ᐊᖏᖃᑎᒌᒍᑎᖓ ᓴᐳᒻᒥᔩᑦ ᐱᖁᔭᕐᓂᒃ ᓯᖁᒥᑦᓯᔪᓄᑦ ᐱᓂᕐᓗᕕᐅᓯᒪᔪᓂᒃ ᐃᑲᔪᕐᓯᕕᐅᑉ ᐊᒻᒪᓗ ᑲᑎᕕᐅᑉ ᐳᓖᓯᖏᑦᑕ
ᓄᑖᖅ ᐊᖏᖃᑎᒌᒍᑎᖓ ᓴᐳᒻᒥᔩᑦ ᐱᖁᔭᕐᓂᒃ ᓯᖁᒥᑦᓯᔪᓄᑦ ᐱᓂᕐᓗᕕᐅᔪᓂᒃ ᐃᑲᔪᕐᓯᕕᐅᑉ ᐊᒻᒪᓗ ᑲᑎᕕᐅᑉ ᐳᓖᓯᖏᑦᑕ ᐊᑎᓕᐅᕐᕕᐅᓚᐅᔫᖅ ᐊᒃᑑᐸ 25-ᒥ ᓴᐳᑦᔭᐅᓯᐊᕐᓂᓴᐅᒋᐊᖃᕐᓂᖏᓐᓄᑦ ᐱᒋᐊᕐᓂᕕᓂᖓᓂᑦ ᐱᒋᐊᑦᓯᐊᑎᓗᒋᑦ ᐃᕐᖃᑐᐃᕕᑎᒍᑦ ᑲᒪᒋᔭᐅᒋᐊᖃᕐᓂᖏᓐᓂᑦ
ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᒥᓯᐊᓪ ᒪᕐᑌ ᐊᒻᒪᓗ ᑲᒪᔨᒻᒪᕆᖓ ᐱᖁᔭᑎᒍᑦ, ᐃᓅᓯᒃᑯ-ᐱᖁᔭᑎᒎᕐᓂᒧᑦ ᓄᓇᓕᓐᓂᓗ ᑲᒪᒋᔭᖃᕆᐊᖃᕐᓂᒧᑦ ᐱᓇᓱᕝᕕᖓ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (ᑫᐋᔩ), ᕕᓓᒫᓐ ᐳᓕᐅ, ᐊᑎᓕᐅᖃᑎᖃᕐᓯᒪᓕᕐᑐᖅ ᐊᖏᖃᑎᒌᒍᑎᒥᒃ ᐳᓖᓰᑦ ᖃᓄᐃᓕᔭᐅᒃᑲᓂᕆᐊᕈᑎᖏᓐᓄᑦ ᑫᐋᔩᑉ ᐃᓪᓗᖁᑎᖓᓂ ᑰᑦᔪᐊᒥ. ᐅᓪᓗᒥ ᐱᒋᐊᕐᓗᑎᒃ, ᐱᓂᕐᓗᕕᐅᔪᕕᓂᐅᑉ ᐅᖃᐅᓯᖏᓐᓂᒃ ᓈᓚᒌᕈᓂ, ᐳᓖᓯ ᐊᐱᕐᓱᖃᑦᑕᓂᐊᕐᓕᕐᓗᒍ ᓴᐳᑦᔭᐅᒍᒪᒻᒪᖔᑦ ᓴᐳᑦᔨᔨᓄᑦ. ᐱᓂᕐᓗᕕᐅᔪᕕᓂᖅ ᒍᒪᖕᖏᐸᑦ, ᐳᓖᓯ ᐁᑦᑐᐃᖃᑦᑕᓂᐊᓕᕐᑎᓗᒍ ᑐᑭᓯᐅᑎᑦᓴᒋᐊᓪᓚᓂᒃ ᐊᒻᒪᓗ ᐱᓇᓱᕝᕕᒥᓂ ᓇᓪᓕᐊᒍᒻᒪᖔᕐᒥ ᖃᐅᔨᒪᐅᑎᑦᓴᓂᒃ. ᐱᓂᕐᓗᕕᐅᔪᕕᓂᖅ ᐃᑲᔪᕐᑕᐅᒍᒪᑉᐸᑦ ᓴᐳᑦᔨᔨᓄᑦ, ᑲᑎᕕᐅᑉ ᐳᓖᓯᖏᑦ ᑐᓂᔨᖃᑦᑕᓂᐊᕐᑎᓗᒋᑦ ᑭᓇᒃᑯᓄᑦ ᐃᑲᔪᕐᓯᔭᐅᒍᓐᓇᒪᖔᑦ ᐃᑲᔪᕐᓯᔭᐅᒋᐊᓪᓚᕆᐊᖃᕐᐸᑦ. ᓴᐳᑦᔨᔨᓄᑦ ᐱᓂᕐᓗᕕᐅᔪᕕᓂᖅ ᐃᑲᔪᕐᑕᐅᒍᒪᑉᐸᑦ, ᑲᑎᕕᐅᑉ ᐳᓖᓯᖏᑦ ᓇᓂᔭᐅᒍᑎᖏᓐᓂᒃ ᑐᓂᔨᖃᑦᑕᓂᐊᕐᑎᓗᒍ ᓴᐳᒻᒥᔨᓂᑦ ᑲᒪᔨᒧᑦ, ᑌᒫᓪᓗ ᐃᑲᔪᕐᓯᔭᐅᑲᐱᒋᐊᖃᕐᐸᑦ ᑖᓐᓇ ᐱᓂᕐᓗᕕᐅᔪᕕᓂᖅ ᑕᒉᓐᓇᖅ ᐃᑲᔪᕐᓯᔭᐅᒍᓐᓇᓂᐊᕐᓗᓂ. "ᐳᓖᓰᑦ ᐃᑲᔪᕐᑐᓴᕐᓯᐅᕈᑦᔨᓂᖏᓐᓄᑦ ᐊᖏᖃᑎᖃᕈᑎᒃ ᐱᓂᕐᓗᕕᐅᔪᕕᓂᕐᓂᒃ ᑲᒪᑲᐱᑦᑎᓯᒍᓐᓇᓚᖓᑎᓪᓗᒍ ᐃᕐᖃᑐᐃᕕᒃᑰᕈᑎᖃᕆᐊᖃᕐᓂᖏᓐᓄᑦ ᐊᒻᒪᓗ ᕿᑲᕐᑎᑕᐅᒍᓐᓀᓗᑎᒃ ᑲᒪᔨᖁᑎᑦᑎᓂᒃ ᐅᖄᖃᑎᖃᑲᐱᒍᓐᓇᓯᑎᓗᒋᑦ", ᑌᒫᒃ ᑐᑭᓯᑎᑦᓯᓚᐅᕐᑐᖅ ᐳᔫᓄ ᐋᒥᓪ, ᓴᐳᒻᒥᔨᓂᒃ ᐊᐅᓚᑦᓯᔨ. "ᐊᑎᓕᐅᕐᕕᐅᓚᐅᕐᑎᓇᒍ ᐊᖏᖃᑎᖃᕈᑎᒃ, ᓴᐳᒻᒥᔩᑦ ᑭᒡᒐᑐᕈᑎᖏᑦ ᐃᓱᓕᖃᑦᑕᓚᐅᕐᒪᑕ ᐃᕐᖃᑐᐃᕕᒃᑰᓂᖏᑦ ᐊᓂᒍᕐᒪᑕ. ᑌᒫᒃ ᐃᖏᕐᕋᑎᑦᓯᖃᑦᑕᕈᑦᑕ ᓄᑖᒍᓕᕐᑐᒥᒃ, ᓴᐳᑦᔨᖃᑦᑕᕈᒪᓂᕗᓐᓄᑦ ᐱᓂᕐᓗᕕᐅᓯᒪᔪᓂᒃ ᐱᒋᐊᕐᕕᒋᓗᒍ ᐊ ᑎᑭᓪᓗᒍ ᖑ ᐊᕐᖁᓵᕐᓗᒋᑦ ᐃᕐᖃᑐᐃᕕᐅᑉ ᐱᕙᓪᓕᐊᑎᑕᖏᑦ." ᐳᔫᓄ ᐋᒥᓪ ᑐᓴᕐᑕᐅᑎᑦᓯᔪᖅ ᐊᖏᖃᑎᖃᕈᑎᒥᒃ ᑫᐋᔩᑉ ᐊᓪᓚᕕᖓᓂ ᐱᖁᔭᕐᓂᒃ ᓯᖁᒥᑦᓯᔪᒧᑦ ᐱᓂᕐᓗᕕᐅᔪᖅ ᑐᑭᓯᑎᑕᐅᓚᖓᔪᖅ ᖃᓄᐃᓘᕈᑕᐅᒋᐊᖃᕐᒪᖔᑦ ᐱᓂᕐᓗᕕᓕᕕᓂᖅ, ᐃᕐᖃᑐᕐᑕᐅᒋᐊᖃᒫᕐᓂᖓᑕ ᐅᓪᓗᖓ ᐊᒻᒪᓗ ᐸᓯᔭᐅᔪᖅ ᓱᒋᐊᖃᓛᕐᒪᖔᑦ ᑎᒍᔭᐅᒪᕕᒻᒥ ᐊᓂᒍᓐᓇᓚᖓᒍᓂ, ᐊᒻᒪᓗ ᑭᖑᓂᖓᓴᖓᒍᑦ ᓴᐳᑦᔭᐅᓂᖃᖃᑦᑕᓗᓂ. ᑖᓐᓇ ᐱᓇᓱᐊᕈᖃᑎᒌᓐᓂᖅ ᑭᒡᒐᑐᑦᓯᐊᓂᕐᓴᐅᒍᑎᐅᓂᐊᕐᑐᖅ ᐱᖁᔭᕐᓂᒃ ᓯᖁᒥᑦᓯᔪᓄᑦ ᐱᓂᕐᓗᕕᐅᔪᓂᒃ 14-ᓂ ᓄᓇᓕᓐᓂ ᓄᓇᕕᒻᒥ. ᑐᑭᓯᒋᐊᓪᓚᕈᒪᔪᑦ ᓴᐳᒻᒥᔩᑦ ᑭᒡᒐᑐᕈᑎᖏᓐᓂᒃ ᐅᕗᖕᖓᓗᑎᒃ ᑕᑯᒐᓱᐊᕈᓐᓇᑐᑦ ᖃᕆᑕᐅᔭᑎᒍᑦ: http://www.krpf.ca/iu/assistance/crime-victims-assistance.