ᐋᖓᔮᓐᓇᑐᓂᒃ ᕿᓂᔭᕐᓃᑦ ᐃᓄᒃᔪᐊᒥ
ᐁᕆᓕ 10 ᐱᓇᓱᐊᕈᓯᖓᓂ, ᓄᓇᕕᒻᒥ ᖃᐅᔨᓴᕐᑏᑦ ᕿᓂᔦᓐᓂᓂᕐᖁᑦ ᐃᓄᑐᐊᒧᑦ ᐊᖏᕐᕋᕆᔭᐅᔪᓂᒃ ᐃᓄᒃᔪᐊᒥ. ᑯᐯᒃ ᐳᓖᓯᖏᑦ ᓄᓇᕕᐅᓪᓗ ᐳᓖᓯᖏᑦ ᕿᓂᔭᕐᓂᒥᒃ ᐱᓇᓱᐊᕐᑐᕕᓃᑦ ᓄᕐᖃᑎᑦᓯᒐᓱᐊᕐᓱᑎᒃ ᓂᐅᕐᕈᑕᐅᓂᖏᓐᓂᒃ ᐋᖓᔮᓐᓇᑐᐃᑦ ᐃᒥᐊᓗᐃᓪᓗ ᓄᓇᓕᒻᒥ. ᐳᓖᓰᑦ ᑎᒍᓯᓐᓂᖁᑦ ᖁᓕᓂᒃ ᐃᓄᓐᓂᒃ ᑖᒃᑯᓄᖓ ᖃᐅᔨᓴᕐᑕᐅᔪᓄᑦ ᐃᓚᐅᔪᓂᒃ. ᑖᒃᑯᓇᓂ ᕿᓂᔦᓐᓂᓂᕐᓂ ᑎᒍᓯᓚᐅᕐᖁᑦ 1.5 ᑯᕌᒻ ᐅᖓᑖᓄᑦ ᐅᔭᕋᕐᓂᒃ ᐋᖓᔮᓐᓇᑐᓂᒃ (ᖄᓯᔅ), 500 ᑯᕌᒻᓂᒃ ᐊᖏᓂᕐᓴᓂᒃ ᐊᖏᓈᕐᑎᓯᒪᔪᓂᒃ ᐅᔭᕋᕐᓂᒃ ᐋᖓᔮᓐᓇᑐᓂᒃ, 500 ᑯᕌᒻ-ᒥᒃ ᐊᖏᓂᓖᑦ ᖃᓄᐃᑦᑐᑐᐃᓐᓀᑦ ᓲᖑᔪᔦᑦ ᐋᖓᔮᓐᓇᑐᐃᑦ, ᐃᓚᐅᑎᓪᓗᒋᑦ ᐊᐳᑎ ᑰᑫᓐ, ᑰᑫᓐ, GHB-ᓗ. ᑮᓇᐅᔦᑦ ᐱᖁᑏᓪᓗ ᖃᓄᐃᓪᓗᐊᓂᖏᑦ, ᖃᐅᔨᓴᕐᑏᑦ $10,000.00 ᐅᖓᑖᓄᑦ ᑮᓇᐅᔭᓂᒃ ᑎᒍᓯᓐᓂᖁᑦ ᐊᑦᔨᒌᖕᖏᑐᓂᓐᓗ ᐱᐅᒃᑯᑎᓂᒃ ᐋᖓᔮᓐᓇᑐᓂᒃ ᑎᑭᑎᑦᓯᒍᑎᕕᓂᕐᓂᒃ. ᓂᐅᕐᕈᑕᐅᓂᖏᑦᑕ ᐋᖓᔮᓐᓇᑐᐃᑦ ᐊᑭᖏᑦ ᐃᒣᓪᓗᐊᑐᑦ $83,880.00. ᐱᓇᓱᐊᕐᑕᐅᔪᑦ ᐱᔭᕇᕐᑕᐅᒍᑎᒃ, ᐊᓪᓚᑕᐅᓯᒪᔪᑦ ᑐᓂᔭᐅᓛᕐᑐᑦ DPCP-ᒧᑦ (ᑐᑭᒧᐊᑦᑎᓯᔨᖓᓄᑦ ᐱᖁᔭᓂᒃ ᓯᖁᒥᑦᓯᓂᕐᓄᑦ ᐱᓂᕐᓗᓂᓕᕆᓂᕐᓂᓗ ᐱᖁᔭᓕᕆᔨᖓᓄᑦ) ᕿᒥᕐᕈᔭᐅᓛᕐᑐᑦ ᑐᑭᑖᕈᑕᐅᓛᕐᒪᑕ ᐱᓂᕐᓗᓂᕐᒧᑦ ᑎᒍᔭᐅᔪᑦᓴᓕᐊᖑᒋᐊᖃᕐᒪᖔᑕ ᐃᕐᖃᑐᐃᕕᒻᒦᒍᑎᐅᒋᐊᖃᕐᒪᖔᑕᓘᓐᓃᑦ.
ᖃᐅᔨᒪᒍᕕᑦ ᐋᖓᔮᓐᓇᑐᐃᑦ ᐃᒥᐊᓗᐃᓪᓘᓃᑦ ᓂᐅᕕᐊᑦᓴᐅᓂᖏᓐᓂᒃ, ᓄᓇᕕᒻᒥ ᐳᓖᓯᖏᑦᑕ ᐱᒍᑦᔨᕕᖓᓄᑦ ᐅᖃᕈᑎᖃᕈᓐᓇᖁᑎᑦ ᑭᓇᐅᒻᒪᖔᕐᐱᑦ ᖃᐅᔨᔭᐅᒍᓐᓀᓗᑎᑦ ᐅᕗᖓ ᖃᕆᑕᐅᔭᑎᒍᑦ ᐊᓪᓚᓗᑎᑦ tips@nunavikpolice.ca.