ, ᖃᐅᔨᓴᕐᓂᓕᒫᒥᓂ ᐃᓘᓐᓀᓂ, ᐃᓕᖓᑉᐸᑦ ᐃᓕᒃᑰᑐᒧᑦ ᐅᕝᕙᓘᓐᓃᑦ ᐱᖁᔭᕐᓂᒃ ᓯᖁᒥᑦᓯᔪᕕᓂᕐᒧᑦ ᖃᐅᔨᓴᕈᑎᖃᕐᓂᒧᑦ, ᓇᓗᓀᕐᑐᐃᓲᑦ ᐅᖃᐅᓯᕆᔭᐅᔪᓂᒃ ᐊᒻᒪᓗ ᓱᓕᔪᓂᒃ ᑕᑯᓐᓇᓚᕆᑦᑐᕕᓂᕐᑎᑐᑦ ᖃᐅᔨᒪᒍᓐᓇᓯᑦᓱᒋᑦ ᓱᓇᑕᓕᒫᖏᑦ ᐊᒻᒪᓗ ᑕᒻᒪᓯᒪᔪᕐᑕᖃᕈᓐᓀᑎᓪᓗᒋᑦ ᓇᓗᓀᕐᑐᓱᒋᑦ ᐃᓕᒃᑯᑦ ᑲᒪᒋᔭᐅᔪᑦᓴᓅᕐᖃᓱᒋᑦ. ᖃᐅᔨᓴᕐᑎᐅᖃᑎᒌᑦ ᑎᓕᔭᐅᔪᑦ ᖃᐅᔨᓴᖁᔭᐅᑦᓱᑎᒃ ᑌᒣᒻᒪᑦ ᖃᐅᔨᓴᓲᑦ ᑐᑭᓕᕇᑦᓯᐊᓂᒃ, ᓴᐱᕐᕆᐊᓂᕐᑕᖃᖕᖏᑐᓂᒃ ᐊᒻᒪᓗ ᐃᓓᓐᓈᕈᑎᒋᓇᒋᑦ. ᐃᑉᐱᒍᓱᓪᓚᕆᓲᑦ ᑕᒪᐅᙰᓐᓈᑎᑦᓯᑌᓕᑦᓯᐊᓱᑎᒃ, ᕿᒥᕐᕈᓱᑎᒃ, ᖃᐅᔨᓴᑦᓯᐊᓱᑎᒃ, ᐃᓕᓐᓇᖓᑦᓯᐊᑐᓂᓪᓗ ᐊᐱᕐᓲᔭᕐᓱᑎᒃ ᐊᑑᑎᓂᖃᕐᑎᓗᒍ ᐱᖁᔭᕐᓂᒃ ᓯᖁᒥᑦᓯᓂᖅ ᐁᓯᒪᔪᕕᓂᕐᓂᒃ ᐊᒻᒪᓗ ᑕᑯᓐᓇᑐᕕᓂᕐᓂᒃ ᑕᒪᒃᑯᐊ ᐱᓇᓱᐊᕐᑕᖏᑦᑕ ᐃᓗᓕᓪᓚᕆᒋᒻᒣᑦ ᖃᐅᔨᓴᕐᑏᑦ ᐱᓇᓱᐊᕆᐊᓖᑦ ᓄᐃᑦᓯᓚᕿᑦᓯᐊᕆᐊᓚᖓᑦᓱᑎᒃ ᓇᓗᓀᕐᑐᓯᐊᕐᓯᒪᔪᓂᒃ ᐊᒻᒪᓗ ᑐᑭᓯᓇᑦᓯᐊᑐᓂᒃ ᑐᓴᕐᑎᓯᐅᑎᓂᒃ ᓯᓚᑖᓃᑦᑐᓄᑦ ᖃᓄᐃᓕᖕᖓᑕᐅᓯᒪᖕᖏᑐᓂᒃ.
ᖃᐅᔨᓴᕐᓃᑦ ᑭᖑᓂᖓᒍᑦ, BEI ᑐᓂᔨᓲᖅ ᑭᖑᓪᓕᐹᓂᒃ ᑐᓴᕐᑎᓯᐅᑎᓂᒃ ᐱᖁᔭᕐᓂᒃ ᓯᖁᒥᑦᓯᔪᓂᒃ ᐊᒻᒪᓗ ᐱᓂᕐᓗᑐᑦ ᑎᒍᔭᐅᓂᖏᓐᓂᒃ ᑲᒪᔨᒻᒪᕆᒻᒧᑦ (DPCP). ᑖᒃᑯᐊ ᑐᓴᕐᑎᓯᐅᑏᑦ ᑐᖕᖓᕕᒋᑦᓱᒋᑦ DPCP ᑐᑭᑖᓚᖓᔪᖅ ᐱᖁᔭᕐᓂᒃ ᓯᖁᒥᑦᓯᓂᕐᒧᑦ ᐸᓯᔭᑦᓴᖑᓚᖓᒻᒪᖔᑦ ᑲᒪᒋᔭᖅ. ᑐᖁᔪᖃᕐᐸᑦ, BEI ᑖᒃᑯᐊ ᑐᓴᕐᑎᓯᐅᑏᑦ ᐊᑦᔨᖏᓐᓂᒃ ᑐᓂᔨᓚᖓᑎᓪᓗᒍ ᓱᓇᒧᑦ ᑐᖁᓚᕿᒻᒪᖔᑦ ᕿᒥᕐᕈᔨᒧᑦ.
ᐋᓐᓂᓚᕿᔫᑉ ᐅᕝᕙᓘᓐᓃᑦ ᐃᓅᒍᓐᓀᓚᕿᔫᑉ ᐃᓚᖏᑦ
ᖃᐅᔨᓴᕐᓂᖅ ᐱᒋᐊᑐᐊᕐᒪᑦ, BEI ᑐᓴᕐᑎᓯᑲᐱᒐᓱᐊᓲᖅ ᖃᓄᓕᒫᖅ, ᐃᓚᖓᓂᒃ ᐋᓐᓂᑑᑉ ᐅᕝᕙᓘᓐᓃᑦ ᐃᓅᒍᓐᓀᑑᑉ. ᖃᐅᔨᓴᕐᑐᓂᒃ ᑲᒪᔨ ᖃᐅᔨᓴᕐᑕᐅᔪᒥᒃ ᑐᓴᕐᑎᓯᑲᑦᑕᕈᓐᓇᑐᖅ ᐃᓚᒋᔭᐅᔪᒥᒃ ᖃᓄᐃᓕᖓᓕᕐᒪᖔᑦ ᖃᐅᔨᓴᕐᑕᖓᑦ ᐱᕙᓪᓕᐊᓂᕐᒥᓂᒃ ᑐᓴᕐᑎᓯᖃᑦᑕᓗᓂ, ᐱᕙᓪᓕᐊᑎᑦᓯᓯᐊᕐᓗᓂ ᑐᑭᓯᔭᐅᕙᓪᓕᐊᓯᐊᕐᓂᖓᓂᒃ ᐊᑑᑎᔭᕕᓂᐅᑉ ᓲᓱᑦᓴᓯᐊᕐᓗᓂᓗ ᑐᓴᕐᑕᐅᒋᐊᖃᖕᖏᓂᖏᓐᓂᒃ ᑐᓴᕐᑎᓯᐅᑎᖏᑦ ᖃᓄᐃᓕᖕᙰᓚᕿᖃᑦᑕᕆᐊᖃᖕᖏᒪᑕ ᖃᐅᔨᓴᕐᓂᒥᒃ. ᐃᑲᔪᕐᑎᓂᒃ ᓴᐳᑦᔨᒍᓐᓇᑐᓂᒃ ᑲᒪᒋᔭᐅᑎᑦᓯᒍᓐᓇᒥᑦᓱᓂ ᒋᐊᖃᕈᓂ ᐊᑑᑎᔭᐅᓕᕐᑐᑦ ᐃᑉᐱᒋᓗᒋᑦ.
ᑲᔪᓯᑎᑦᓯᓂᖅ ᖃᐅᔨᓴᕐᓂᒥᒃ ᐱᔭᕆᐊᑭᖕᖏᑐᖅ
BEI-ᑯᓄᑦ ᖃᐅᔨᓴᕐᓃᑦ ᑲᔪᓯᑎᑕᐅᔪᑦ ᐃᓗᓐᓇᑎᒃ ᐃᓱᓕᑎᑕᐅᓲᑦ ᑐᓴᕐᑎᓯᐅᑎᓂᒃ ᓄᐃᑦᓯᒍᑕᐅᑦᓱᑎᒃ ᑐᓂᔭᐅᔪᑦᓴᓂᒃ DPCP-ᒧᑦ, ᑖᒃᑯᐊᓗ ᓱᕐᖁᐃᓯᓚᖓᑦᓱᑎᒃ ᐸᓯᔭᑦᓴᖑᕐᑎᑕᐅᓚᖓᒻᒪᖔᑦ ᐳᓖᓯ ᑲᒪᒋᔭᓕᒃ.
ᑭᓯᐊᓂ, ᐸᑦᓯᑎᐅᓚᕿᔪᕕᓂᐅᑉᐸᑦ ᐃᑦᓯᒍᓱᑦᓱᓂ ᑲᒪᒃᑭᓗᑦᑐᕕᓂᐅᓂᕐᒥᓄᑦ ᐱᓇᓱᐊᕐᓱᓂ ᐳᓖᓯ, BEI ᐃᒣᒍᓐᓇᑐᑦ, ᖃᐅᔨᓴᕐᓂᒥᒃ ᐱᔭᕇᕐᓗᑎᒃ, ᐅᒃᑯᐊᓯᓗᑎᒃ ᑲᒪᒋᒋᐊᕐᑕᕕᓂᕐᒥᓂᒃ ᐃᓱᒪᒋᔭᖃᕈᑎᒃ ᐸᑦᓯᑎᐅᓂᖓᑕ ᑐᑭᖃᖕᖏᒋᐊᖓᓂᒃ ᐊᒻᒪᓗ ᓱᕐᖁᐃᓯᒍᑎᑦᓴᒥᒃ ᐱᑕᖃᖕᖏᐸᑦ.
ᑭᖑᓪᓕᐹᒥ, ᐃᓘᓐᓀᓂ ᐱᖁᔦᑦ ᓯᖁᒥᑕᐅᓂᖏᓐᓄᑦ ᐸᓯᑦᓯᒍᑎᓂ, BEI ᕿᓄᕕᖃᕈᓐᓇᑐᖅ DPCP-ᒥᒃ ᐃᕐᖃᑐᐃᕕᒃᑯᑦ ᓄᐃᑦᓯᖁᓗᒋᑦ ᖃᐅᔨᓴᕐᓂᒥᓂ ᑎᒍᓯᔪᕕᓂᐅᑉᐸᑕ ᓱᕐᖁᐃᓯᑦᓯᐊᕈᑎᓂᒃ ᓱᓪᓕᑕᐅᓂᖓᓂᒃ ᓄᐃᑦᓯᒍᑕᐅᒍᓐᓇᑐᓂᒃ ᑐᑭᑖᕆᔨᓄᑦ ᐱᖁᔭᐅᑉ ᓯᖁᒥᑕᕕᓂᐅᒋᐊᖓᓂᒃ.
ᐊᑑᑎᔪᕕᓂᕐᒥᒃ ᐅᕝᕙᓘᓐᓃᑦ ᐸᓯᔭᐅᒍᑎᒥᒃ ᓱᕐᖁᐃᓇᕐᑎᓯᑦᓯᐊᓂᖅ ᑌᒣᒻᒪᑦ ᐱᑦᓯᐊᕋᓱᐊᕈᑎᒋᒋᐊᖃᕐᐯᑦ ᐱᓇᓱᐊᕈᑎᒋᑦᓯᐊᓗᒍ BEI. ᐊᑦᔨᐅᖏᒃᑲᓗᐊᕐᓗᑎᒃ ᐊᒻᒪᓗ ᐱᔭᕆᐊᑭᖕᖏᑲᓗᐊᕐᓗᑎᒃ, ᖃᐅᔨᓴᕐᓃᑦ ᑲᔪᓯᑎᑕᖏᑦ ᐃᒻᒥᒎᕐᑐᑦ ᖃᐅᔨᓴᕐᓂᓂᒃ ᑲᒪᔩᑦ ᐃᓘᓐᓇᑎᒃ ᑌᒣᑦᑐᓭᓐᓇᓂᒃ ᐱᑕᖃᕆᐊᖃᓲᑦ ᐱᓇᓱᑦᑎᒪᕆᐅᓂᕐᓄᑦ ᓄᐃᑕᐅᓚᕿᓯᒪᔪᓂᒃ ᐊᒻᒪᓗ ᐱᓪᓚᕆᒐᓱᐊᕐᓂᒥᑎᒍᑦ ᐱᓚᕿᔭᖏᓐᓂᒃ ᑐᖕᖓᕕᒋᑦᓱᒋᑦ ᐊᑐᕐᑕᐅᓯᐊᕐᓂᖏᑦ ᐱᓪᓚᕆᑦᑏᑦ ᐊᒻᒪᓗ ᖃᓄᑐᐃᓐᓈᖏᑦᑐᑦ ᐱᖁᔭᑎᒎᕐᑐᑦ ᒪᓕᒉᑦ.
ᐃᓘᓐᓀᓂ ᑲᒪᒋᔭᒥᓂᒃ, BEI ᑲᔪᓯᑎᑦᓯᓚᕆᒐᓱᐊᕐᑎ ᓄᐃᑦᓯᒋᐊᕐᓂᒥᓄᑦ ᐱᑦᓯᐊᓯᒪᔪᓂᒃ, ᓇᓗᓀᕐᑐᓯᐊᕐᓯᒪᔪᓂᒃ ᐊᒻᒪᓗ ᑐᑭᓯᓇᑦᓯᐊᑐᓂᒃ ᖃᐅᔨᓴᕐᓂᒥᓄᑦ ᑐᓴᕐᑎᓯᐅᑎᓂᒃ. ᑌᒣᒻᒪᑦ ᐱᕕᖃᕐᑎᓯᑦᓯᐊᓲᖅ ᖃᐅᔨᓴᕐᑎᖁᑎᒥᓂᒃ ᐅᐸᓘᒪᑎᓇᒋᑦ ᑲᔪᓯᑎᑦᓯᓯᐊᕆᐊᖃᕐᓂᖏᓐᓄᑦ ᑖᑦᓱᒥᖓ ᐱᒻᒪᕆᒻᒥᒃ ᑲᒪᒋᒋᐊᓕᒥᓂᒃ.