ᕿᓂᕐᓂᖅ ᐋᖓᔮᓐᓇᑐᐃᑦ ᓂᐅᕕᐊᑦᓴᐅᓲᑦ ᐱᑦᔪᑎᒋᑦᓱᒋᑦ ᓴᓪᓗᓂ
March 10, 2023
ᓴᓪᓗᓂ, ᒫᑦᔨ 6ᒥ, ᓄᓇᓕᐅᑉ ᐳᓖᓯᖏᑦ ᐃᓚᖃᕐᓱᑎᑦ ᓄᓇᕕᒻᒥ ᐳᓖᓯᖏᓐᓂᑦ ᐊᒻᒪᓗ ᓄᓇᕕᒻᒥ ᖃᐅᔨᓴᕐᑎᓂᑦ ᕿᓂᕐᖁᑦ ᐊᑕᐅᓯᕐᒥᒃ ᐊᓂᕐᕋᕆᔭᐅᔪᒥᒃ. ᐃᓪᓗᒃ ᐊᑐᕐᑕᐅᓂᕐᖁᖅ ᓂᐅᕕᐊᑦᓴᖃᕐᕕᐅᓱᓂ ᐋᖓᔮᓐᓇᑐᓂᑦ ᓲᖑᓂᕐᓴᓂᑦ. ᐳᓖᓰᑦ ᓄᓇᕕᒻᒥ ᐳᓖᓯᖏᑦ ᑎᒍᓯᓐᓂᖁᑦ 50 ᑯᕋᒻ ᐅᖓᑖᓂᑦᑐᓂᑦ ᑯᑫᓐᓂᑦ, 350 ᑯᕋᒻ ᐅᖓᑖᓂ ᐅᔭᕋᕐᓂᑦ, ᐊᒻᒪᓗ ᐋᖓᔮᓐᓇᑐᓂᑦ LSD-ᖑᓂᕋᕐᑕᐅᔪᓂᑦ. ᑖᑦᓱᒥᖓ ᕿᓂᕐᓂᒥ ᑎᒍᓯᓐᓂᒥᕗᑦ $2000ᓂᑦ ᑖᓚᑐᐃᓐᓇᓂᑦ ᐋᖓᔮᓐᓇᑐᓂᑦ ᓂᐅᕕᐊᑦᓴᖃᕐᓂᒧᑦ ᐱᐅᒡᒍᑎᖏᓐᓂᑦ. ᐱᓇᓱᑦᑕᐅᔪᖅ ᐱᔭᕆᕐᑕᐅᓂᐊᕐᖁᖅ ᑐᓂᔭᐅᓗᓂᓗ ᑐᑭᒧᐊᑦᑎᓯᔨᖓᓄᑦ ᐱᖁᔭᓂᑦ ᓱᒃᑯᐃᓂᕐᓄᑦ ᐱᓂᕐᓗᓂᓕᕆᓂᕐᓂᓗ ᐱᖁᔭᓕᕆᔨᖓᓄᑦ, ᑐᕐᖃᑌᔨᒃ ᑐᑭᑖᕐᓗᓂ ᐸᓯᔭᑦᓴᓕᐅᓂᐊᕐᒪᖔᑕ ᐃᕐᖃᑐᐃᕕᓕᐊᕐᑐᓴᐅᒻᒪᖔᑕᓗ. ᐱᓂᕐᓗᓯᒪᓂᕋᕐᑕᐅᔪᑦ ᑎᒍᔭᐅᓐᓂᖁᑦ ᕿᓂᕐᓂᖃᕐᑎᓗᒋᑦ ᕕᕈᐊᕆ 23ᒥ 24ᒥᓗ ᖃᐅᔨᓴᕐᑎᖏᓐᓄᑦ ᓄᓇᕕᒻᒥ ᐱᓇᓱᑦᑎᖏᓐᓄᑦ. ᖃᐅᔨᒪᒍᕕᑦ ᐋᖓᔮᓐᓇᑐᐃᑦ ᐃᒥᐊᓗᐃᓪᓗᓃᑦ ᓂᐅᕕᐊᑦᓴᐅᓂᖏᓐᓂᑦ, ᓄᓇᕕᒻᒥ ᐳᓖᓯᖏᑦᑕ ᐱᒍᑦᔨᕕᖓᓄᑦ ᐅᖃᕈᑎᖃᕈᓐᓇᖁᑎ ᑭᓇᐅᒻᒪᖔᕐᐱᑦ ᖃᐅᔨᒪᔭᐅᓇᒃ ᐅᕗᖓ ᖃᕆᑕᐅᔭᑎᒍᑦ ᐊᓪᓚᓗᑎᑦ tips@nunavikpolice.ca